Fyrri aukaspurning:

Hvað sýnir myndin hér að ofan?

***

Aðalspurningar:

1.  Hvar er Almannagjá?

2.  Hvaða fjölskylda heldur gjarnan til í Balmoral-kastala?

3.  Hvers konar tónverk er ítalska tónskáldið Giacomo Puccini þekktastur fyrir?

4.  Hvað heitir ameríski leikarinn sem lék aðalhlutverkið í Rocky-myndunum?

5.  Hver er útbreiddasta trjátegundin á Íslandi?

6.  Á Mön-eyju einni, sem telst til Bretlandseyja, fæðast óvenju oft kettir sem eru óvenjulegir að einu leyti, sem sé hvaða leyti?

7.  Í Eyjaálfu eru 11 sjálfstæð ríki. Átta þeirra eru mjög lítil eyríki en hin þrjú eru býsna stór. Ástralía er náttúrlega langstærst en hver eru hin ríkin tvö af þeim stóru? Nefna þarf bæði. 

8.  Í hvaða firði á Íslandi er Hjalteyri?

9.  Einn af þingmönnum Framsóknarflokksins sagði óvænt af sér þingmennsku 2008 eftir að hafa gert klaufaleg mistök við að senda út tölvupóst. Hvað hét hann?

10.  Þann 17. desember 1966 fór fram bálför hálfsjötugs karls í Kaliforníu sem hafði andast tveim dögum áður úr lungnakrabbameini. Eftir bálför karlsins spunnust hins vegar miklar og furðulegar sögur og þjóðsögur um útförina og annað sem laut að dauða hans. Út á hvað gengu þær sögur?

***

Seinni aukaspurning:

Hver er stúlkan á myndinni?  Hún er núna orðin ögn eldri en á myndinni en ekkert mjög samt!

***

Svör við aðalspurningum:

1.  Á Þingvöllum.

2.  Breska konungsfjölskyldan.

3.  Óperur.

4.  Stallone.

5.  Birki.

6.  Rófulausir.

7.  Nýja-Sjáland og Papúa-Nýja Gínea.

8.  Í Eyjafirði.

9.  Bjarni Harðarson.

10.  Hann átti að hafa látið frysta lík sitt í von um endurlífgun og lækningu síðar meir. Þetta var sem sé Walt Disney. En það er ekkert hæft í sögunum.

***

Svör við aukaspurningum:

Efri mynd var tekin meðan kreppan mikla stóð yfir í Bandaríkjunum um og eftir 1930. Til að fá stig þurfiði því að nefna kreppuna miklu og Bandaríkin.

Á neðri myndinni er Sanna Marín núverandi forsætisráðherra Finnlands.