Reykjanesbær lokar sundlaugum og biðlar til íbúa að draga úr rafmagnsnotkun

Neyð­ar­á­stand blasir við íbúum Reykja­nes­inu eftir hraun flæddi yfir stofn­lögn HS Veitna. En lögnin sér Reykja­nesbæ, Grinda­vík, Suð­ur­nesjabæ og Vogum fyrir heitu vatni. 

Heim­ildin hafði sam­band við Guðlaug Helga Sig­ur­jóns­son, svið­stjóra umhverfis- og fram­kvæmda­sviðs Reykja­nes­bæjar, sem situr um þessa mundir í aðgerða­stjórn almanna­varna í Reykja­nesbæ. En bæj­ar­stjóri Reykja­nes­bæjar, Kjartan Már Kjart­ans­son, er um þessar mundir staddur erlendis. 

Guð­laugur segir að eign­ar­vernd sé helst for­gangs­at­riðið í við­bragðs­á­ætlun bæj­ar­yf­ir­valda.

„Nú erum við fyrst og fremst að hugsa um eign­ar­vernd og halda hita í hús­næði eins og hægt er. Það var ákveðið að skóla­hald ætti að vera óbreytt alla­vega þennan dag í dag. En það er hægt segja það að það verður ekki skóla­hald á morgun. Við höfum lokað sund­laugum, öllum óþarfa hita sem við erum að nota, svo sem gervi­gras­velli og fleiri stöðum,“ segir Guð­laugur.

Þá segir Guð­laugur að gert sé ráð fyrir að heita­vatn­laust verði í bænum þegar vatns­afls­birgðir í miðl­un­ar­tönkum klár­ast, en gert er ráð fyrir að þeir end­ist í sex til 12 klukku­stundir.

Guð­laugur telur ólík­legt að raf­magn fari af bænum. „Það verður kannski mögu­lega skert raf­magn. Og við beinum til fólks að vera ekki nota mikið umfram raf­magn í heima­húsum með raf­magns­hit­urum, kerfið mun ekki hafa það.“

Spurður hvort til standi að flytja íbúa úr bænum vegna skorts á heitu vatni segir Guð­laugur að enn sem komið er standi ekki til að flytja almenna íbúa úr bænum.  Hins vegar sé farið að ræða þann mögu­leika að flytja fólk sem dvelur á hjúkr­un­ar­heim­ilum og aðra sem þurfa aðstoð við flutn­ing úr bænum. „Við erum aðeins farin að skoða það.“ 

Vatnaveröld skellir í lás og skrúfar fyrir heita vatnið

„Það verða bara allir að vera rólegir,“ segir Hafdís Alma Karls­dóttir, for­stöðu­kona í Vatna­ver­öld í Reykja­nesbæ í sam­tali við Heim­ild­ina. Dagurinn í Vatna­ver­öld hófst eins og hver annar fimmtu­dagur þrátt fyrir fregnir af eld­gosi í morg­unsárið. Dagurinn tók hins vegar óvænta stefnu þegar heita­vatns­lögnin sem liggur frá Svarts­engi til Fitja í Reykja­nesbæ fór undir hraun.

„Við fengum hring­ingu frá hita­veit­unni rétt um hálf ell­efu í morgun þar sem við vorum beðin um að minnka heita­vatns­notkun. Það var farið strax í það og við hættum að hleypa ofan í stuttu eftir það. Það var engin breyt­ing fyrr en við fengum þetta sím­tal,“ segir Hafdís Alma.

„Við erum bara að þrífa, það er ekk­ert mikið um þetta að segja, við tökum þessu bara rólega og vinnum eftir þeim upp­lýs­ingum sem við höfum hverju sinni,“ segir Hafdís Alma. „Það er bara lokað.