Lögfræðingur ASÍ segir að ummæli Katrínar Jakobsdóttur forsætisráðherra um frystingu launa þeirra sem áður heyrðu undir kjararáð séu „bæði röng og villandi“. Ákvörðun stjórnvalda um frystingu launa í stað „leiðréttingar og lækkunar“ muni kosta ríkissjóð 1,3 milljarða króna til ársloka 2021. Þetta kemur fram í tilkynningu frá ASÍ. 

Magnús Norðdahl, lögfræðingur ASÍ, bendir á að minnihluti starfshóps forsætisráðherra sem skipaður hafi verið í ársbyrjun lagði til lækkun launa forseta, ráðherra, þingmenn, ráðuneytisstjóra og skrifstofustjóra með það að markmiði að stuðla að sáttum á vinnumarkaði. Telur hann ljóst að sú leið hefði falið í sér samræmi á borð við það sem Katrín talar um. Leiðin sem varð ofan á leiði hins vegar ekki til slíks samræmis fyrr en árið 2021.

„Í Kastljósi RUV í gær sagði forsætisráðherra að frysting launa þeirra sem áður heyrðu undir Kjararáð kæmi launum þeirra í „ákveðið samræmi“ við almennt launafólk í árslok 2018,“ segir Magnús. „Þessi fullyrðing er bæði röng og villandi.“

Magnús segir illskiljanlegt að Katrín hafi ekki tekið þá ákvörðun að lækka launin. „Ef fallist hefði verið á niðurstöðu minnihlutans hefði það þýtt, að launum æðstu stjórnenda ríkisins yrði strax komið í takt við almennt launafólk og útafkeyrslan hvað þá varðar leiðrétt,“ segir hann. „Laun dómara og lægra settra stjórnenda yrðu hins vegar fryst og það er rétt sem forsætisráðherra sagði í gær að ákveðið samræmi milli þeirra og almenns launafólks næst að meðaltali við lok þessa árs. Það á hins vegar alls ekki við um hana sjálfa, aðra ráðherra, þingmenn, ráðuneytisstjóra og skrifstofustjóra ráðuneytanna.  Það „ákveðna samræmi“ næst ekki fyrr en við lok árs 2021.“

Bendir Magnús á að um talsverðar fjárhæðir séu að ræða hvað varðar muninn á „frystingu“ eða „leiðréttingu og lækkun“ launa þessara aðila. Laun, lífeyrisframlög og annar launakostnaður nemi 1,3 milljörðum króna til ársloka 2021 umfram þá leið sem minnihlutinn lagði til. „Meirihlutinn taldi að þessir hópar hefðu „lögmætar væntingar“ um að fá að njóta þessara greiðslna áfram og það þrátt fyrir þá megin niðurstöðu sína að Kjararáð hafi farið fram úr valdheimildum í úrskurðum sínum árið 2016,“ segir Magnús. „Minnihluti starfshópsins taldi að æðstu stjórnendur ríkisins gætu ekki haft lögmætar væntingar um að ríkið héldi áfram að framkvæma ólögmætar og afturkallanlegar ákvarðanir. Ummæli forsætisráðherra í Kastljósi RUV í gær voru því bæði efnislega röng og afar villandi þegar heildarmyndin er skoðuð.“