Streymi Eldgos við Fagradalsfjall

Almannavarnir biðja fólk um að fara ekki að gossvæðinu

Mikið af fólki er að fara inn á afleggjarann að Keili. „Þetta er mjög krítísk staða,“ segir jarðeðlisfræðingur sem biður um vinnufrið á vettvangi. Varasamt getur verið að fara mjög nálægt gosinu vegna gasmengunar.

Deila

Efnisorð

Eldgos við Fagradalsfjall

Ritstjórn

Lýsingu lokið Nýjasta færsla kl. 16:22

16:22 3. mars

SMS verða notuð til að koma skilaboðum til fólks ef þörf verður á

Ef til kemur verða sms skilaboð notuð til að koma skilaboðum til fólks til að miðla upplýsingum. Hægt er að senda tugþúsundir slíkra skilaboða á mjög stuttum tíma.

16:19 3. mars

Engin mannvirki í hættu

Eins og staðan er þá er ekki talið að nein mannvirki séu í hættu komi til goss. Raflínur liggja norðan megin á Reykjanesskaganum, í töluverðri fjarlægð og eru ekki í hættu sem sakir standa.

16:17 3. mars

Viðbúnaðarstig vegna flugs hækkað í appelsínugult

Búið er að hækka viðbúnaðarstig vegna flugs upp í appelsínugult, sem eru upplýsingar fyrir flugmenn til að meta stöðuna. Komi til goss verður viðbúnaðarstig hækkað í rautt.

Ólíklegt er að gos, ef af því verður, hafi áhrif á flug, hvorki hér við land eða á heimsvísu.

16:15 3. mars

Gosið líklega stutt ef af verður

Erfitt er að segja til um hversu lengi eldgos gæti staðið yfir en líklegur tími eru ein til tvær vikur. Gos á þessu svæði eru alla jafna lítil og þess vegna er líklegt að gostími verði stuttur segir Freysteinn.

16:13 3. mars

Mögulega myndast margar sprungur

Mögulegt er að ef til goss kemur gæti gosið upp úr mörgum sprungum segir Kristín.

16:13 3. mars

Gæti valdið óþægindum en er ekki hættulegt

Ekki eru líkur á að um hættulegt gos verði að ræða miðað við okkar bestu þekkingu, segir Kristín. Ástandið gæti orðið óþægilegt í nokkra daga en það bendir ekkert til að hafa þurfi áhyggjur af ástandinu. „Ég met stöðuna þannig að meðan þessi hrina er í gangi að þá er spenna að safnast upp á svæðinu og þá aukast líkur á stærri skjálftum. Það eru þessar sömu sviðsmyndir, það gætu orðið skjálftar frá 6 til 6,5,“ segir Kristín. Freysteinn bætir við að ekki sé ólíklegt að dragi úr styrk skjálfta á höfuðborgarsvæðinu ef til goss kemur.

16:10 3. mars

Tímaramminn óviss

Virkni ágerðist nú seinni part dags og eru litlit skjálftar mjög þéttir og stækkandi. Línan sem um ræðir er á milli Keilis og Litla Hrúts. Hugsanlegt er að kvika sé að færast nær yfirborði en tímaramminn er óviss. Ástandið getur tekið hröðum breytingum en líka getur þróunin tekið lengri tíma. Fylgjast þarf náið með og það verður gert næstu klukkutímana, segir Freysteinn.

16:08 3. mars

Engar stórar hamfarir og enginn er í hættu

Víðir segir að það sem nú er að gerast sé í fullkomnu samræmi við spár. Engar stórar hamfarir eru yfirvofandi og enginn er í hættu. Ekkert er að sjá á svæðinu og hvetur Víðir fólk til að fara ekki á svæðið, það sé eingöngu til að trufla þá starfsmenn almannavarna sem séu við störf á svæðinu. Þá getur verið varasamt að fara nærri svæðinu vegna gasmengunar.

16:05 3. mars

Fundurinn hafinn

Víðir Reynisson, yfirlögregluþjónn hjá Almannavörnum, Kristín Jónsdóttir, hópstjóri náttúruvárvaktar Veðurstofunnar og Freysteinn Sigmundsson frá jarðvísindastofnun Háskóla Íslands eru mætt á blaðamannafund almannavarnar.

16:04 3. mars

Enginn gosummerki sjást á yfirborði

Ekki sáust ummerki um gos á yfirborði þegar þyrla Landhelgisgæslunnar flaug yfir Reykjanes nú á fjórða tímanum.

Kjósa

Hvernig finnst þér þessi grein? Skráðu þig inn til að kjósa.

Deila

Efnisorð

Eldgos við Fagradalsfjall

Athugasemdir

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir.

Tengdar greinar