Fréttir kosningar2022

Sjáið það sem hæst bar í síðustu kappræðum oddvitanna

13. maí 2022 · 20:00

Birtist upphaflega á Kjarnanum fyrir 5 árum.

Oddvitar framboðanna ellefu sem bjóða fram til borgarstjórnar í Reykjavík mættust til síðustu kappræðna fyrir kosningar á RÚV í kvöld. Ritstjórn Kjarnans fylgdist með í beinni.

Lýsingu lokið Nýjasta færsla kl. 22:32

22:32 13. maí

Takk fyrir samfylgdina í kvöld – Lokaspá birtist í fyrramálið

Oddvitarnir fengu að lokum 30 sekúndur hver til að sannfæra kjósendur. Hver og einn horfði beint í myndavélina.

Gunnar sagði Reykjavík, bestu borgina vera eina framboðið sem vinnur að því að starfa beint fyrir Reykvíkinga.

Sanna sagði að nauðsynlegt sé að útrýma óréttlætinu sem hefur verið ríkjandi í mörg ár.

Kolbrún sagði Flokk fólksins kunna að hlusta og að fólk geti treyst Flokki fólksins.

Þórdís Lóa fullyrti að Viðreisn væri búin að uppfylla 91 prósent af kosningaloforðunum frá síðustu kosningum.

Einar sagði húsnæðismál vera velferðarmál og vill leggja niður vopnin í borgarstjórn.

Hildur sagði valið vera skýrt á morgun: Sjálfstæðisflokkinn eða meira af þessu sama.

Dagur sagði borgina standa á krossgötum, meðal annars í loftslagsmálum, og hvatti hann alla til að mæta á kjörstað.

Ómar sagðist ætla að vinna fyrir kjósendur af heilindum og ætla að tryggja að flugvöllurinn verði áfram í Vatnsmýrinni.

Líf sagði að tryggja þurfi að flokkur verði í borginni sem mun stemma stigu fyrir markaði sem virki ekki.

Jóhannes sagði Ábyrga framtíð vera með nýjar lausnir og ef að fólk vilji sjá breytingar verði það að kjósa eitthvað nýtt.

Dóra Björt sagði Pírata stunda heiðarleg stjórnmál og sagði kjósendur geta treyst Pírötum.

Kjarninn þakkar fyrir samfylgdina í kvöld. Í fyrramálið, að morgni kjördags, birtist lokaspá kosningaspár Kjarnans og Baldurs Héðinssonar sem byggir á vegnum niðurstöðum allra nýjustu fyrirliggjandi skoðanakannana. Þar er meðal annars hægt að sjá hvaða líkur borgarfulltrúar hafa á að ná inn sæti í borgarstjórn.

22:31 13. maí

60 milljarða „gatið“ í samgöngusáttmálanum er á borði ríkisstjórnarinnar

Í umræðum um skipulagsmál undir lok kappræðnanna áttu sér stað nokkuð heitar umræður um fjármögnun Samgöngusáttmála höfuðborgarsvæðisins, sem undirritaður var a millli ríkis og sveitarfélaga á höfuðborgarsvæðinu árið 2019.

Hildur Björnsdóttir nefndi að enn hefði ekki verið útskýrt hvernig ætti að fylla upp í það 60 milljarða „gat“ sem er í fjármögnuninni, en þegar hefur verið ákveðið að ríkið leggi til 45 milljarða og sveitarfélögin 15 milljarða. Hitt á að taka inn með „sérstakri fjármögnun“.

Samgöngusáttmálinn felur í sér 120 milljarða fjárfestingu á fram til ársins 2034 samgönguinnviðum höfuðborgarsvæðisins. Nánar tiltekið fara 52,2 milljarðar í stofnvegi, 49,6 milljarðar í innviði Borgarlínu og almenningssamgöngur, 8,2 milljarðar í göngu- og hjólastíga, göngubrýr og undirgöng og 7,2 milljarðar í bætta umferðarstýringu og sértækar öryggisaðgerðir.

Ráðuneyti velta fyrir sér umferðargjöldum

Lítið hefur heyrst um hvernig eigi að stoppa í þetta gat, en ljóst er að það er í höndum ríkisins að taka ákvörðun um það. Eins og Kjarninn sagði frá í febrúar er meðal annars verið að velta fyrir sér flýti- og umferðargjöldum á höfuðborgarsvæðinu, en engar ákvarðanir liggja þó fyrir.

Betri samgöngur ohf. hafa sagt að flýti- og umferðargjöld geti verið „góður kostur til að ná settum markmiðum Samgöngusáttmálans“ og að það ættu ekki að vera tæknilegar hindranir við innleiðingu þeirra á höfuðborgarsvæðinu.

En ákvörðunin liggur hjá stjórnvöldum, sem enn hafa enga ákvörðun tekið, samkvæmt svörum sem Kjarninn fékk frá fjármála- og efnahagsráðuneytinu í febrúar. Setja þarf ný lög frá Alþingi svo heimilt verði að rukka umferðargjöld á Íslandi.

22:12 13. maí

Twitter elskar Gunnar hjá Bestu borginni

Einn frambjóðandi hefur átt sviðið á Twitter, það er Gunnar H. Gunnarsson oddviti Reykjavík, bestu borgarinnar. Ætli hann mæti á jarðýtunni í Vatnsmýri eftir kosningar?

22:07 13. maí

„Má heita gullvagn, mér er sama“ – Einar kemur Degi til varnar

Eru ekki hágæða almennings samgöngur, líkt og Sjálfstæðisflokkurinn er með á sinni stefnuskrá, ekki bara annað nafn yfir Borgarlínu?

Þessari spurningu var beint til Hildar Björnsdóttur, oddvita flokksins. „Ja, borgarlína eru auðvitað samgöngukerfi.“ Hún segir algjörlega rangt að það séu skiptar skoðanir innan flokksins í samgöngumálunum.

„Það hefur ekki verið einhugur meðal borgarfulltrúa Sjálfstæðisflokksins um borgarlínu,“ sagði Höskuldur Kári spyrjandi þá.

„Jú,“ svaraði Hildur þegar í stað og sveiflaði gulum blýanti eins og töfrasprota orðum sínum til áherslu. „Á framboðslista okkar í dag er fullkominn einhugur og samstaða um hvert við viljum fara í samgöngumálum. Við viljum byggja hér upp hágæða almenningssamgöngukerfi. Það má heita borgarlína, það má heita gullvagninn. Mér er alveg sama. Ég vil að það virki.“

En það þarf að vita hvað þetta eigi að kosta og hvernig eigi að reka það. Hún sagðist hafa spurt Dag ítrekað um málið – en ekki hafa fengið nein svör.

Og það var Einar sem tók til varna fyrir Dag.

„Þú getur kannski prófað að spyrja bæjarstjóra nágrannasveitarfélaganna á höfuðborgarsvæðinu – nú eða fjármálaráðherrann sem ætti að vita þetta líka.“

Hildur ítrekaði að hún styddi uppbyggingu hágæða almenningssamgangna.

„En hvort styður þú borgarlínu eða ekki,“ hélt Einar áfram að spyrja. „Ég veit að þú hefur talað með einum hætti en fimm næstu menn á lista...“ Ekki var hér lengur hægt að greina orðaskil. Það voru margir um hituna.

Nema Dagur. Sem stóð hinn rólegasti við sitt púlt og horfði fram fyrir sig.

22:05 13. maí

Gagnrýndi oddvita sem eru feimnir við að nefna borgarlínu á nafn

Dóra Björt Guðjónsdóttir, oddviti Pírata, segir að ekki megi gleyma strætó á meðan uppbygging borgarlínu stendur yfir. Píratar vilji til að mynda endurvekja næturstrætó og hafa metnaðarfullan strætó á meðan beðið er.

Dóra Björt gagnrýndi suma oddvita, líkt og Hildi Björnsdóttur, fyrir að vera feimnir við að nefna borgarlínu á nafn. „Fólk talar um smá af þessu, smá af hinu, smá af þéttingu byggðar, smá dreifingu byggðar. Ég vil minna á að loftslagsvandinn er eitt helsta verkefni okkar samtíma að leysa og bregðast við. Það þýðir ekkert miðjumoð, við verðum að ganga alla leið í þessu verkefni,“ sagði Dóra Björt.

„Við þurfum góða borgarlínu og megum ekki gefa neinn afslátt af þeim metnaði sem þar liggur í, við þurfum að hraða frekar borgarlínu.“

21:57 13. maí

Guli blýanturinn í sviðsljósinu

Á púltum frambjóðenda eru gulir blýantar sem gerir þeim kleift að hripa niður svör sín í hita leiksins. Þegar frambjóðendur fá loks orðið hafa þeir verið duglegir við að veifa blýöntunum til að leggja áherslu á orð sín. Blýantarnir eru þó ekki allra. Eitt er víst, kjósendur vonast til þess að kjörnir fulltrúar muni ekki naga blýantana á komandi kjörtímabili.

21:53 13. maí

Fer Framsókn í meirihluta „undir stefnu Samfylkingarinnar“?

„Ef Dagur missir meirihlutann, kemur þá til greina að þið gangið inn í meirihlutann undir forystu Dags, eins og Viðreisn gerði síðast, undir stefnu Samfylkingarinnar?“

Ómar Már oddviti Miðflokksins spurði Einar Þorsteinsson að þessu. Og Framsóknarmaðurinn var ekki lengi að svara. „Við munum ekki undirgangast stefnu Samfylkingarinnar í neinu meirihluta samstarfi sem við förum í. Við í Framsókn höfum talað mjög skýrt fyrir okkar stefnumálum.“ Og sama hvort að meirihluti verði myndaður til hægri eða vinstri – þetta snýst um málefnin. „Við ætlum að standa við það sem við segjum gagnvart kjósendum og það er bara svarið.“

21:53 13. maí

Borgin eigi 5,5 milljarða inni hjá ríkinu vegna þjónustu við fatlað fólk

Dagur talaði um fjármögnun þjónustu við fatlað fólk og benti á nýlega skýrslu um þau mál, sem Kjarninn fjallaði um síðustu helgien hefur ekki fengið mikla athygli núna í aðdraganda kosninga.

„Fyrir bara viku síðan, það var nánast ekki flutt af því frétt, kom fram skýrsla sem sýndi að sveitarfélögin í landinu eiga inni 9 milljarða á ári, þar af á borgin 5,5, vegna umframþjónustu á grundvelli laga við fatlað fólk.

Við erum í baráttu með Örykjabandalagi Íslands og fötluðu fólki í að sækja þetta fé til ríkisins vegna þess að þetta svíður. Við klemmumst þarna á milli,“ sagði Dagur og bætti við að þetta væri „mikið óréttlætismál“.

Starfshópur skipaður til að skoða kostnaðarskiptingu

Eins og Kjarninn sagði frá síðustu helgi var halli sveitarfélaga af þeirri þjónustu sem sveitarfélög landsins veita fötluðu fólki 8,9 milljarðar króna og þar af var hlutur borgarinnar um 5,5 milljarðar króna, eins og Dagur nefndi.

Öllum virðist ljóst að ríkið þurfi að koma með meira fé inn í þennan málaflokk sem sveitarfélögin annars, en auknar kröfur hafa á undanförnum árum verið gerðar um þjónustu og launakostnaður hefur stóraukist. Enn er svo gert ráð fyrir talsverðri hækkun útgjalda í málaflokknum á næstu árum vegna áætlana um að leggja niður herbergjasambýli og gefa fötluðu fólki þess í stað kost á að búa í eigin íbúð með það að markmiði að einstaklingsvæða þjónustuna.

Ríkisstjórnin samþykkti á fundi sínum í upphafi mánaðar að skipa starfshóp um tillögur varðandi kostnaðarskiptingu ríkis og sveitarfélaga vegna málaflokksins.

Frétt Kjarnans um málið

21:52 13. maí

Skattalækkunarloforð mun ekki leiða til gjaldskrárhækkana

Líf Magneudóttir, oddviti Vinstri grænna, spurði Hildi Björnsdóttur hvort skattalækkunarloforð Sjálfstæðisflokksins, komist flokkurinn til valda, muni leiða til gjaldskrárhækkana?

Hildur svaraði því neitandi og vísaði í orð sín frá því fyrr í kvöld að hægt sé ða lækka skatta og stækka kökuna. „Ekki síst með því að styðja við verðmætasköpun í samfélaginu.“

„Þannig að þið ætlið ekki að hækka gjaldskrár í leikskólum og grunnskólum?“ spurði Líf.

„Við ætlum ekki að hafa þá gjaldfrjálsa, vegna þess að við vitum að það er ekki hægt að leysa leikskólavandann með því að gefa allt ókeypis,“ svaraði Hildur.

21:48 13. maí

„Sjálfstæðisflokkurinn þolir ekki að hann stjórni ekki Reykjavíkurborg“

Margir „sóna út“ þegar farið er að tala um skuldahlutföll en Dóra Björt, oddviti Pírata, tók sjensinn að halda áhorfendum við efnið og benti á að Reykjavíkurborg væri með lægsta skuldahlutfallið af sveitarfélögum á höfuðborgarsvæðinu. „Samt er hér talað eins og að fjármálin séu í volli.“ Þessi umræða hafi loðað við borgarstjórn frá því að R-listinn komst til valda. Og Dóra var viss um skýringuna: „Sjálfstæðisflokkurinn þolir ekki að hann stjórni ekki Reykjavíkurborg sem er stærsta stjórnvaldið á Íslandi sem hann stjórnar ekki.“

Dóra sagði Hildi oddvita sjálfstæðismanna tala eins og það sé hægt að lækka skatta og auka í þjónustu. „Þetta er ekki trúverðugt.“

21:43 13. maí

Húsfélagið við Tjörnina

Liggur ekki beint við að segja að borgarstjórn Reykjavíkur sé stærsta húsfélag borgarinnar?

21:41 13. maí

Hefur borgin fjárhagslega burði til að sinna félagsþjónustu?

Borgarstjóri var spurður hvort borgin hafi ekki fjárhagslega burði til að sinna félagsþjónustu?

Dagur benti á að borgin hefur ekki aukið framlög til neins málaflokks jafn mikið á síðustu árum og til velferðarmála.

„Það sker mig í hjartað, hver og ein einasta saga af fólki sem er að bíða,“ sagði Dagur.

Ómar Már Jónsson, oddviti Miðflokksins, benti þá á að 140 manns með þroskahömlun séu á biðlista eftir húsnæðisúrræði og meðal biðtími er fimm ár. Dagur svaraði með því að benda á að einn fjórði af þeim eru úr öðrum sveitarfélögum „vegna þess að Reykjavík er eina sveitarfélagið sem er að gera þetta af einhverjum krafti og einhverjum myndarskap“.

21:32 13. maí

Einar: Fyrst þarf að fella þennan meirihluta

„Fyrst þurfum við að fella þennan meirihluta og komast til áhrifa,“ sagði Einar Þorsteinsson er hann var spurður hvernig hann ætlaði að fjármagna aukna velferðarþjónustu. Þá hafði Einar verið að segja sögu ungs heimilislauss manns sem færðist stöðugt niður biðlista eftir félagslegu húsnæði.

„Þetta getur ekki verið bara óskalisti og hvergi peningar,“ sagði Gunnar H. Gunnarsson, oddviti Reykjavíkur, bestu borgarinnar sem er mikið í mun að kosningaloforðin séu verðmerkt.

„Mhm,“ sagði Einar, eða muldraði réttara sagt, og kinkaði til hans kolli.

21:24 13. maí

Líðan fólks skipti meira máli en geislabaugur yfir Lækjartorg

Velferðarþjónusta og félagsþjónusta sem borgin er að veita var næst á dagskrá.

Kolbrún Baldursdóttir, oddviti Flokks fólksins, var spurð út í einkunnarorð Flokks fólksins, „Fæði, klæði húsnæði,“ og hvort flokkurinn vilji að allt annað bíði á meðan biðlistum er eytt?

Kolbrún benti á lögbundna skyldu Reykjavíkur sem sveitarfélags . „Það er ekki verið að veita næga þjónustu til fólksins. Flokkur fólksins vill setja fólkið sjálft og þarfir þeirra, það að þau geti lifað mannsæmandi lífi, þak yfir höfuðið og mat á diskinn, sé sett í forgang.“

Fólki þurfi að líða vel áður en farið er í þrengja götur og skreyta torg að sögn Kolbrúnar. „Svo getum við kannski sett geislabaug yfir Lækjartorg.“

21:23 13. maí

Einar, ertu að daðra?

Hildur Björnsdóttir vildi vita hver örlög leikskólamála yrðu ef Framsókn yrði tekin inn í meirihlutann. Spurningunni var beint til Dags.

Þegar henni hafði verið svarað, án þess að minnast mikið á Framsókn, sagðist Höskuldur Kári „aðeins vilja spyrja“ Dag út í það sem Hildur ýjaði að, að Dagur og Einar væru að „stinga nefjum saman,“ eins og Höskuldur orðaði það.

„Meint daður,“ skaut Þóra inn í.

„Áberandi daður,“ sagði þá Hildur.

„Ég hef verið alveg skýr, ef núverandi meirihluti heldur þá finnst mér eðlilegt að hann haldi áfram,“ svaraði Dagur.

„Einar, ertu að daðra?“ spurði svo Þóra.

Einar flissaði eilítið áður en hann sagði: „Ef þessi meirihluti heldur þá vita kjósendur nákvæmlega hvað þeir eru að fá.“

„Ætlar þú að vera varadekk eins og Viðreisn síðast?“ sagði Hildur.

„Heyrðu halló, ég er í framboði fyrir Framsóknarflokkinn,“ sagði Einar, orðinn grafalvarlegur. „Við erum tilbúin að vinna bæði til hægri og vinstri.“

21:15 13. maí

Spurningum bombað á Dag

„Þið eruð náttúrlega að gefa borgarstjóra allan tímann í heiminum til að svara,“ sagði Þóra Arnórsdóttir er Kolbrún Baldursdóttir, oddviti Flokks fólksins, ákvað að beina spurningu til Dags líkt og tveir aðrir frambjóðendur þar á undan. Kolbrúnu er umhugað um fátæk börn í borginni og vill að gert verði betur við þennan hóp.

Þórdís Lóa Þórhallsdóttir, formaður Viðreisnar, rauf hins vegar spurningaröðina til Dags og spurði Hildi Björnsdóttur, oddvita Sjálfstæðisflokksins.

Einar Þorsteinsson beindi svo spurningu sinni til Lífar. Styðja Vinstri græn Sundabraut?

Líf sagði þess virði að skoða legu hennar og útfærslu þegar búið væri að auka hlutdeild vistvænna ferðamáta.

En svo var aftur komið að Degi. Því Hildur Björnsdóttir beindi orðum sínum beint að honum.

21:14 13. maí

Er borgarstjóri tilbúinn að skipta Viðreisn út fyrir Sósíalistaflokkinn?

Sanna Magdalena Mörtudóttir, oddviti Sósíalistaflokksins, spurði borgarstjóra hvort hann gæti hugsað sér að mynda meirihluta þar sem Sósíalistar kæmu inn í stað Viðreisnar.

Félagshyggjuna inn og nýfrjálshyggjuna út?

Dagur sagðist vera ánægður með meirihlutasamstarfið þannig að ef hann heldur velli verði það eðlilegasta valið. Sósíalistum hafi verið boðið að taka þátt í meirihlutaviðræðum síðast.

„Við myndum ræða það aftur í hópnum. Við lokuðum engum dyrum síðast en þetta verður að ráðast af málefnunum og lausnunum og að það eru mjög brýn verkefni í borginni,“ sagði Dagur.

„Ég held að þetta sé kannski,“ sagði Þóra Arnórsdóttir áður en kom að næstu spurningu.

21:11 13. maí

Laun borgarfulltrúa of há og þau ætti að lækka, segir Sanna

Kjör borgarfullrúa komu óvænt inn í umræðuna er talað var um skólamál.

Sanna Magdalena Mörtudóttir oddviti Sósíalistaflokksins sagði að það ætti að lækka laun borgarfulltrúa.

„Mér finnst þau allt of há,“ sagði Sanna.

En hvað fá borgarfulltrúar í laun?

Samkvæmt upplýsingum á vef borgarinnar eru laun borgarfulltrúa sem hér segir:

Grunnlaun borgarfulltrúa: kr. 892.134
Grunnlaun 1. varaborgarfulltrúa kr. 624.494
Borgarfulltrúi fær greiddan starfskostnað kr. 64.430, til að mæta öllum persónulegum kostnaði vegna starfsins.
Borgarfulltrúi á rétt á 25% álagi á laun ef hann gegnir formennsku í fagráði/borgarstjórnarflokki eða ef hann situr í þremur eða fleiri fastanefndum.
Borgarfulltrúi sem situr í borgarráði á rétt á 25% álagi á laun, kjörinn varamaður á rétt á 6% álagi og formaður borgarráðs á rétt á 40% álagi.
Forseti borgarstjórnar á rétt á 25% álagi á laun.
Laun borgarfulltrúa með 6% álagi (varamaður í borgarráði) kr. 945.662.
Laun borgarfulltrúa með 25% álagi (s.s. vegna setu í þremur ráðum) kr. 1.115.168.
Laun borgarfulltrúa með 2*25% álagi (s.s. vegna setu í borgarráði og öðrum þremur ráðum) kr. 1.338.201.
Laun 1. varaborgarfulltrúa með 6% álagi (varamaður í borgarráði) kr. 678.022.
Laun 1. varaborgarfulltrúa með 25% álagi (s.s. vegna setu í þremur ráðum) kr. 847.528.

Á vef borgarinnar má svo finna töflu með föstum mánaðarlaunum hvers og eins borgarfulltrúa.

21:07 13. maí

Kvartanir sósíalista

Líf Magneudóttir, oddviti Vinstri grænna, sagði sósíalista leggja fram tilllögur til þess eins að við fellum þær. Og þeir geta þá kvartað undan því.“ Þar var hún að svara gagnrýni Sönnu Magdalenu Mörtudóttur Oddvita Sósíalistaflokksins á að tillögur þeirra í minnihlutanum fengju ekki brautargengi.

„Við Vinstri græn setjumst hins vegar við borðið þar sem ákvarðanir eru teknar. Sósíalistaflokknum var boðið að vera með. Við fáum tillögur okkar samþykktar því við höfum hugrekki til að hrinda verkefnunum í framkvæmd.“

Líf situr í meirihluta. Sósíalistar gáfu það út fyrir fjórum árum að þeir vildu ekki í meirihluta.

21:04 13. maí

Hildur segir meirihlutann hafa afneitað leikskólavandanum

Hildur Björnsdóttir, oddviti Sjálfstæðisflokksins, segist ekki geta þagað í umræðu um leikskólamál. „Ég skal frekar þaga undir öllum öðrum liðum.“ Hún segir meirihlutann hafa afneitað leikskólavandanum.

„Ég sem kona og móðir þriggja barna, ég veit að þetta er eitt stærsta jafnréttismálið sem við fáumst við í borginni. Og við verðum að leysa þennan vanda og það er ekki rétt að hann leysist í haust.“

Hildur segir að erfitt verði að leysa þennan vanda, fyrst og fremst sé um mönnunarvanda að ræða. „Við þurfum að leggja öll spilin á borðin, við þurfum hugsanlega að horfa á kerfisbreytingar,“ sagði Hildur. Sjálfstæðisflokkurinn hefur lagt til að leikskólaganga barna verði stytt um eitt ár og að grunnskólinn hefjist við fimm ára aldur.

20:57 13. maí

„Við fengum myglumálið í fangið“

Dagur, þú hefur verið borgarstjóri í átta ár og í meirihluta í tólf. Hvers vegna er ekki búið að gera eitthvað í þessum málum fyrr? Er þetta ekki bara klúður á þinni vakt?

Þannig spurði Höskuldur Kári þáttastjórnandi um myglumál sem ítrekað hafa komið upp í skólum borgarinnar.

Dagur sagði að áður en Samfylkingin tók við hafi „núll krónur“ verið settar í viðhald. „Við fengum þessi myglumál í fangið.“ Nú hafi verið gerð heildarúttekt á öllu skólahúsnæði í Reykjavík.

20:52 13. maí

Skólakerfið er að bregðast börnum og mannekla á leikskólum

Á eftir húsnæðismálunum tóku málefni skólanna við.

Skólakerfið er að bregðast börnum að sögn Hildar Björnsdóttur. Hún vill gefa kennurum meira frelsi til að vera skapandi og stuðla að aukinni fjölbreytni innan skólakerfisins, auk þess að styðja betur við sjálfstætt starfandi skóla. „Það er margt sem má gera en við verðum að tala meira um þetta, þetta snýst um börnin okkar og framtíðina og við verðum að gera betur.“

Þórdís Lóa segir að vel hafi gengið í skólamálum, áskoranirnar séu frekar í leikskólum. Þórdís Lóa segir aukinn stuðning kominn inn í skólana, meðal annars sálfræðinga, talmeinafræðinga og félagsráðgjafa. „Ég held að það sé bara björt framtíð þarna,“ sagði Þórdís Lóa. Með því að meira fjármagn komi inn í skólana er verið að auka frelsi í skólamálum.

Hildur sakaði Þórdísi Lóu um blaður og þvaður og að ekkert hafi raungerst.

Dóra Björt var spurð út í biðlista á leikskólum. „Af hverju gengur svona illa að losa okkar við þessa biðlista?“ spurði Höskuldur Kári. Dóra Björt sagði manneklu vera helsta vandamálið á leikskólum borgarinnar, því sé búið að bæta launin í kjarasamningum og fækka börnum hvern leikskólastarfsmann og skapa þannig gott umhverfi. Þetta er að skila sér að sögn Dóru Bjartar og það er að verða viðsnúningur.

20:49 13. maí

Engir stólar fyrir fólkið sem berst um hvert sæti

Frambjóðendur keppast um hvert sæti í borgarstjórn og mætast nú í sjónvarpssal eftir langa kosningabaráttu. Kallað er eftir því á Twitter að frambjóðendur þurfi ekki að standa í gegnum þessa síðustu þrekraun baráttunnar.

20:41 13. maí

Vaknaði Dagur einn daginn og það vantaði 4.000 íbúðir?

„Mjög fróðlegt að hlusta á borgarstjóra,“ sagði Ómar Már Jónsson, oddviti Miðflokksins. „Ég er bara mjög undrandi eftir að hafa starfað sem sveitarstjóri í 12 ár í sveitarfélagi úti á landi.“ Hann sagði ríkja „algjört metnaðarleysi“ gagnvart íbúum.

Hvað áttu við? Spurði Höskuldur Kári þáttastjórnandi.

Þetta á sér aðdraganda, sagði Ómar. „Það er talað eins og við höfum vaknað einn daginn og það vanti 4000 íbúðir. Það er eins og borgin hafi ekki gert ráð fyrir að það myndi fjölga neitt í Reykjavík.“

Ómar vill skipuleggja hraðar ný hverfi og hætta þéttingu þar sem eru hvort eð er aðeins byggðar „lúxusíbúðir“.

Dóra Björt Guðjónsdóttir, oddviti Pírata, benti á að borgin væri leiðandi í uppbyggingu félagslegs húsnæðis á höfuðborgarsvæðinu. „Við viljum ekki rétt fyrir kosningar draga einhverja lausn upp úr hatti. Við byggjum okkar ákvarðanir á gögnum og upplýsingum. Skoða áhrifin á markaðinn.“ Það væri húsnæðiskrísa en að hún væri ekki eingöngu á ábyrgð meirihlutans í Reykjavík.

20:39 13. maí

Tveir stærstu flokkarnir vilja þróa borgina með mjög ólíkum hætti

Í upphafi þáttarins var rætt um húsnæðis- og skipulagsmál. Í þeim málaflokkum boða Samfylking og Sjálfstæðisflokkur, tveir stærstu flokkarnir samkvæmt könnunum, fram afar ólíka sýn á þróun borgarinnar.

Samfylkingin vill byggja inn á við

Samfylkingin boðar frekari þéttingu innan núverandi hverfa borgarinnar, auk uppbyggingar á Ártúnshöfða og til framtíðar á Keldnalandinu. Flokkurinn segir dreifingu byggðarinnar dýra og tímafreka, auka umferð, veikja almenningssamgöngur, auka tafatíma í umferðinni og vinna gegn árangri í loftslagsmálum.

Áhersla Samfylkingarinnar er á að „endurnýjun og uppbygging hefjist innan svæða sem liggja nærri Borgarlínu og þeim innviðum sem henni munu fylgja, svo sem í Skeifu, Múlahverfi og Mjódd,“ eins og segir í kosningastefnu flokksins, sem Kjarninn fjallaði um á dögunum.

Sjálfstæðisflokkurinn vill stækka jaðarsvæðin

Sjálfstæðisflokkurinn horfir í aðrar áttir en Samfylkingin og núverandi meirihluti. Í skipulagsmálum segist Sjálfstæðisflokkurinn vilja „hefja kröftuga húsnæðisuppbyggingu um alla borg í lifandi borgarhverfum“ og að flokkurinn ætli sér að tryggja skipulag nýrra hverfa í Keldnalandinu og í Örfirisey á Granda, en Grandinn er í dag einungis atvinnusvæði.

Einnig boðar flokkurinn „þéttingu byggðar innan hverfa sem hafa til þess svigrúm“ og svo eru nefnd þrjú úthverfi á jaðri borgarinnar; Staðarhverfi, Úlfarsársdalur og Kjalarnes. Þar, öfugt við eldri hverfi, segir flokkurinn að innviðir ráði við að taka við nýjum borgarbúum, samkvæmt kosningaáherslum flokksins sem kynntar voru fyrir kosningar og Kjarninn fjallaði einnig um.

20:38 13. maí

Mótvægisaðgerðir fyrir flugvöllinn nauðsyn ef byggja á í Skerjafirði

Einar Þorsteinsson, oddviti Framsóknar, segir framboðið vera með sömu stefnu og Framsókn á landsvísu og reyndar sömu stefnu og borgarstjóri „að því leyti að það er samningur í gildi og hann kveður á um það að rekstraröryggi flugvallarins sé tryggt.“

Einar segir Framsókn gera kröfu um að Dagur standi við samninga.

Hagsmunir allra Íslendinga í húfi. „Reykjavík er höfuðborg allra Íslendinga, ekki bara Reykvíkinga og það er sjúkraflug sem þarf að sinna og innanlands sem þarf að sinna. Þetta eru hagsmunir allra Íslendinga,“ sagði Einar og segir Dag þurfa að verða borgarstjóri allra Íslendinga.

Ef byggð á að rísa í Skerjafirði þarf að tryggja mótvægisaðgerðir svo rekstraröryggi skerðist ekki. Hann segir eðlilegt að byggja í Vatnsmýri, en það verði ekki hægt fyrr en viðeigandi staðsetning finnist fyrir Reykjavíkurflugvöll.

20:34 13. maí

Full dannað fyrir notendur Twitter

Hiti færðist í leika þegar Einar Þorsteinsson, oddviti Framsóknarflokksins, og Dagur B. Eggertsson, borgarstjóri og oddviti Samfylkingar, ræddu framtíð Reykjavíkurflugvallar og uppbyggingar í Vatnsmýri. Þeir voru stoppaðir af frekar fljótlega til að koma öðrum oddvitum að sem enn höfðu ekki fengið að leggja orð í belg. Hrafn Jónsson kallar eftir aðeins meiri hasar á Twitter.

20:31 13. maí

Uppbyggingin á við stórt sveitarfélag

Húsnæðis- og skipulagsmál eru fyrst á dagskrá.

Þóra Arnórsdóttir byrjar á að beina orðum sínum til Dags B. Eggertssonar borgarstjóra. Metuppbygging á kjörtímabilinu, hefur Dagur sagt, en staðan er engu að síður sú að íbúðaverð hækkar og leiguverð sömuleiðis.

Dagur segir að jafnvægi hafi verið náð á húsnæðismarkaðnum árið 2019 og í raun hafi verið varað við offramboði. En svo kom covid og allt breyttist. „Það hefur komið metfjöldi íbúða inn á markaðinn undanfarið,“ sagði hann – um 5.000 Reykvíkingar hafa fengið þak undir höfuðið.

„Ef það væri sveitarfélag væri það eitt stærsta sveitarfélag landsins.“ Sagði hann þennan fjölda tvöfalt meiri en hið svonefnda Breiðholtsátak. „Ég er óhræddur að færa rök fyrir því.“

Hildi Björnsdóttur, oddvita Sjálfstæðisflokksins, fannst „dauft“ að heyra Dag „stæra sig“ af metum þegar það er skortur á húsnæði. Hún segist styðja þéttingu byggðar en vill að horft sé til úthverfanna og nefndi stefnu flokksins um „kröftuga“ uppbyggingu í Úlfarsárdal og á Kjalarnesi því þar eru fyrir innviðir sem hægt er að nýta.

20:20 13. maí

Síðasti sjens

Hildur að hlaupa og Pawel að hjóla. Stefán Pálsson með skóflu og Kjartan Magnússon með reiðhjólahjálm sem margir töldu snúa öfugt á höfði hans sem reyndist ekki rétt að hans sögn. Einar Þorsteinsson gengur um borgina, framhjá þekktum bragga, og slær á létta strengi.

Fyrir kappræður oddvita framboðanna í borginni á RÚV flæddu auglýsingar þeirra hver af annarri yfir skjáinn. Þetta er lokaspretturinn. Og orð oddvitanna í umræðum kvöldsins gætu tryggt þeim atkvæði.

20:10 13. maí

Verður sótt að Einari frá hægri og vinstri?

Það vakti mikla athygli í upphafi vikunnar er Sjálfstæðisflokkurinn mældist með 16,2 prósent fylgi í könnun sem Prósent framkvæmdi fyrir Fréttablaðið. Kannanir dagsins reyndust flokknum hagfelldari, en sýna þó allt að rúmlega tíu prósenta fylgistap flokksins frá kosningnum árið 2018.

Framsóknarflokkurinn hefur hins vegar verið á flugi og mælist með 17,5 prósent í Þjóðarpúlsi Gallup. Mikið af fylgi flokksins virðist hafa verið að koma frá Sjálfstæðisflokknum og miðað við nýjustu mælingu Gallup er Einar Þorsteinsson mögulega farinn að narta eitthvað í fylgi meirihlutaflokkanna líka.

Hann má því væntanlega búast við því að sótt verði að honum úr öllum áttum í kappræðum kvöldsins. Einar sagðist í viðtali við mbl.is í dag ánægður með tölurnar sem flokkurinn er að sjá í skoðanakönnunum.

20:08 13. maí

Með orðum oddvitanna - viðtöl Kjarnans við oddvitana 11

Kjarninn ræddi við oddvita alla framboðanna ellefu sem bjóða fram í borginni í nýju kosningahlaðvarpi: Með orðum oddvitanna.

Hægt er að hlusta á öll viðtölin hér.

19:56 13. maí

Kannanir sýna meirihlutann ýmist falla eða halda

Í kvöld fara fram sjónvarpskappræður oddvita framboðanna ellefu sem bjóða fram til borgarstjórnar í Reykjavík í beinni útsendingu á RÚV.

Baráttan um borgina er orðin æsispennandi, en töluverðar sviptingar hafa verið á fylgi flokka í nýjustu könnunum eftir að kannanir höfðu um nokkurt skeið bent til þess að meirihluti Samfylkingar, Viðreisnar, Pírata og Vinstri grænna héldi nokkuð örugglega.

Maskína birti nýja könnun í dag sem framkvæmd var í gær og í dag og niðurstaða hennar er sú að meirihlutinn haldi naumlega. RÚV birti síðan nýjan Þjóðarpúls Gallup undir kvöld, sem framkvæmdur var 9.-13. maí, sem gefur til kynna að meirihlutinn falli í kosningunum á morgun.

Margir kjósendur ákveða sig á síðustu stundu – og margir sitja eflaust við skjáinn og fylgjast með kappræðum kvöldsins án þess að hafa enn tekið ákvörðun um hvað skuli kjósa. Ritstjórn Kjarnans fylgist með oddvitakappræðunum í kvöld og greinir frá helstu tíðindum.

Kjósa

Hvernig finnst þér þessi grein? Skráðu þig inn til að kjósa.

Veistu meira? Láttu okkur vita

Deila

Höfundar

Fréttamál

kosningar2022

Efnisorð

Athugasemdir

Skráðu þig inn til að skrifa athugasemd eða kjósa.

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.

Tengdar greinar

kosningar2022

Fréttir

Kosningastjóri Samfylkingarinnar nýr aðstoðarmaður borgarstjóra

Aðstoðarmaður Dags B. Eggertssonar síðan 2014 hefur ráðið sig til starfa hjá dótturfélagi Orkuveitu Reykjavíkur. Við aðstoðarmannastarfinu tekur Diljá Ragnarsdóttir.

Fréttir

Framsókn og Vinstri græn hafa tapað um átta prósentustigum af fylgi frá síðustu kosningum

Eini stjórnarflokkurinn sem tapar ekki fylgi frá kosningum er Sjálfstæðisflokkurinn. Ríkisstjórnin næði ekki meirihluta á þingi ef kosið yrði í dag. Samfylkingin hefur bætt langmestu fylgi við sig og er næst stærsti flokkur landsins.

Fréttirkosningar2022

Vegglistaverk Libiu og Ólafs þótti óleyfilegur kosningaáróður í Hafnarfirði

Yfirkjörstjórn í Hafnarfirði taldi sér ekkert annað fært en að láta mála yfir vegglistaverk Libiu Castro og Ólafs Ólafssonar fyrir sveitarstjórnarkosningarnar í vor. Ólafur segir að allt eins hefði verið hægt að skikka N1 til að taka niður fána.

Fréttir

Laun 30 dýrustu bæjarstjóranna voru samtal 698 milljónir króna í fyrra

Alls eru 64 sveitarfélög á landinu eða eitt sveitarfélag fyrir hverja tæplega sex þúsund íbúa landsins. Þorri þeirra er með færri en tvö þúsund íbúa. Alls voru 100 sveitarstjórnarmenn með yfir eina milljón á mánuði í fyrra.

Fréttirkosningar2022

Hildur varði 9,3 milljónum í prófkjörsslaginn og átti eina og hálfa milljón afgangs

Hildur Björnsdóttir oddviti Sjálfstæðisflokksins átti 1,5 milljónir eftir í kosningasjóði sínum þegar prófkjör Sjálfstæðisflokksins í borginni var um garð gengið. Það fé ætlar hún að færa félagi sem hún sjálf stjórnar, en það heitir Frelsisborgin.

Fréttir

Hildur skilaði uppgjöri vegna prófkjörs í gær

Prófkjörsbarátta Ragnhildar Öldu Vilhjálmsdóttur sem einnig sóttist eftir oddvitasæti í prófkjöri Sjálfstæðisflokksins kostaði 8,4 milljónir. Frambjóðendur hafa þrjá mánuði frá prófkjöri til að skila upplýsingum um kostnað framboða til Ríkisendurskoðunar.

Mest lesið

Dómsmál

Prestur lagði leikstjóra og frænda í meiðyrðamáli

Presturinn Arnaldur Máni Finnsson var sýknaður af kröfu föðurbróður síns og leikstjórans Einars Þórs Gunnlaugssonar í meiðyrðamáli tengdu harðri deilu um gamalt einbýlishús.

Úttekt

Hverjir eru að græða á Íslandi?

Hagnaður sjávarútvegs og ferðaþjónustu jókst um ríflega 55 prósent í fyrra. Enn er þó mestur hagnaður í fasteignageiranum.

Erlent

Pútín vildi engar málamiðlanir

Vestrænir friðargæsluliðar í Úkraínu yrðu „réttmætt skotmark“, sagði Rússlandsforseti. Sendinefnd Trumps kom tómhent frá Moskvu.

UmhverfiðEndurvinnsla á Íslandi

Íslenskt plast fannst í Tyrklandi

Umbúðir utan af Ísey skyri fundust í plastúrgangi í Tyrklandi. Framkvæmdastjóri Úrvinnslusjóðs segir að plast frá Íslandi fari að hluta til endurvinnslu í Tyrklandi en neitar að afhenda gögn um rekjanleika þess.

Innlent

Konur í meirihluta í hópuppsögnum en jafnréttismat óþarft að mati Reykjavíkurborgar

66 prósent þeirra sem misstu vinnuna hjá Reykjavíkurborg í hópuppsögnum undanfarna mánuði eru konur. Borgin taldi óþarft að gera jafnréttismat og sagði gildandi stefnur haldast óbreyttar. „Það að stefnurnar haldist óbreyttar þýðir ekki að breytingarnar sem verið er að leggja til hafi ekki jafnréttisáhrif,“ segir lektor í kynjafræði.

ErlentÚkraínustríðið

Fundur Trumps, Pútíns og Xi vekur áhyggjur af uppskiptingu heimsins

Mögulegur leiðtogafundur stórveldanna í Shenzhen vekur áhyggjur af því að Úkraína og Evrópa verði sniðgengnar, en sérfræðingar telja ólíklegt að viðræðurnar skili miklum árangri.

Mest lesið

Mest lesið í vikunni

ErlentBandaríki Trumps

Trump hafnar úrslitum þingkosninganna

Donald Trump sakar kosningayfirvöld um svik án þess að leggja fram gögn, eftir að demókratar náðu meirihluta í báðum deildum Bandaríkjaþings.

Viðtal

„Hún mun alltaf vera með mér“

Adolf Þór Haraldsson missti stóru ástina í lífi sínu aðeins nítján ára gamall þegar Hannah Jane Large lést á Krýsuvíkurvegi. Hún hafði skrifað ritgerð um ást þeirra, sem hann segir lýsa hvernig honum líður núna.

Úttekt

Mannaráðningar Trumps eftir tapið vekja ugg

Donald Trump bauð bardagakappanum Dana White, forstjóra UFC, starf blaðafulltrúa Hvíta hússins og skipaði Stephen Miller starfsmannastjóra sinn.

NeytendurFernurnar brenna

„Við erum öll höfð að fífli þegar svona er komið fram við okkur“

Björg Eva Erlendsdóttir, framkvæmdastjóri Landverndar, segir fréttir af því að fernur séu enn brenndar vera annað kjaftshögg og verra en það fyrsta. Breki Karlsson, formaður Neytendasamtakanna, hefur kallað eftir gagngerri endurskoðun á Úrvinnslusjóði.

Erlent

Trump heitir endurkomu: „Þeir geta elt okkur uppi“

Trump var tvisvar kærður til embættismissis á fyrra forsetatímabili sínu. Nú geta demókratar rannsakað viðskipti fjölskyldu hans og störf stjórnarinnar.

Viðtal

40 mín.

Syrgjandi foreldrar Hönnuh þakklát Íslandi

Foreldrar írskrar stúlku sem lést í bílslysi á Íslandi í lok sumars eru í senn þakklát Íslandi og sorgmædd yfir að hún lést langt fyrir aldur fram. Þau eiga þó erfitt með að fallast á að hún hafi látist í slysi, þar sem vísbendingar eru um að ekið hafi verið á yfir 200 kílómetra hraða í banaslysi dóttur þeirra.

Mest lesið í mánuðinum

Viðtal

40 mín.

Syrgjandi foreldrar Hönnuh þakklát Íslandi

Dómsmál

Dómari stöðvaði lögmann Írisar Helgu

Brotaþoli lýsti flóknu ástarlífi Írisar Helgu Jónatansdóttur sem er sökuð um umfangsmikið umsáturseinelti. Dómari stöðvaði lögmann Írisar Helgu þegar hann gekk á vitnið, og úr varð nokkurt orðaskak.

Viðtal

120 mín.

Íslenskur læknir varpar nýju ljósi á lífshættulegan meðgöngusjúkdóm

Nítján ára gömul lá Silja Rut Ragnarsdóttir nær dauða en lífi á skurðarborði Landspítalans eftir alvarlegt tilfelli meðgöngueitrunar. Íslenskur vísindamaður í Bandaríkjunum, Jóhann Elí Guðjónsson húðlæknir, leiðir brautryðjandi rannsóknir sem varpa nýju ljósi á hvers vegna sjúkdómurinn kemur fram. Hann telur mögulegt að þróa lyf við sjúkdómnum sem bjargað gæti mannslífum.

Viðtal

„Hún mun alltaf vera með mér“

GagnrýniDjöflar

Hjónadjöflar

Sigríður Jónsdóttir skrifar um Djöfla eftir Lars Norén, sem sýnt er í Borgarleikhúsinu.

Viðtal

Ástleysið er sárt

Nánd er næring, nauðsynleg eins og matur. Tæpur helmingur fólks elst upp í óöruggum tengslum sem geta komið niður á tengslum og ástarsamböndum á fullorðinsárum, jafnvel ógnað heilsu, enda er „tengslamyndun ein af grunnforsendum farsældar“, að sögn klíníska sálfræðingsins Guðbrands Árna Ísberg. Í bók sinni, Í augum þínum verð ég til, fjallar hann um getu okkar til að mynda tengsl og ástina í öllum sínum myndum.

Athugasemdir

kosningar2022

Nýtt efni