„Við viljum kenna Íslendingum og hjálpa þeim að læra um Krist,“ segir hinn tvítugi öldungur Owen Moyer, sem kemur frá Virginíuríki. Með honum er Dylan Nehren, 19 ára gamall drengur frá Salt Lake City í Utah-ríki í Bandaríkjunum, sem kom til landsins sem öldungur og er búinn að vera hér í rúmt ár. Fyrst á Akureyri en flutti til höfuðborgarinnar fyrir nokkrum mánuðum. Honum líkar vel á Íslandi, enda mikill snjóbrettaunnandi. 

Stjörnur mormóna

Kirkja Jesú Krists hinna síðari daga heilögu, sem er betur þekkt sem mormónakirkjan, er alþjóðleg kirkja sem á rætur sínar að rekja til Bandaríkjanna. Hún hefur verið mikið á milli tannanna á fólki undanfarin misseri en raunveruleikaþættir á borð við Secret lives of Mormon Wives hafa rutt trúnni fram á sjónarsviðið. Stjörnur þáttanna eru allt ungar mæður með stóran fylgjendahóp á netmiðlum og eru núverandi eða fyrrum meðlimir kirkjunnar.