Fyrstu tölur: Halla Tómasdóttir leiðir

Halla Tóm­as­dóttir er með rúm­lega 37 pró­sent atkvæða sam­kvæmt fyrstu tölum úr for­seta­kosn­ing­unum árið 2024. Katrín Jak­obs­dóttir  er með 21,4 pró­sent. Þær allra fyrstu bár­ust úr Norð­aust­ur­kjör­dæmi rétt fyrir kl. 23 og höfðu þá 3.000 atkvæði verið talin. Samkvæmt þeim tölum var Halla Tóm­as­dóttir með 35,4 pró­sent atkvæða og  Katrín með 27 pró­sent tal­inna atkvæða í kjör­dæm­inu. Halla Hrund Loga­dóttir fylgdi þar á eftir með rúm 17 pró­sent.

Skömmu síðar bár­ust tölur úr Suð­ur­kjör­dæmi og sam­kvæmt þeim er Halla Tóm­as­dóttir með yfir­burða­for­skot eða 37,7 pró­sent atkvæða. Katrín er með 19,6 pró­sent sam­kvæmt þessum fyrstu tölum kjör­dæm­is­ins.

Efstu þrjárHalla Hrund Loga­dóttir (f.v.), Katrín Jak­obs­dóttir og Halla Tóm­as­dóttir í smink­her­berg­inu á RÚV áður en fyrstu tölur voru lesnar. Þær hafa leitt í skoð­ana­könn­unum und­an­farna daga.

Mynd: Golli

Þegar 12.786 atkvæði höfðu verið talin í kosn­ing­unum rétt eftir kl. 23 að kvöldi kosn­inga­dags var staðan þessi:

Halla Tóm­as­dóttir: 37,2%

Katrín Jak­obs­dóttir: 21,4%

Halla Hrund Loga­dóttir: 16,2%

Jón Gnarr: 10%

Baldur Þór­halls­son: 8,6%

Arnar Þór Jónsson: 5,5%

Aðrir fram­bjóð­endur höfðu hlotið innan við 5 pró­sent atkvæða.

Landinu er skipt í sex kjör­dæmi en taln­ing­ar­staðir eru þó aðeins fimm því atkvæði í Reykja­vík­ur­kjör­dæm­unum tveimur eru talin á sama stað, þ.e. í Laugardals­höll. Von er á fyrstu tölum úr Reykja­vík um mið­nætti og er þær verða birtar er lík­legt að um 60 pró­sent atkvæða í kjör­dæm­unum tveimur hafi verið talin. Lokatalna í kosn­ing­unum er hins vegar ekki að vænta fyrr en undir morgun.

Samkvæmt loka­kosn­inga­spá Heim­ild­ar­innar, sem birt var í morgun, voru taldar yfir­gnæf­andi líkur á því að annað hvort Halla Tóm­as­dóttir eða Katrín Jak­obs­dóttir yrði næsti for­seti.  Katrín mæld­ist með 24,3 pró­senta fylgi og Halla með 23,2 pró­sent en mun­ur­inn var ekki mark­tækur.

Kosn­inga­spá Heim­ild­ar­innar var birt reglu­lega í aðdrag­anda kosn­ing­anna. Hún er unnin af dr. Baldri Héð­ins­syni stærð­fræð­ingi og byggði á vigtun og grein­ingu á öllum þeim skoð­ana­könn­unum sem fram­kvæmdar eru. Auk þess að reikna út loka­mat á fylgi fram­bjóð­enda reikn­aði hann líka út líkur á sigri þeirra. Inn í þá útreikn­inga voru nið­ur­stöður loka­mats­ins teknar sem og sögu­legt frá­vik í síð­ustu könn­unum fyrir kosn­ingar. Enn­fremur var það gert með því að keyra um 500 þús­und sýnd­ar­kosn­ingar til þess að reikna út hversu lík­legt væri að hver og einn fram­bjóð­andi sigri.

Nið­ur­staða þessa mats var sú að Halla Tóm­as­dóttir ætti 41 pró­sent líkur á sigri og Katrín 40 pró­sent.

Fréttin verður upp­færð.