Tveir íhaldsflokkar í Danmörku vilja neita dönskum innflytjendum um ríkisborgararétt vilji þeir ekki taka í hönd á öðrum Dönum. Flokkarnir búast ekki við andstöðu frá ríkisstjórninni í þessu máli og búast við að skilyrðinu verði framfylgt á næstunni. Þetta kemur fram í frétt frá Danska ríkisútvarpinu.
Í fréttinni er vikið að nýjum reglum sem danska ríkisstjórnin innleiddi fyrr í sumar um skilyrði fyrir dönskum ríkisborgararétt. Samkvæmt þeim skilyrðum þarf hver umsækjandi að taka þátt í sérstakri athöfn í sínu umdæmi og skuldbinda sig til að hafa dönsk gildi í heiðri. Samkvæmt Danska þjóðarflokknum og Íhaldsflokknum í Danmörku mun athöfnin einnig innihalda handaband við sýslumann umdæmisins.
„Maður tekur í höndina í Danmörku“
Samkvæmt Martin Henriksen, talsmanni útlendingamála Danska þjóðarflokksins, reyndu flokkarnir að gera handabandið að formlegu skilyrði fyrir ríkisborgararétt, en samið hafi verið um að umsækjendur skuli sýna almenna háttvísi á athöfninni. „Og ég reikna náttúrulega með að ríkisstjórnin og Sósíaldemókratarnir muni styðja Danska þjóðarflokkinn þegar reglurnar verða teknar í gildi,“ segir Martin.
Naser Kader, talsmaður útlendingamála Íhaldsflokksins tekur undir málflutning Martins og segist enn fremur ekki búast við neinni andstöðu við eftirfarandi skilyrði. „Maður á að taka við öllum pakkanum, og pakkinn inniheldur athöfn þar sem maður lýsir yfir tryggð og tekur í höndina á öðrum. Maður tekur í höndina í Danmörku,“ bætir Naser við.
Hvers vegna tekur fólk ekki í hendur?
Samkvæmt danska blaðinu Politiken er óþarfa snerting einstaklinga af gagnstæðu kyni utan hjónabands litin hornauga í íslam. Margir múslimar telja þann sið sýna litla viðringu, hógværð og heiður og kjósa því frekar að sleppa honum. Íslamski rithöfundurinn Aminah Tønnsen segir tregðu við að taka í höndina hins vegar ekki snúast um kynjafordóma eða virðingarleysi gagnvart þeim sem eru ekki múslimar.
Handabönd milli ókunnugra eru ekki einungis litin hornauga í íslam, en þau eru til dæmis bönnuð meðal strangtrúaðra gyðinga. Í öðrum Asíulöndum eru handabönd einnig ekki sérstaklega viðurkennd, sérstaklega ekki meðal fólks af gagnstæðu kyni. Þess í stað heilsast gjarnan fólk með því að hneigja sig. Á síðustu áratugum hafa handaböndin þó rutt sér til rúms meðal viðskiptamanna í Asíu eftir aukin samskipti við Vesturlandabúa, en á öðrum stöðum bera handabönd vott um virðingarleysi.
Fréttastofa BBC greindi frá því í gær að múslímsku pari hefði verið neitað um ríkisborgararétt í Sviss eftir að þau vildu ekki taka í höndina á embættismönnum þar í landi á meðan á viðtali þeirra stóð. Pierre-Antoine Hilbrand, meðlimur nefndarinnar sem tók viðtal við parið, sagði svissnesku stjórnarskrána tryggja rétt milli karla og kvenna og ríkja yfir „fordómum.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.













































Athugasemdir