Hægt er að mynda óvenju marga meirihluta þegar niðurstöður kosninganna eru skoðaðar. Þó eru þeir misraunhæfir vegna málefnalegs ágreinings milli flokka. Þannig geta Viðreisn og Flokkur fólksins hvort myndað þrjá raunhæfa meirihluta. Samfylkingin getur myndað mjög öflugan meirihluta með Sjálfstæðisflokki og Viðreisn, sem myndi telja 40 þingmenn.
Flokkur fólksins getur ráðið því hvort hún halli sér að því sem formenn Sjálfstæðisflokks og Miðflokksins kalla „borgaralega“ ríkisstjórn. Þeir þrír flokkar mynda þá ríkisstjórn með 32 þingmönnum og má ekki standa tæpara.
Þá getur Viðreisn myndað meirihluta með Sjálfstæðisflokki og Miðflokki og teldu þá 33 þingmenn. Ef úr yrði, þyrfti Viðreisn líklega að setja markmið sitt um að kjósa um áframhaldandi ESB-viðræður á ís, ef marka má málflutning Sigmundar Davíðs Gunnlaugssonar, formanns Miðflokksins.
Ef litið er til sigurvegara kosninganna, þeirra flokka sem bæta mestu við sig, Samfylkingar, Viðreisnar og Flokks fólksins, yrði það nokkuð hraust ríkisstjórn með 36 þingmönnum kæmu þeir sér saman um málefnin.
Að lokum gætu Miðflokkur, Sjálfstæðisflokkur, Framsókn og Flokkur fólksins myndað 38 þingmanna meirihluta. Það yrði þá fjögurra flokka ríkisstjórn, nokkuð sem hefur aldrei verið reynt í íslenskri stjórnmálasögu.
Ef Samfylkingin er reiðubúin að vinna með Sjálfstæðisflokknum getur hún myndað ríkisstjórn með öllum öðrum flokkum. Þó yrði alltaf um þriggja flokka stjórn að ræða. Þess skal halda til haga að Samfylkingin hefur ekki útilokað samstarf með neinum flokki og eins er farið með Sjálfstæðisflokkinn.
Flokkur fólksins virðist sá flokkur sem hefur pálmann í höndum sér þegar kemur að stjórnarmyndun til hægri eða vinstri. Það sama á við um Viðreisn. Það er því ljóst að óvenju flókin staða er uppi þegar kemur að stjórnarmyndun.
Hægt er að skoða mögulega meirihluta hér.
.
Athugasemdir