„Það er verið að reyna að kveikja hatursbál sem er mjög hættulegt,“ segir Sveinn Kjartansson matreiðslumeistari, sem er verulega uggandi yfir umræðunni að undanförnu, sem hann segir á algerum villigötum og minni um margt á orðræðuna sem hann og annað hinsegin fólk á hans aldri hafi þurft að þola á sínum yngri árum. „Umræðan rífur upp gömul sár hjá mér. Mér finnst hún ógnvænleg og óska þess heitt og innilega að ungt fólk þurfi ekki að ganga í gegnum það sem mín kynslóð þurfti að þola.“

Sveinn er fæddur 1963 og stendur því á sextugu. Fordómarnir í samfélaginu voru skelfilegir þegar hann var ungur maður á níunda áratug síðustu aldar. „Fordómarnir voru gífurlegir og ekki síst hjá stofnunum, eins og til dæmis kirkjunni og lögreglunni, en þeim hefur sem betur fer verið útrýmt þaðan,“ segir Sveinn.