Tæland gerði loftárásir á hernaðarleg skotmörk í Kambódíu í nótt eftir að Kambódía skaut eldflaugum og stórskotaliði og drap að minnsta kosti 11 óbreytta borgara. Þetta markar dramatíska stigmögnun í langvarandi landamæradeilu ríkjanna tveggja.

Ríkin hafa lengi átt í hatrammri deilu um svæði sem kallast Smaragðsþríhyrningurinn, þar sem mörk Tælands, Kambódíu og Laos mætast og þar sem finna má mörg forn musteri.

Deilan hefur staðið yfir í áratugi, blossaði upp í blóðug hernaðarátök fyrir rúmum 15 árum og aftur í maí síðastliðnum þegar kambódískur hermaður féll í skotbardaga.

Á fimmtudag blossuðu átökin aftur upp þegar Kambódía skaut eldflaugum og sprengjum yfir í Tæland og tælenski herinn brást við með því að senda F-16 herþotur í loftárásir.

Heilbrigðisráðuneyti Tælands greindi frá því að að minnsta kosti 11 óbreyttir borgarar hefðu látið lífið, flestir í eldflaugaárás nálægt bensínstöð í Sisaket-héraði.

Upptökur frá vettvangi sýndu reyk stíga upp frá þaki lítillar verslunar …