Hart var deilt um áherslur í húsnæðismálum og samgöngumálum í kappræðum Stundarinnar fyrir borgarstjórnarkosningarnar, sem sjá má hér.
Í umræðunum drógust upp átakalínur á milli fulltrúa meirihlutans og minnihlutans í tveimur lykilmálum: Húsnæðismálum og samgöngumálum. Ein stærsta spurningin virðist snúast um hvort Framsóknarflokkurinn, sem hefur fengið vaxandi fylgi í könnunum, halli sér til hægri eða vinstri, en Einar Þorsteinsson, oddviti flokksins, svaraði spurningu þess efnis í kappræðunum.
Alvarleg húsnæðiskrísa
Dóra Björt Guðjónsdóttir, oddviti Pírata, kannaðist í upphafi við „alvarlega húsnæðiskrísu“, en taldi hana ekki „einhliða á ábyrgð meirihlutans í Reykjavík“. Síðar gagnrýndi hún harkalega fulltrúa minnihlutans í Framsóknarflokki, Miðflokki, Flokki fólksins og Sjálfstæðisflokknum, fyrir að kenna meirihlutanum um lóðaskort. „Þau koma hérna og halda því fram að þetta sé allt á okkar ábyrgð, þegar sérfræðingar hafa sagt, að það er nægt lóðaframboð ... Það er eins og þetta fólk kunni ekki að skammast sín,“ sagði hún.
Dagur B. Eggertsson borgarstjóri og oddviti Samfylkingarinnar kvartaði undan því að Framsóknarflokkurinn vissi ekki í hvorn fótinn ætti að stíga og nefndi sérstaklega húsnæðis- og samgöngumál. „Það er eins og Framsókn sé svolítið óljós í framsetningu og tali inn í alla hópa,“ sagði hann.
„Það þarf að þétta, og það þarf líka að dreifa,“ svaraði Einar Þorsteinsson, oddviti Framsóknar.
Þvinguð úr bílnum
Ómar Már Jónsson, oddviti Miðflokksins, skar sig úr í umræðu um skipulagsmál. Hann sagði frá reynslu sinni af umferðinni í Reykjavík og kvartaði undan áherslum um að „þvinga fólk“.
„Við erum bílaþjóð og ég hef átt samtöl við gríðarlega marga. Ég er ekki að finna þennan stuðning við að fólk sé sátt við það að fólk sé þvingað úr bílunum sínum,“ sagði Ómar.
Félagsleg uppbygging
Allir frambjóðendur könnuðust við vanda í húsnæðismálum, þótt mat á orsökum hans innan eða utan sveitarfélags skiptist eftir línum meirihluta og minnihluta.
Hildur Björnsdóttir, oddviti Sjálfstæðisflokksins, taldi skorta að skipuleggja svæði fyrir uppbyggingu. „Bleiki fíllinn í herberginu í þessari umræðu er auðvitað bara framboðshliðin,“ sagði Hildur. „Það vantar land. Og við þurfum að skipuleggja land.“ Hún lagðist ekki gegn Borgarlínu, en kvað spurningu um skilgreiningu á henni þar sem fólk talaði um mismunandi útfærslu.
Þórdís Lóa Þórhallsdóttir, oddviti Viðreisnar, skar sig úr í meirihlutasamstarfinu með því að tala fyrir markaðslausn á leigumarkaði. Dóra Björt í Pírötum setti ábyrgðina á hugsanlegu leiguþaki á herðar Alþingis.
Sanna Magdalena Mörtudóttir, oddviti Sósíalistaflokksins, vildi að Félagsbústaðir færu í stórfellda uppbyggingu á húsnæði fyrir fólk, ekki eingöngu þá tekjulægstu, enda væri eiginfjárhlutfall gott.
„Félagsbústaðir geta nýtt þessa sterku stöðu til þess að fara í uppbyggingu og síðan nýta stöðuna til að byggja fyrir fólk í neyð, í þörf og líka að útvíkka hvað við eigum við með félagslegu leiguhúsnæði. Eins og þetta er í dag þarftu að vera í viðkvæmri stöðu félagslega og fjárhagslega,“ segir Sanna. „Þetta eru náttúrulega leigjendur að greiða tekjur, þannig að það er ekki áhætta sem er fólgin í þessu,“ bætti hún við.
Sanna lagði einnig áherslu á góðar almenningssamgöngur og féll þannig að hugmyndum meirihlutans.
Líf Magneudóttir, oddviti Vinstri grænna, lagði sömuleiðis áherslu á opinbera uppbyggingu. „Við erum að leggja aftur fram í þessum kosningum hugmyndafræði verkamannabústaða,“ sagði Líf.
Hverjir geta unnið saman?
Einar Þorsteinsson kvartaði undan því að framferði borgarfulltrúa drægi úr trausti á borgarstjórn, sem hefði mælst lægst allra stofnana í traustmælingu Gallups. „Hér er ágæt kona sem ullar á borgarstjórnarfundi. Þetta dregur úr virðingu borgarstjórnar,“ og vísaði þar á Líf Magneudóttur, oddvita Vinstri grænna.
Dagur benti á að borgarstjórn nýtur meira trausts hjá Reykvíkingum heldur en Alþingi. Að vantraustið lægi helst úti á landi og í nágrannasveitarfélögum.
Einar, sem hefur notið góðs gengis í könnunum, var spurður í kappræðunum hvort hann vildi ganga til liðs við núverandi meirihluta. „Ef menn vilja breytingar í borginni, þá þurfa þeir að kjósa Framsókn,“ sagði hann meðal annars.
„Fólk sér ekki mikinn mun á stefnu Framsóknarflokksins og meirihlutans,“ sagði Hildur Björnsdóttir, oddviti Sjálfstæðisflokksins.
Spurningin um næsta meirihlutasamstarf í Reykjavík virðist því snúast að miklu leyti um hvort Samfylkingin eða Sjálfstæðisflokkur verði í meirihluta.
„Ef þessi meirihluti heldur finnst mér bara vera kurteisi að tala saman,“ sagði Þórdís Lóa hjá Viðreisn, en kvaðst ganga óbundin til kosninga.
Eftir að Einar og Hildur hvöttu til breytinga í borgarstjórn sagði Líf að þau væru breytingaraflið. „Við erum breytingin,“ sagði Dóra Björt, oddviti Pírata.
Kolbrún Baldursdóttir, oddviti Flokks fólksins, sagðist vera til í að vinna með öllum – ef þeir ætluðu að taka á biðlistum barna, öryrkja, aldraðra og fatlaðs fólks. Kolbrún sagði að til væru fjölskyldur í borginni sem væru að lepja dauðann úr skel. „Við viljum frítt í frístundina, fríar skólamáltíðir,“ segir Kolbrún og segir að bregðast verði við vandanum.
Þegar talið snérist að Borgarlínu sló hún aftur á sama streng: „Við í Flokki Fólksins sjáum ofsjónum yfir þessum tölum á sama tíma og vantar peninga til að stytta biðlista eftir greiningum og talmeinakennslu.“ Hún sagðist hafa áhyggjur af því að þegar Borgarlínan komi þá verði tæknikerfið orðið úrelt. Hún vill að strætó verði gjaldfrjáls og leiðum fjölgað.
Borgarstjórnarkosningar 2022
Einar Þorsteinsson er næsti borgarstjóri Reykjavíkur
Meirihlutaviðræður hafnar í borginni: „Það er ekki hægt að telja upp í tólf með Sjálfstæðisflokki“
Jón Trausti Reynisson
Þetta er það sem Einar getur gert
Pálminn úr höndum Framsóknar?
Einar Þorsteinsson
Framsókn er lykillinn að breytingum í borginni
Athugasemdir (1)