Mogginn, Fréttablaðið og Sýn fá 62 prósent ríkisstyrksins

Árvakur, Sýn og Torg fá hámarks­út­hlutun sam­kvæmt ákvörðun úthlut­un­ar­nefndar mennta- og menn­ing­ar­mála­ráðu­neyt­is­ins um rekstr­ar­stuðn­ing til einka­rek­inna fjöl­miðla. Hver útgáfa fyrir sig fær rúma 81 milljón króna. Samtals fá þrír stærstu fjöl­miðl­arnir 244 millj­ónir króna, sem eru tæp­lega 63 pró­sent af þeim 392 millj­ónum sem úthlutað var í heild­ina.  

Meðal ann­arra útgáfu­fé­laga og fjöl­miðla sem fengu styrk voru Myllu­setur, útgef­andi Við­skipta­blaðs­ins og Frjálsrar versl­unar, sem fékk 26 millj­ónir og Útgáfu­fé­lagið Stundin fær 25 millj­ónir. Aðrir miðar sem fá yfir 10 millj­ónir eru N4, sem fær 19 millj­ónir, Kjarninn, sem fær 14 millj­ónir og Bænda­sam­tök Íslands, sem gefa út Bænda­blaðið, sem fá 12 millj­ónir.

Í til­kynn­ingu frá Fjöl­miðla­nefnd segir að tveimur umsóknum hafi verið hafnað og að tveimur til við­bótar hafi verið vísað frá. Þeim umsóknum sem vísað var frá var skilað eftir að umsókn­ar­frest­ur­inn rann út.

Fær galinn stuðning

Þór­hallur Gunn­ars­son, fram­kvæmda­stjóri miðla hjá Sýn, sem heldur úti Stöð 2, Vísi, Bylgj­unni og nokkrum öðrum útvarps­stöðvum, sagði í við­tali í Bítinu á Bylgj­unni í síð­ustu viku að sér þætti galið að fyr­ir­tæki á borð við Sýn og Árvakur, sem reki stóra fjöl­miðla, njóti sér­staks rík­is­stuðn­ings. Slíkur stuðn­ingur ætti að vera bund­inn við minni miðla, miðla á lands­byggð­inni eða þá sem leggja stund á rann­sókn­ar­blaða­mennsku ein­göngu.

„Það er nátt­úru­lega bara galið að við séum að þiggja pen­inga af rík­inu og séum styrkt af rík­inu. Við erum gríð­ar­lega öfl­ugur fjöl­mið­ill, með fjölda áskrif­enda. Við erum með ótal tæki­færi,“ sagði hann fyrir fjórum dögum síðan. Sýn er sem fyrr segir að fá 81 milljón frá rík­inu nú. 

Undir þetta sjón­ar­mið tók Þórður Snær Júl­í­us­son, rit­stjóri og einn eig­enda Kjarnans. „Bætum umhverfi allra fjöl­miðla með marg­hátt­uðum aðgerðum sem gagn­ast stórum og smáum. Styrkir eru fyrir litla og vax­andi miðla. Þjóðin fær í stað­inn öfl­uga og fjöl­breytta fjöl­miðlaflóru. Allir vinna,“ skrif­aði hann um málið á Twitter.

Kjarninn miðlar fá 14 millj­ónir sam­kvæmt ákvörðun úthlut­un­ar­nefnd­ar­innar. 

Árlegur taprekstur

Einka­reknir fjöl­miðlar fengu styrk í fyrsta sinn á síð­asta ári, þá undir yfir­skini að um væri að ræða aðgerð til að bregð­ast við tekju­tapi sökum COVID-19 far­ald­urs­ins.

Árvakur fékk þá 99,9 millj­ónir króna. Engu að síður tap­aði mið­ill­inn 75 millj­ónum króna. Útgáfu­fé­lagið hefur í raun tapað á hverju ein­asta ári frá því að útgáfan var keypt af nýjum eig­endum eftir hrun, árið 2009. Tapið hefur sam­tals numið 2,5 millj­örðum, sam­kvæmt grein­ingu Kjarnans.  '

Sýn hefur líka verið rekið með tapi. Samkvæmt upp­lýs­ingum um rekstur þess nam tapið á síð­asta ári 405 millj­ónum króna og hefur fyr­ir­tækið verið rekið með tapi það sem af er árinu í ár. 

Ekki liggja fyrir upp­lýs­ingar um rekstur Torgs, útgef­anda Frétta­blaðs­ins, Hring­brautar og DV, á síð­asta ári þar sem félagið hefur ekki skilað árs­reikn­ingi, sam­kvæmt upp­lýs­ingum á vef Skatts­ins. Árið 2019 skil­aði útgáfu­fé­lagið aftur á móti tapi upp á 212 millj­ónir króna. 

Kakan alltaf jafn stór en sneiðarnar ekki

Regl­urnar gera ráð fyrir að fjöl­miðlar geti fengið allt að 25 pró­sent af rekstr­ar­kostn­aði end­ur­greidd­ann en styrkupp­hæðin ræðst þó af fjölda umsókna og umfang þeirra, enda er fyr­ir­framá­kveðin upp­hæð til skipt­anna. Með öðrum orðum lækkar styrk­ur­inn sem hver og einn getur fengið eftir því sem fleiri sækja um. 

Að þessu sinni voru það Árni Vil­hjálms­son hæsta­rétt­ar­lög­maður, Stefán Svav­ars­son end­ur­skoð­andi og Val­gerður Anna Jóhanns­dóttir, lektor við Háskóla Íslands, sem skip­uðu úthlut­un­ar­nefnd­ina. 

Fyr­ir­vari: Útgáfu­fé­lag Stund­ar­innar, sem gefur út Stundina.is, fær 25 millj­ónir króna sam­kvæmt ákvörðun úthlut­un­ar­nefnd­ar­innar.