Hlekkur hér á þrautina frá í gær.
***
Aukaspurningar.
Konan á myndinni hér að ofan var frægur ljósmyndari með meiru. Hvað hét hún?
***
Aðalspurningar:
1. Í dag heldur upp á 45 ára afmæli sitt einn frægasti golfleikari heimsins. Hann hefur verið oftar í efsta sæti golflistans en nokkur annar og vann á árum áður ótrúlega sigra á golfvellinum. Síðustu árin hefur hann vart verið svipur hjá sjón vegna meiðsla og ýmissa áfalla annarra, en staða hans sem eins frægasta golfleikara sögunnar er þó trygg. Hvað heitir afmælisbarnið?
2. Jane Goodall heitir kona ein, sem nú er komin fast að níræðu, en skaust fram í sviðsljósið um og upp úr 1970 þegar hún fór að gefa út bækur um tiltekið fyrirbæri sem hún hafði þá stundað rannsóknir á um árabil, og hefur haldið því áfram síðan. Rannsóknirnar kröfðust þess að hún dveldi langdvölum á tilteknum suðlægum slóðum. Hvað hefur Goodall verið að rannsaka?
3. Fjall eitt á Íslandi er 756 metra hátt og stendur fremst á svonefndu Hvalnesi. Það er snarbratt og tilkomumikið og þar hafa fundist ýmsir málmar, svo sem gull, silfur og kvikasilfur, en ekki þó í miklu magni. Fyrrum hét fjallið Hvalneshorn. Núverandi nafn gefur hins vegar til kynna hvar á landinu fjallið er niðurkomið. Hvaða nafn er það?
4. Hvað er gabbró?
5. Guðmundur Sigurjónsson lögfræðingur fæst nú aðallega við fasteignasölu, en hann var á árum áður kunnur fyrir allt annan hlut, og varð reyndar Íslandsmeistari á því sviði þrisvar sinnum. Hvaða svið var það?
6. Þann 24. júní 1987 fæddist í borginni Rosario piltur sem lét lítið yfir sér allra fyrstu árin en svo kom fljótlega í ljós að hann var sannkallaður meginsnillingur. Margir halda því meira að segja fram að pilturinn frá Rosario sé mesti snillingur heimsins og sögunnar á sínu sviði. Hvað heitir pilturinn?
7. Fyrir ekki löngu síðan gerðist það að stjórnmálamaður einn hugðist bjóða sig fram til varaformanns í flokki sínum. Félagarnir tóku því ekki betur en svo að staða varaformanns var umsvifalaust lögð niður. Hver er stjórnmálamaðurinn?
8. Henry Morgan, Sam Bellamy, Edward Teach, William Kidd, Anne Bonny og Calico Jack. Fyrir hvað voru þau kunn?
9. Hvað hét jökull einn, sem var kvaddur formlega árið 2019?
10. „Ég byggði mér hús við hafið / og hafið sagði ókei. / Hér er ég og ég heiti /
Hudson Bay.“ Hver orti svo?
***
Seinni aukaspurning:
Hver er maðurinn?
***
Svör við aðalspurningum:
1. Tiger Woods.
2. Mannapa. Athugið að svarið „górillur“ er rangt. Þá eruði að rugla Goodall saman við Dian Fossey og það gengur ekki. „Simpansar“ væri hins vegar rétt.
3. Eystrahorn.
4. Bergtegund. Svarið þarf ekki að vera nákvæmara en það. „Steintegund“ telst líka rétt þótt jarðfræðingar kjósi fremur „bergtegund“.
5. Skák.
6. Messi.
7. Vigdís Hauksdóttir.
8. Sjórán.
9. Ok.
10. Steinn Steinarr.
***
Svör við aukaspurningum.
Konan hét Linda McCartney.
Karlinn hét J.Edgar Hoover og var yfirmaður alríkislögreglunnar FBI í Bandaríkjunum.
***
Spurningaþrautin
Fyrri grein
247. spurningaþraut: Hvaða Elísabet einsetti sér að taka engan af lífi?
Næsta grein
Athugasemdir