Alheimur er vísindasetur sem mun innihalda gagnvirkt og í senn áþreifanlegt efni um hin ýmsu svið vísinda þar sem börn og aðrir gestir fá tækifæri til að prófa, snerta, heyra og sjá í staðinn fyrir að lesa langa fræðilega texta. Alheimur er hugarsmíð Guðrúnar Matthildar Sigurbergsdóttur, líffræðings hjá Íslenskri erfðagreiningu. Alheimur er ekki orðinn að veruleika en það gæti gerst í nánustu framtíð. 

„Þetta er örugglega í fyrsta og eina sinn sem ég verð ungfrú Alheimur, held ég,“ segir Guðrún Matthildur og hlær. En það dugar ekkert minna þegar til stendur að koma á fót vísindasetri um öll heimsins vísindi. Hugmyndin hefur lengi blundað í Guðrúnu og hún ákvað loks að láta vaða í vor og skráði sig til leiks í nýsköpunarkeppninni Gullegginu. „Það kom einhver kraftur yfir mig. Ég komst ekki áfram í keppninni en ákvað samt að halda áfram með verkefnið, þetta var hvetjandi umhverfi,“ segir Guðrún, sem …