Svartþröstur

Svartþröstur eftir David Harrower fjallar um miðaldra skrifstofumann sem fær heimsókn frá ungri konu. Núna eru bæði vissulega orðin fullorðin, en þegar hann var á hennar aldri – um 27 ára, var hann í sambandi við tólf ára stelpu – sem nú stendur fyrir framan hann, orðin fullorðin kona, og er komin til að gera upp fortíð barnsins sem hún var. En fortíðin markaði þau og þótt bæði hafi unnið einhverja sjálfsvinnu og maðurinn afplánað fangelsisdóm eiga þau enn margt óuppgert. Málið ruglar þau líka enn í ríminu – hin fullorðna kona áttar sig á að þetta var misnotkun, en um leið býr enn í henni tólf ára stelpan sem var ástfangin af þessum kvalara sínum.

David Harrower er eitt fremsta leikskáld Skota síðustu áratugina, en það er Vignir Rafn Valþórsson sem þýddi verkið og leikstýrir því og þau Ásthildur Úa Sigurðardóttir og Valur Freyr Einarsson fara með aðalhlutverkin. Verkið var kvikmyndað fyrir nokkrum árum undir titlinum Una, með þeim Rooney Mara og Ben Mendelsohn í aðalhlutverkum. Margir Íslendingar kannast svo vel við leikstjóra myndarinnar, Benedict Andrews, sem leikstýrt hefur fjölda verka hér á landi og nú síðast Ellen B og Ex í Þjóðleikhúsinu.

Jón Ólafs – afmælistónleikar

Jón Ólafsson varð nýlega sextugur og heldur upp á stórafmælið með tónleikum í Hörpu, þar sem fjöldi tónlistarmanna samfagnar honum á sviði Eldborgar.  Þar má nefna Nýdönsk, Pál Óskar, Valdimar, Möggu Stínu, Hildi Völu, KK og Possibillies.

Þeir sem hafa fylgst með íslenskri tónlist undanfarna áratugi þekkja Jón vitaskuld úr hljómsveitum á borð við Nýdönsk, Bítlavinafélagið og Sálina hans Jóns míns, fyrir utan sólóferil og fjölbreyttan feril í fjölmiðlum og sem upptökustjóri og hjálparkokkur ótal tónlistarmanna.

„Það fór auðvitað margt í gegnum hausinn á manni þegar þessir tónleikar voru komnir á dagskrána. Hverjir eiga að spila?  Hverjir eiga að syngja?  Hvaða lög skal velja?“ segir Jón um undirbúninginn.

Samverkamennirnir eru svo blanda af gömlum kunningjum og nýjum samstarfsmönnum.

„Hljóðfæraleikararnir eiga það sameiginlegt að hafa verið traustir samstarfsmenn um árabil og geta bæði spilað og raddað eins og enginn sé morgundagurinn.  Hvað varðar söngvarana ákvað ég að fá að mestu leyti inn fólk sem hefur ekki sungið lög eftir mig áður, svona til að gæða þau nýju lífi í stað þess að fara bara í nostalgíuna. Svo syng ég eitthvað sjálfur því þetta er nú auðvitað hinn fullkomna sjálfshátíð!“

Viku síðar verða svo aðeins minni og lágstemmdari afmælistónleikar á Græna hattinum, þar sem Daníel Ágúst verður sérstakur gestur, en þeir tónleikar fara fram laugardaginn 29. apríl.

Barnamenningarhátíð 

Barnamenningarhátíð í Reykavík er haldin í apríl ár hvert, en í kjölfarið hafa ófá sveitarfélög fylgt í kjölfarið að eigin frumkvæði og nú er sömuleiðis barnamenningarhátíð í Garðabæ og í Kópavogi um svipað leyti og úti á landi er útlit fyrir slíkar hátíðir seinna á árinu.

Leiðarljós hátíðarinnar í Reykjavík eru gæði, margbreytileiki, jafnræði og gott aðgengi að menningu barna, með börnum og fyrir börn. Vettvangur hátíðarinnar er borgin öll og fara fjölbreyttir viðburðir fram í grunnskólum, leikskólum, frístundamiðstöðvum, menningarstofnunum, listaskólum og víðar. Barnamenningarhátíðin rúmar allar listgreinar fyrir börn og fjölskyldur þeirra og frítt er inn á alla viðburði.

Meginþema hátíðarinnar í ár er friður, en það voru þær Vigdís Hafliðadóttir og Ragnhildur Veigarsdóttir úr hljómsveitinni Flott sem sömdu lag hátíðarinnar í samstarfi við börn í 4. bekkjum í Reykjavík, sem veltu fyrir sér spurningum um frið, allt frá innri friði hvers og eins til heimsfriðar.

Ólafur Kram / útgáfutónleikar – EKKI TREYSTA FISKUNUM

Ólátabelgirnir í Ólafi Kram unnu Músíktilraunir fyrir tveimur árum og munu nú slá til heljarinnar tónlistarveislu á Húrra til að fagna útgáfu fyrstu breiðskífu sinnar, EKKI TREYSTA FISKUNUM. 

Þeim til halds og trausts verður frýnilegt föruneyti af listamönnum sem eiga það öll sameiginlegt að Ólafur Kram elskar allt sem þau gera, enda treysta þau heldur ekki fiskunum. Því er mælt með að fólk reimi á sig dansskóna og helli tvöföldum í augntóftina, að sögn Kramverja, sem mæta ásamt þeim Kusk & Óvita, Rakel og Sucks to be You, Nigel.

Fyrir þá sem lesa nöfn bara í hefðbundinni röð er svo rétt að geta þess að Ólafur Kram afturábak er Mark Ruffalo, sá ljúfi eðalleikari og græni risi, sérlegur verndari sveitarinnar. En hvers vegna er ekki hægt að treysta þessum fiskum?

„Stefnan með tónleikunum er að vekja athygli á tillögu þeirra til Alþingis er kemur að fiskum á okkar guðsvolaða skeri,“ segir trommarinn Sævar Andri.

„Það sem Ólafur Kram biður okkar ástkæru landsmenn um er að leyfa huganum aðeins að reika og rissa upp mynd af þessari paradís: Heimur þar sem börn okkar geta ráfað um göturnar án nokkurs ótta við það að á hverju götuhorni gæti leynst marhnútur í ljósblárri skyrtu með það markmið að selja þeim drauminn um frjálsan markað. Kobbi Kló þyrfti ekki að lifa í ótta við að 12 ára vandræðagemsi uppnefni hann þorskhaus og hann þurfi þar með ekki að greiða tugi þúsunda fyrir sálfræðitíma, sem ríkið hefur ekki tök á að niðurgreiða vegna stuðnings við sjávarútgerðarfélög landsins. Þetta og svo margt fleira gæti orðið okkar veruleiki ef við tökum ekki af skarið og dæmum þessa drýsla sjávarins í útlegð,“ segir trymbillinn og ítrekar að lokum enn og aftur: „Ekki treysta fiskunum!“

26 Lukas Graham – The Pink Tour

Danska sveitin Lukas Graham verður með stórtónleika í Hörpu í næstu viku. Sveitin ávann sér ágætis frægð með heimatilbúnum Youtube-myndböndum við lög á borð við Drunk in the Morning, en skaust svo rækilega upp á stjörnuhimininn árið 2016 með laginu 7 Years, sem sló rækilega í gegn. Nú er þeirra þriðja plata, Pink, nýkomin út og hefur gengið prýðilega til þessa og fyrsti smellurinn þar er lagið I Wish You Were Here, þar sem Khalid er sveitinni til halds og trausts. Platan heitir að vísu ekki formlega Pink, en hún er svo áberandi bleik að hún er aldrei kölluð neitt annað.

Forsprakki sveitarinnar ber sama fornafn, hann Lukas Forchhammer, sem syngur og spilar á ótal hljóðfæri, en var áður barnastjarna í dönsku sjónvarpi. Rétt er svo að taka fram að þetta eru standandi tónleikar.

Mynd: Prins póló

Hátíð hirðarinnar: Afmælistónleikar Prins Póló / AUKATÓNLEIKAR

Hátíð hirðarinnar blæs til tónleika í tilefni af afmæli Prins Póló. Fyrri tónleikarnir fara fram þann 26. apríl, en þar sem miðarnir voru fljótir að rjúka út er sömuleiðis blásið til aukatónleika daginn eftir, 27. apríl. Eins og gengur komast ekki allir listamennirnir bæði kvöldin, en Hirðin er stór og á seinni tónleikana bætast við þau Mugison, Lay Low, Sigríður Thorlacius og Ómar Guðjónsson, en það er leikhópurinn Kriðpleir sem sér um að kynna.

Allur ágóði af tónleikunum rennur í nýstofnaðan minningarsjóð Svavars Péturs Eysteinssonar, sem einnig var þekktur sem Prins Póló, og útdeilt verður úr sjóðnum árlega til skapandi fólks með góðar hugmyndir. Tónlistarfólkið sem fram kemur tengdist Prinsinum góða með einum eða öðrum hætti; sveitir sem hann var í og tónlistarfólk sem hann starfaði með eða vakti aðdáun hans, en auk áðurnefndra munum við geta hlustað á Benna Hemm Hemm, Borko BSÍ, Dr. Gunna, FM Belfast, Jónas Sigurðsson, Moses Hightower, Múldýrið, Múm, Músíkvat, Skakkamanage og Valdimar.

En hver er þessi hirð? „Þetta kallaði Svavar alla sem hafa unnið með prinsinum eða sótt tónleika eða verið í hljómsveit með honum, þeir voru hirðin. Enda gera prinsar ekkert einir,“ segir Berglind Häsler, ekkja Svavars, og bætir við: „Við sem vorum náin honum höfum alltaf upplifað okkur sem hluta af hirðinni.“

Það er hins vegar ekki langt síðan Prinsinn féll frá, var ekkert erfitt að gera þetta svona skömmu eftir andlátið? „Hugmyndin kom upp um áramótin og þá hugsaði ég, án þess að segja það upphátt við neinn, er þetta ekki aðeins of snemmt?“ segir Berglind, en henni snerist svo fljótt hugur.

„Því ég fann bara í undirbúningnum fyrir jarðarförina hvað það var heilandi að vera hluti af þessari heild. Það er svo gaman þegar við komum saman og rifjum upp. Þetta er mjög heilandi ferli, að halda minningunni á lofti, við erum að halda áfram að hafa gaman. Svo koma oft tilfinningarík augnablik inn á milli og maður tárast og kemst við og það er bara allt í lagi. Það er bara hluti af ferlinu. Það er bara rosalega gott að finna samtakamáttinn í hirðinni, það hjálpar.“

Berglind tekur fram að allir þurfi að taka sitt sorgarferli á sínum hraða og á sinn hátt, en mælir þó fyrst og fremst með einu. „Ég mæli með að maður hangi sem mest með vinum sínum eftir svona. Sem og auðvitað fjölskyldu.“ Svo bætir hún við að lokum: „Ég hef séð hljómsveitirnar margar að æfa og taka cover-lög og þetta eru svo geggjuð bönd og ég held þetta verði algjörlega ógleymanlegt kvöld. Þannig að við erum mjög spennt.“