Eldgosið í Geldingadal við Fagradalsfjall, skammt norðaustur af Grindavík, er lítið hraungos á sprungu. Gosið er heppilega staðsett í aflokuðum dal og minnkar það líkurnar á mikilli dreifingu hraunrennslis. Aðeins 2,6 kílómetrar eru frá gosstaðnum að Suðurstrandarvegi.
Almannavarnastig hefur verið lækkað úr neyðarstigi niður í hættustig, segir í tilkynningu frá Ríkislögreglustjóra. „Það er mat vísindamanna að gosstöðvarnar séu litlar og lítil framrás hefur verið frá því í gær, talið er að gosið ógni ekki mannvirkjum eða byggð.“
Þrátt fyrir smæðina leggur gasmengun af eldgosinu og er fólk sem er í vindátt frá gosinu ráðlagt að forðast óþægindi með því að hafa glugga lokaða og kynda ef með þarf.
Í dag er spáð suðvestanátt á Reykjanesi sem þýðir að gasmengun getur borist til höfuðborgarsvæðisins. Ekki er hætta á ferðum svo fjarri gosstöðvunum. Varað er við því að fólk fari of nálægt eldgosinu, ekki síst vegna gasmengunarinnar.
Um er að ræða fyrsta eldgosið á Reykjanesskaganum frá Sturlungaöld, nánar tiltekið frá árinu 1240. Landhelgisgæslan myndaði gosið úr lofti í morgun og má sjá meðfylgjandi myndir úr þeirri töku.
Eldgos við Fagradalsfjall
Þetta er gönguleiðin að nýja eldgosinu
Hér er sérstakt hættusvæði hjá eldgosinu
„Margfalt meiri kraftur“ í nýja eldgosinu sem teygir sig norðar
Gosið stöðvaðist en fór aftur af stað
Rukka inn á drullusvað
Athugasemdir