Samkvæmt tilkynningu frá ríkislögreglustjóra verður Yazan Tamimi, ellefu ára gamall palestínsks drengs með Duchenne, ekki fluttur úr landi og mun fjölskyldan geta óskað eftir efnislegri meðferð umsóknar sinnar um alþjóðlega vernd hér á landi.
„Síðastliðinn mánudag var fyrirhugaður flutningur palestínskrar fjölskyldu til Spánar stöðvaður að beiðni ríkisstjórnarinnar eins og fram hefur komið í fjölmiðlum. Að baki hverrar fylgdar er mikill undirbúningur, m.a. náið samráð við yfirvöld í móttökuríki til að tryggja öryggi, aðbúnað og faglega móttöku. Miðað við þann tímaramma sem almennt er gefinn til undirbúnings er ljóst að ekki verður af flutningi fjölskyldunnar að svo komnu,“ segir í tilkynningunni.
Þá kemur fram að frá og með næsta laugardegi, 21. september, geti fjölskyldan óskað eftir efnislegri meðferð.
Albert Björn Lúðvígsson, lögfræðingur Yazans, sagði í samtali við Heimildina á mánudag, að fjölskyldan hafi ekki fengið neinar upplýsingar um það hvað varð til þess að skyndilega átti ekki að vísa þeim úr landi þá og þegar aðfararnótt mánudagsins.. Þá hafi þau jafnframt ekki fengið upplýsingar um það hvort þeim verði alls ekki brottvísað eða hvort það verði einfaldlega gert seinna. Þá benti Albert á að tíminn fyrir stjórnvöld væri að renna út:
„Íslenska ríkið hefur sex mánuði frá því að úrskurður kærunefndar er kveðinn upp, sem var kveðinn upp 21. mars, til þess að flytja hælisleitanda frá landinu,“ útskýrir Albert. „Ef viðkomandi er ekki fluttur innan þessara sex mánaða, þar eð að segja ef Yazan verður enn á landinu 22. september, þá ber Spánn ekki lengur ábyrgð á umsókninni hans.“
Athugasemdir