Ung kona var rekin úr umræðuhópi um hestamennsku á Facebook eftir að hún hvatti til þess að fólki væru greidd laun í samræmi við lög og kjarasamninga. Henni var tjáð að ábendingar um að hrossaræktarbú yrðu að fylgja íslenskum lögum og greiða erlendum starfsmönnum laun fyrir vinnu sína ættu ekki heima innan hópsins. 

„Ég skráði hjá mér þrjá aðila sem þurfa endalaust að benda á að það sé ólöglegt að vinna á Íslandi án kennitölu og launa,“ segir í skilaboðum sem Sjöfn Sæmundsdóttir, stjórnandi hópsins, sendi konunni. „Mér finnst það ekki koma neinum við ef fólk vill öðlast reynslu og vinna fyrir fæði og húsnæði. Fæði og húsnæði kostar líka peninga. Þetta er ástæðan fyrir því að þú varst útilokuð frá hópnum.“ [Skilaboðin voru rituð á ensku, þýðing er blaðamanns.]

Þegar Stundin hafði samband við Sjöfn sagði hún að sú regla gilti innan hópsins að ekki væri rætt um launamál, enda sé þar um að ræða samningsatriði milli aðila en ekki eitthvað sem komi öllum í hópnum við. Facebook-hópurinn heitir „Work with ICELANDIC horses in Iceland“ og er vettvangur sem leiðir saman annars vegar íslensk hrossaræktarbú og hestaleigur sem vantar starfskrafta og hins vegar erlent hestafólk í leit að tækifærum hérlendis. Hátt í tvö þúsund manns tilheyra hópnum. 

„Ég er sjálf menntaður reiðkennari, það er ekki til stéttafélag fyrir okkur, svo ég veit alveg hvað launabarátta er. Að sjálfsögðu á þetta að vera launað starf eins og hvað annað, en svo er eðlilegt að fólk fái tækifæri til að öðlast reynslu til skamms tíma. Ef krakkar á Norðurlöndunum vilja fá þessa reynslu þar, þá er það ekki hægt, þau fá bara að moka skít. Tækifærin hér á Íslandi eru ekki í boði úti.“