Ríflega tvöfalt fleiri falla fyrir eigin hendi á Íslandi en láta lífið í umferðinni og sjálfsvíg eru langalgengasta dánarorsök ungra karlmanna. Þrátt fyrir það hefur lengi staðið á fjárveitingum til forvarnaverkefna og geðheilbrigðismála almennt.

Svandís Svavarsdóttir heilbrigðisráðherra tilkynnti nýlega að hún hefði samþykkt allar 50 tillögur starfshóps sem vann aðgerðaráætlun til að fækka sjálfsvígum á Íslandi. Sem komið er hefur ráðherra aðeins eyrnamerkt þessu verkefni 25 milljónir króna, eða 500 þúsund á hverja tillögu. Kostnaður við að innleiða allar þessar metnaðarfullu tilraunir myndi þó frekar hlaupa á milljörðum og ekki er ljóst hvenær eða hvernig tillögurnar verða fjármagnaðar.

Sjö skipuðu hópinn: Tveir verkefnastjórar Landlæknisembættisins, fagstjóri sálfræðiþjónustu hjá Heilsugæslu höfuðborgarsvæðisins, framkvæmdastjóri Geðhjálpar, yfirlæknir BUGL, yfirlæknir öryggis- og réttargeðþjónustu Landspítala og félagsþjónustufulltrúi frá Sambandi íslenskra sveitarfélaga.

Tillögur þeirra, alls 50 talsins eins og áður segir, eiga að stuðla að fækkun sjálfsvíga í mjög víðum skilningi. Þær taka á öllu frá rótum vandans …