Þögn íslenskra stjórnvalda vegna loftárása Ísraelshers á Gaza-svæðinu og átakanna í Jerúsalem er ekki viðundandi að mati Rósu Bjarkar Brynjólfsdóttur, þingmanns Samfylkingarinnar. Einu viðbrögðin sem borist hafa frá íslenskum stjórnvöldum eru tíst Guðlaugs Þórs Þórðarsonar utanríkisráðherra þar sem hann lýsir miklum áhyggjum af ástandinu.

Mikil ókyrrð hefur verið í Austur-Jerúsalem síðustu daga, en föstumánuðurinn Ramadan er nú að renna sitt skeið. Af því tilefni komu tugir þúsunda Palestínumanna saman síðastliðinn föstudag í Al-Aqsa moskunni. Eftir athöfn hófust mótmæli til stuðnings Palistínumönnum á landtökusvæðum. Í átökum milli ísraelskrar lögreglu og Palestínumanna særðust hátt í 200 Palestínumenn. Átök héldu áfram og á fjórða hundrað manns særðust í átökum við moskuna í gær.

Palestínumenn hafa skotið tugum flugskeyta frá Gaza-ströndinni yfir til Ísraels frá því í gær. Ísraelsher hefur brugðist við með loftárásum á Gaza sem hafa að sögn yfirvalda þar kostað tuttugu manns lífið, þar af níu börn. Þá eru tugir særðir eftir loftárásirnar. Ástandið á svæðinu þykir afar alvarlegt og hafi ekki verið verra frá árinu 2017.

Minnir á sérstakt samband Íslands við Palestínu

Rósa Björk minnir í færslu á Facebook á að í júní á síðasta ári hafi þingmenn stjórnar og stjórnarandstöðu í utanríkismálanefnd Alþingis lýst áhyggjum sínum af fyrirætlunum nýrrar ríkisstjórnar Ísraels um innlimun á svæðum Palestínumanna og áhrifum þess á átök milli Palestínumanna og Ísraela. Sú áætlun bryti í bága við alþjóðalög. Ásamt Rósu Björk skrifuðu þau Logi Einarsson, formaður Samfylkingarinnar, Silja Dögg Gunnarsdóttir, þingmaður Framsóknarflokksins, og Smári McCarthy, þingmaður Pírata undir áskorun þar sem untaríkisráðherra og ríkisstjórn Íslands voru hvött til að beita sér með ákveðnum og skýrum hætti „fyrir friðsamlegri lausn á deilu Ísraela og Palestínumanna og að koma því skýrt á framfæri við ísraelsk stjórnvöld að áform þeirra gagnvart Palestínu séu óviðunandi.  Ísland hefur alltaf stutt tveggja ríkja lausnina og ber ávallt að tala fyrir því að alþjóðalög séu virt og að diplómatískum og friðsamlegum leiðum sé beitt í deilum Ísraela og Palestínumanna. Það er söguleg nauðsyn nú sem aldrei fyrr.“

Í færslu Rósu Bjarkar nú bendir hún á að staðan hafi versnað mjög til hins verra frá því þingmennirnir fjórir sendu frá sér áskorunina í fyrra. „Ég sakna þess mjög að sjá ekki afdráttarlausari og skýrari skilaboð um afstöðu ríkisstjórnar Íslands um að fordæma hernaðaraðgerðir Ísraelshers gagnvart saklausum borgurum Palestínu,“ skrifar Rósa Björk.

Rósa Björk undirstrikar einnig hið sérstaka samband sem Ísland eigi við Palestínu, verandi fyrsta vestræna ríkið sem viðurkenndi sjálfstæði og fullveldi Palestínu árið 2011. „Íslandi ber ávallt að tala fyrir því að alþjóðalög séu virt og að diplómatískum og friðsamlegum leiðum sé beitt í deilum Ísraela og Palestínumanna. Atburðir síðustu daga hafa sýnt að nú er nauðsyn sem aldrei fyrr. Þögn íslenskra stjórnvalda er ekki viðunandi og ein færsla á Twitter nægir ekki sem viðbrögð við svo grafalvarlegri stöðu.“