***
Þessi þraut er öll helguð Bandaríkjunum í tilefni af forsetakosningunum þar. Og vegna þeirra eru aðalspurningarnar reyndar 11, ekki 10, eins og venjulega.
Fyrri aukaspurningin snýst hins vegar um myndina hér að ofan.
Hvaða bandaríska borg er þetta?
***
Aðalspurningar:
1. Hversu margir eru Bandaríkjamenn? Hér má muna fimm milljónum til eða frá?
2. Hvað er stærst af hinum 50 ríkjum Bandaríkjanna?
3. En minnst?
4. Hvað heitir fjölmennasta borgin í ríkinu Texas?
5. Hver hefur lengst allra gegnt embætti forseta Bandaríkjanna?
6. En hver er eini forsetinn, sem hefur fallið í kosningum en síðan náð aftur kjöri seinna?
7. Til hvaða stórborgar telst Staten eyja?
8. Bandaríska skáldkonan Louise Glück fékk Nóbelsverðlaun í bókmenntum á dögunum. Áður höfðu 11 Bandaríkjamenn fengið þessi verðlaun. Nefnið að minnsta kosti þrjá þeirra.
9. Bandaríkjaforsetinn er kjörinn af sérstakri kjörmannasamkundu, eins og kunnugt er, en ríkin 50 kjósa hvert um sig svo og svo marga fulltrúa í þá samkundu. Til Bandaríkjanna teljast ýmis svæði hingað og þangað um heiminn, en fyrir utan hin venjulegu 50 ríki, þá er aðeins eitt svæði talið verðugt þess að fá að kjósa nokkra kjörmenn í samkunduna. Hvaða svæði er það?
10. Hvað heitir heitasti staðurinn í Bandaríkjunum? – sem er raunar jafnframt einn heitasti og þurrasti staður í heimi.
11. Hver vinnur forsetakosningarnar í Bandaríkjunum á morgun?
***
Seinni aukaspurning:
Hver er þessi kona?
***
Svör við aðalspurningum:
1. Í fyrra töldust Bandaríkjamenn vera rúmlega 328 milljónir. Rétt telst vera allt frá 323 milljónum til 334 milljóna.
2. Alaska.
3. Rhode Island.
4. Houston.
5. Franklin D. Roosevelt.
6. Grover Cleveland.
7. New York.
8. Verðlaunahafarnir 11 á undan Glück eru: Sinclair Lewis, Eugene O'Neill, Pearl S. Buck, William Faulkner, Ernst Hemingway, John Steinbeck, Saul Bellow, Isaac Bashevis Singer, Joseph Brodsky, Toni Morrison og Bob Dylan.
9. Höfuðborgin Washington í Columbia-hverfi. Hún telst ekki hluti af neinu ríkjanna 50.
10. Dauðadalur, Death Valley, í Kaliforníu. Þið þurfið reyndar ekki að vita um ríkið þar sem þessi dalur leynist, nafnið á honum sjálfum er nóg.
11. Þið verðið að bíða fram á miðvikudag með að komast að því hvort þið hafið rétt fyrir ykkur hér eða ekki.
***
Svör við aukaspurningum:
Borgin er Chicago.
Konan var Rosa Parks, sem fræg varð í mannréttindabaráttu svartra íbúa í Bandaríkjunum eftir að hún neitaði ung að árum að standa upp fyrir hvítum farþega í strætisvagni.
***
Spurningaþrautin
Fyrri grein
189. spurningaþraut: Kássa, ástarstjarna, víðáttumikil ríki, síðasta símaskráin
Næsta grein
Athugasemdir