Sigurður Ingi Jóhannsson, samgöngu- og sveitarstjórnarráðherra, telur að allir eigi að leggja sitt af mörkum í kreppunni sem framundan er. Þetta sagði hann í Kastljósi í kvöld eftir að hann var spurður um stöðu sveitarfélaganna. 

„Það verða allir að leggja sitt af mörkum. Og ég hlustaði nú bara á niðri á þingi fyrir nokkrum dögum og ég fór að velta fyrir mér hvort það ætluðu allir að vera með þessa kröfu á að það væri hægt að sækja endalausa fjármuni til ríkisins, meðan við verðum einmitt öll að leggjast á eitt,“ sagði Sigurður Ingi.

Þá vék hann sérstaklega að bönkunum og lánveitingum þeirra til fyrirtækja.

„Hér voru hagfræðingar frá bönkunum og ég fór að velta fyrir mér: Til hvers eru bankar? Eru þeir ekki til þess að styðja við atvinnulífið og heimilin í landinu? En ekki vera kröfuhafi á ríkið. Því hver er ríkið? Það erum við sjálf.“

Aðspurður hvort hann vildi gera þá kröfu að bankarnir stigu í auknum mæli inn í atburðarásina sagði Sigurður:

„Klárlega. Það var fyrsta aðgerð okkar, og Seðlabankans, að tryggja þeim nægilegt lausafé til þess að þeir gætu gert það. Ég gat ekki heyrt annað hjá yfirstjórn bankanna á þeim tíma en að þeir væru tilbúnir til þess. Við heyrum hins vegar mikið á fólki að það sé ekki að gerast, svo við vonum auðvitað að það sé ekki tónninn, að það eigi að setja allar kröfur á ríkisvaldið, því við verðum öll að takast á við þetta. Og þeir sem eru betur settir en aðrir, þeir verða að þola þær byrðar líka.“

Bjarni Benediktsson var spurður um framkvæmd brúarlána til fyrirtækja á Alþingi í dag. „Nú er í lokafrágangi samkomulag milli Seðlabankans og fjármálafyrirtækjanna um þann enda málsins,“ sagði hann. „Ég get svo sem sagt fyrir mitt leyti að það er óheppilegt að þetta hafi tekið þennan tíma en þó hefur kannski ekki orðið mikið tjón af því.“