Við erum að borga jafn mikið af húsinu og við vorum að borga í leigu í bænum,“ segir tónlistarkonan Unnur Birna Björnsdóttir en hún keypti sér, ásamt Jóhanni Vigni Vilbergssyni, einbýlishús í Hveragerði í sumar. Þeim fannst meira aðlaðandi að eignast einbýlishús á landsbyggðinni en „rottuholu í Reykjavík á uppsprengdu verði,“ eins og þau orða það sjálf. Þegar mygla fannst í leiguíbúðinni þeirra í Reykjavík urðu þau að flytja út í flýti og ákváðu strax að þau vildu frekar kaupa húsnæði en að freista gæfunnar á óöruggum leigumarkaði. „Ef þú ferð inn á einhverja leigusíðu og skrifar að þú getir borgað 130 þúsund krónur á mánuði þá færðu engar niðurstöður. Það kemur kannski upp bekkur á Austurvelli,“ segir Unnur um leigumarkaðinn á höfuðborgarsvæðinu.

Húsið sem Unnur og Jóhann keyptu er 122 fermetrar og því fylgir 1.200 fermetra lóð. Kaupverð er 17,9 milljónir en þau hafa síðan varið um milljón krónum í viðhald. „Auðvitað hefði verið hentugra að kaupa húsnæði á höfuðborgarsvæðinu því við vinnum bæði og erum í skóla í Reykjavík,“ viðurkennir Unnur Birna. „En það var bara ekki hægt. Eins og allir vita eru laun fólks ekki þannig að þú komist auðveldlega í gegnum greiðslumat, en þú átt samt að geta borgað mörghundruð þúsund krónur á mánuði í leigu. Þetta er náttúrulega fáránlegt.“

Þrátt fyrir að þurfa að keyra 45 kíló­metra í vinnu á hverjum morgni segist Unnur ekki finna fyrir auknum kostnaði við bensín. Bíllinn eyði minna í langkeyrslu, bæjarbúar sameinist gjarnan í bíla og þá noti þau hjólið í snatt á milli staða í Hveragerði. „Við eigum okkar gæða­stundir á leiðinni í bæinn,“