Hanna Katrín Friðriksson, þingmaður Viðreisnar, varpaði nýju ljósi á val Sigríðar Andersen á dómurum í Landsrétt, á opnum fundi þingflokks Viðreisnar í gær.
Sigríður hefur verið gagnrýnd harðlega fyrir að fylgja ekki niðurstöðum ópólitískrar hæfisnefndar, heldur ákveða að velja sjálf fjóra umsækjendur á listanum sem ekki þóttu meðal fimmtán hæfustu. Þar á meðal er eiginkona Brynjars Níelssonar, þingmanns Sjálfstæðisflokksins og samflokksmanns hennar, og eiginmaður fyrrverandi samstarfskonu hennar á lögmannsstofu til margra ára.
Á opnum fundi Viðreisnar í gær rökstuddu þingmenn flokksins stuðning sinn við val ráðherra. Þar kom fram, í máli Hönnu Katrínar Friðriksson, þingmanns flokksins, að þingmenn Viðreisnar hefðu haft áhrif á valið.
„Það vorum við sem rákum ráðherra til baka. Við hefðum ekki hleypt fyrri listanum í gegn,“ sagði hún.
Þingmaður taldi valdið ráðherrans
Áður hefur Pawel Bartoszek, þingmaður Viðreisnar, fært rök fyrir því í ræðustóli á Alþingi að þingmenn eigi ekki að koma að vali á dómurum.
„Ef ég vil vísa málum frá er ég að segja ráðherra að ég sé ekki ánægður með hans tillögu. Hvort sem það eru nöfnin eða eitthvað annað í henni. En þar með er ég óneitanlega að hlutast til um hana. Það er bara svo einfalt. Ég hlutast til um þá ákvörðun sem ráðherra tekur. Og ég einfaldlega vil ekki hafa það vald vegna þess að ég ber ekki ábyrgð á þessari ákvörðun. Það er ráðherra sem ber ábyrgð á ákvörðuninni og það er hans að taka hana,“ sagði Pawel í umræðum um málið. Þá vísaði Pawel til fordæma í Danmörku, þar sem ráðherra hafi aldrei valið aðra en þá sem teldust hæfastir. „Ráðherra sem er ábyrgur fyrir ákvörðuninni verður að fá að taka hana. Mér finnst það miklu betri uppsetning á allan hátt. Tekið er fram að það hafi aldrei gerst í sögu Danmerkur að ráðherra hafi einhvern tímann tilnefnt einhvern sem ekki hefur verið metinn hæfastur. “
Segjast hafa hafnað á grundvelli jafnréttis
Þingmenn Viðreisnar greindu frá því á opna fundinum í gær að það hefði verið á grundvelli jafnréttissjónarmiða sem þeir vildu fara fram hjá vali hæfisnefndar, sem hafði valið tíu karlmenn og fimm konur.
Við breytingu Sigríðar á listanum urðu konurnar sjö, en karlarnir átta. Sigríður tók ekki undir það í viðtölum strax eftir ákvörðunina að jafnréttissjónarmið hefðu legið að baki vali hennar, en vísaði síðar til þess að það ætti við. Í viðtölum sagðist hún ekki hafa verið sammála því mati hæfisnefndarinnar að 15 einstaklingar væru „einir sem kæmu til greina“. Hún sagði tilefni til þess að dómarareynslan myndi vega nokkuð mikið í matinu. „Mér fannst vægi dómarareynslu ekki vera nægilegt,“ sagði hún. Hún sagði ákvörðun sína ekki ólögmæta.
Meðal þess sem gerðist við breytinguna var hins vegar að karlmaður, sem var metinn 30. hæfastur af 33 umsækjendum, og minna hæfur en fimm aðrar konur, var valinn meðal topp 15 umsækjenda af ráðherra. Maðurinn, Jón Finnbjörnsson héraðsdómari, er eiginmaður Erlu S. Árnadóttur, eins eigenda og starfsmanna lögmannsstofunnar LEX, þar sem Sigríður starfaði í sjö ár, frá 2007 til 2015. Jón var valinn fram yfir fimm aðrar konur sem taldar voru hæfari en hann.
Að auki var, eins og áður sagði, eiginkona þingmanns Sjálfstæðisflokksins færð upp listann af dómsmálaráðherra úr Sjálfstæðisflokknum og verður væntanlega dómari við Landsrétt, nýtt millidómsstig.
Athugasemdir