Umhverfisstofnun hefur tilkynnt að mötuneyti Íslandsbanka, sem heitir Dalurinn, hefur hlotið Svansvottun. 

Meðal þess sem starfsfólk mötuneytisins hefur unnið að er að koma í veg fyrir matarsóun með mælingum og aðgerðum. Starfsfólkið kom á fót samstarfi við Kaffistofu Samhjálpar sem fær gefins yfir 65 þúsund máltíðir á ári. Á vef Samhjálpar kemur fram að félagið gefi allt að 200 máltíðir á dag, sem nemur um 73 þúsund máltíðum.

Mötuneytið nýtir nú eingöngu umhverfisvottuð efni í eldhúsi, hefur aukið innkaup á lífrænum matvælum og flokkar og endurvinnur allan úrgang.

„Með þessu framtaki sýnir Íslandsbanki gott fordæmi og samfélagslega ábyrgð samhliða því að framfylgja sjálfbærnistefnu bankans,“ segir í yfirlýsingu Umhverfisstofnunar.

Íslandsbanki er í eigu íslenska ríkisins, eins og Landsbankinn að 98% hluta. Í desember tilkynnti Bjarni Benediktsson fjármálaráðherra að stefnt væri að sölu á eignarhlut ríkisins, samkvæmt tillögu Bankasýslu ríkisins. Meirihluti efnahags- og viðskiptanefndar Alþingis lagði formlega til við fjármálaráðherra að allt að 35 prósenta eignarhlutur ríkisins í Íslandsbanka yrði seldur. Samkvæmt tillögu nefndarinnar átti enginn einn þátttakandi í útboðinu að eignast meira en 2,5 til 3 prósent í bankanum. Samfylkingin, Miðflokkurinn og Píratar eru andvíg sölunni, en Samtök atvinnulífsins hafa fagnað fyrirhugaðri sölu.

Íslandsbanki hefur vakið umtal með róttækri sjálfbærnisstefnu. Meðal annars hefur bankinn boðað að innkaup muni ráðast að hluta af jafnréttisstefnu birgja. Meðal annars tilkynnti bankinn árið 2019 að hann myndi hætta að auglýsa hjá fjölmiðlum sem byggju við kynjahalla í starfsliði og vali á viðmælendum.

Svansvottun er opinbert umhverfismerki Norðurlandanna sem komið var á laggirnar af Norrænu ráðherranefndinni 1989. Markmiðið er að draga úr umhverfisáhrifum af vörum og þjónustu og auðvelda neytendum að velja umhverfisvæna kosti.

Hér má sjá lista yfir svansvottaða þjónustu. Meðal 42 fyrirtækja á Íslandi sem fengið hafa Svansvottun eru Krónan, Kaffitár, Mötuneyti Landsbankans, Reitir, Tandur, Mötuneyti Landspítalans og Ísafoldarprentsmiðja. Þess utan hafa um 30 þúsund vörur á Norðurlöndunum fengið Svansvottun.

Kröfur fyrir Svansvottun fela meðal annars í sér að skoða allan lífsferil vara, setja strangar kröfur um notkun skaðlegra efna, flokkun og lágmörkun úrgangs og tryggja að ekki séu notuð þekkt hormónaraskandi eða krabbameinsvaldandi efni.