Donald J. Trump, fyrrverandi forseti Bandaríkjanna sem sækist eftir því að taka aftur við því embætti í komandi kosningum, var í kvöld fundinn sekur um að falsa gögn í tengslum við greiðslur sem greiddar voru til klámmyndaleikkonunnar Stormy Daniels. Trump var ákærður í 34 ákæruliðum og sakfelldur fyrir þá alla. Kviðdómur í New York kvað upp þessa niðurstöðu eftir að hafa ráðfært sig um hana í tvo daga.
Réttahöldin stóðu yfir í nokkrar vikur og verjendur Trump og saksóknari í málinu luku málflutningi sínum í byrjun viku. Á þriðja tug vitna komu fyrir dóminn. Trump var ákærður fyrir að falsa reikninga og önnur gögn í tengslum við greiðslur til Daniels sem fyrrverandi lögmaður hans, Michael Cohen, innti af hendi til hennar. Cohen veðsetti heimili sitt til að borga Daniels, sem heldur því fram að hún hafi sofið hjá Trump, 130 þúsund dali fyrir að selja ekki sögu sína til fjölmiðla í aðdraganda forsetakosninganna 2016, sem Trump sigraði. Trump var gefið að sök að hafa endurgreitt Cohen, sem var einn þeirra sem bar vitni fyrir saksóknarann í málinu, eftir að hann var orðinn forseti.
Málið kom upp á viðkvæmum tíma í kosningabaráttunni fyrir tæpum átta árum. Access Hollywood-skandallinn, þar sem Trump talaði ógætilega á upptöku um hvernig hann kæmi fram við konur, hafði nýlega komið upp og vitni við réttarhöldin sögðu frá því að ótti hefði verið í herbúðum forsetans fyrrverandi að annar slíkur skandall myndi skaða framboðið enn frekar.
Þetta er eitt af fjórum málum þar sem Trump hefur verið ákærður, en hann er fyrsti forseti Bandaríkjanna til að verða ákærður fyrir glæpi í sögu landsins. Hann hefur líka verið ákærður vegna aðkomu sinnar að árásinni á bandaríska þinghúsið 6. janúar 2021, fyrir meðferð sína á trúnaðarskjölum sem hann flutti með sér á heimili sitt í Mar-a-lago eftir að hann lét af embætti og fyrir að hafa reynt að hafa áhrif á niðurstöður forsetakosninganna í Georgiu-ríki árið 2020.
Málið sem dæmt var í í dag er þó eina málið sem hefur ratað í málsmeðferð enn sem komið er og lögmenn Trump hafa gert allt sem í sínu valdi stendur til að tefja framgang hinna málanna þriggja, með miklum árangri, svo þau verði ekki tekin fyrir áður en kosið verður milli Trump og Joe Biden Bandaríkjaforseta í nóvember. Stjórnmálaskýrendur í Bandaríkjunum búast flestir ekki við því að hin málin verði afgreidd áður en kosningarnar fara fram.
Athugasemdir (1)