***
Fyrri aukaspurning:
Á jóladag fyrir 29 árum – 25. desember 1991 – hélt þessi maður ræðu í sjónvarpið í heimalandi sínu. Hér má sjá skjáskot af ræðu hans. Hvað tilkynnti maðurinn í þeirri ræðu?
***
Aðalspurningar:
1. Justin Trudeau heitir forsætisráðherra í ákveðnu vestrænu ríki. Hann er fæddur á jóladag og heldur í dag upp á 49 ára afmælið sitt heima í ... hvaða landi?
2. Faðir Trudeaus var líka forsætisráðherra í sama landi, nær samfellt í 15 ár. Á þeim tíma var kona hans, móðir Justins Trudeaus, líka mikið í sviðsljósinu, en hún þótti helstil óþekk af forsætisráðherrafrú að vera. Einu sinni stakk hún til dæmis af með The Rolling Stones. Seinna var hún greind með bípolar-sjúkdóm og hefur fjallað um sjúkdóm sinn í bókum og á ýmsum öðrum vettvangi. Hvað heitir hún? – og hér er spurt um fornafn hennar.
3. Milli hvaða tveggja svæða er Beringssund?
4. Gásir hétu verslunarstaður á Íslandi á fyrri öldum. Verslun er þar löngu aflögð en staðurinn er rétt hjá núverandi þéttbýlisstað, og honum af stærri gerðinni. Hvaða þéttbýlisstaður er það?
5. Í hvaða landi er sú borg sem í gömlum íslenskum bókum var nefnd Rúðuborg, en heitir nú Rouen á landakortum?
6. Hver er menntun Sigurðar Inga Jóhannssonar samgöngu- og sveitarstjórnarráðherra?
7. Matador heitir íslenska útgáfan af frægu borðspili, sem í útlöndum heitir ...?
8. Matador er líka nafnið á frægri sjónvarpsseríu sem gerð var 1978-1982 og sýnd við miklar vinsældir víða, meðal annars á Íslandi. Frá hvaða landi kom þessi sería?
9. En hvaða þýðir annars orðið „matador“ yfirleitt í erlendum málum?
10. Jol heitir þorp eitt í heimi hér. Það er ekki stórt, því þar búa aðeins 32 manneskjur úr sjö fjölskyldum í örfáum húsum. Þorpið er skammt frá landamærum bæði Armeníu og Tyrklands, en í hvaða landi?
***
Síðari aukaspurning:
Hver er þetta?
***
Svör við aðalspurningum:
1. Kanada.
2. Margaret.
3. Síberíu og Alaska. Það má nefna Rússland/Asíu og Bandaríkin/Norður-Ameríku.
4. Akureyri.
5. Frakklandi.
6. Hann er dýralæknir.
7. Monopoly.
8. Danmörku.
9. Nautabani.
10. Íran. Hér er loftmynd af þessu litla þorpi.
***
Svör við aukaspurningum:
Sú fyrri mynd sýnir Mikhaíl Gorbatsjov tilkynna um afsögn sína sem leiðtogi Sovétríkjanna er fól um leið í sér að Sovétríkin voru lögð niður.
Seinni myndin sýnir Steinunni Ólínu. Hún er þarna í hlutverki sínu í sjónvarpsþáttunum Föngum, en óþarfi er að vita það.
***
Spurningaþrautin
Fyrri grein
242. spurningaþraut: Spurningar sem allar snúast um aðfangadag
Næsta grein
Athugasemdir