„Fyrir austan hið teningsmyndaða Hagafjall fórum við framhjá Haga, einni hinni bestu bújörð á Íslandi. Um fegurð og landrými og frjósemi lands bera fáar jarðir af Haga. Hér hefði jafnvel útlendur maður getað notið eins konar jarðneskrar paradísar,“ svona lýsti Ebenezer Henderson, skoskur klerkur, kirkjustaðnum Haga á Barðaströnd árið 1815. Ebenezer, sem var víðförull maður, kom við í Haga og heillaðist augljóslega af þeirri „jarðnesku paradís“ á tveggja ára ferðalagi sínu um Ísland.

Ríflega tvö hundruð árum síðar, í lok maí árið 2022, eru aftur mættir gestir í Haga. Fulltrúar veraldlegs og geistlegs valds, í stórum bílaflota, aka upp heimreiðina stuttu eftir mjaltir, klukkan rúmlega níu að morgni. Svo fjölmennt lögreglulið hefur sjaldan eða aldrei sést samankomið á Barðaströnd.

Það er íslenskt vor; glennisól, en hiti helst innandyra – eða í skjóli frá hafgolunni, þá utan skugga.

Á landnámsjörðinni Haga reka þau …