Ráðuneytisstjóri utanríkisráðuneytis Póllands, Piotr Wawrzy, var rekinn á dögunum í kjölfar rannsóknar á meintri spillingu þegar kemur að útgáfu vegabréfsáritana fyrir íbúa utan Evrópusambandsins, sér í lagi frá Asíu en einnig Mið-Austurlöndum og Afríku.
Grunur leikur á að allt að fjögur hundruð þúsund íbúa utan Evrópusambandsins hafi á síðustu þremur árum fengið vegabréfsáritun inn í Pólland eftir að hafa greitt sem nemur andvirði um 700 þúsundum íslenskra króna til að fá vegabréfsáritun. Þeir sem komu frá löndum á borð við Pakistan, Bangladesh og Úsbekistan kunna að hafa þurft að borga enn meir.
Hugmynd að næsta sendiherra á Íslandi
Wawrzyk hafði á sínu borði umsjón með rafrænu kerfi þar sem hægt var að sækja um vegabréfsáritun til Póllands en í gegn um það var að sögn hægt að borga sig fram fyrir röðina með áðurnefndum hætti. Framkvæmdinni á þessu ferli var útvistað til fyrirtækja sem talin eru hafa selt vegabréfsáritanir.
Einn nánasti samstarfsmaður Wawrzyk, hinn 32 ára gamli Jakub Osajda, tengdist einnig gerð kerfisins sem hélt utan um umsóknirnar.
Pólskir miðlar greina frá því að í mars á þessu ári hafi utanríkisráðherra Póllands, Zbigniew Rau, að undirlagi Wawrzyk, þrýst á að Osajda yrði gerður að sendiherra á Íslandi. Ekkert er fjallað um ástæður þess að skipa ætti hann sendiherra á Íslandi frekar en annars staðar.
Ekki náðist tal af Gerard Pokruszyński, núverandi sendiherra Póllands á Íslandi, við vinnslu fréttarinnar en ekki er vitað til þess að hann sé á förum.
Reis hratt til metorða þrátt fyrir reynsluleysi
Hugmyndum um Osajda sem næsta sendiherra var ekki vel tekið hjá forsetaembættinu þar sem Osajda hefði ekki til að bera þá reynslu sem þyrfti til að taka við sem sendiherra. Sama var uppi á teningnum hjá forsætisráðherra. Þeir Wawrzyk og Rau héldu þrýstingnum þó áfram mánuðum saman.
Það er stjórnmálaflokkurinn Lög og réttlæti (PiS) sem fer fyrir núverandi ríkisstjórn Póllands, og honum tilheyra allir þessir menn; líka forsetinn Andrzej Duda.
Osajda reis hratt til metorða þar sem hann starfaði við hlið Wawrzyk í utanríkisráðuneytinu og fór á skömmum tíma frá því að vera aðstoðarmaður ráðuneytisstjórans yfir í að verða yfirmaður skrifstofu utanríkisþjónustunnar. Sú stöðuhækkun olli mörgum undrun vegna reynsluleysis Osajda.
Hafði í hótunum við forsetann
Samkvæmt umfjöllun pólska miðilsins Gazeta hafði Rau utanríkisráðherra í hótunum við Duda forseta um að ef sendiherraskipan Osajda yrði ekki samþykkt þá yrðu ekki fleiri sendiherrar skipaðir í bráð. Í Póllandi, líkt og á Íslandi, er það í höndum utanríkisráðherra að skipa sendiherra en skipanir gjarnan bornar undir aðra ráðamenn í flokki ráðherrans.
Gazeta greinir frá því að Rau hefi treyst mjög á Wawrzyk enda stjórnaði hann ráðuneytinu ekki einn. Saman hafi þeir síðan sett skipanir í sendiherrastöður á frost í minnst tvo mánuði, til að mynda í Kína, Brasilíu og Indlandi, til að reyna að þvinga fram skipan Osajda. Það hafi síðan verið í maímánuði sem þeir gáfu eftir.
Fimm vikur í kosningar
Næstu þingkosningar í Póllandi fara fram þann 15. október, eftir aðeins fimm vikur. Þessar ásakanir um spillingu, og sér í lagi spillingu þegar kemur að flæði fólks utan Evrópusambandsins inn í Pólland, koma því á viðkvæmum tíma fyrir Lög og réttlæti.
Þetta er hægri sinnaður íhaldsflokkur sem hefur lagt mikla áherslu á að stoppa flæði útlendinga inn í landið. Flokkurinn hefur til að mynda viðrað þá hugmynd að halda þjóðaratkvæðagreiðslu, samhliða þingkosningunum, um fólksflutninga inn í Pólland.
Samkvæmt pólskum fjölmiðlum eru einhverjar hugmyndir uppi um að flokkurinn hafi fórnað Wawrzyk til að halda andliti í kosningabaráttunni en þess er víða krafist að Rau utanríkisráðherra víki einnig.
Athugasemdir