Hérna er 100. spurningaþrautin, sem birtist í gær.

Aukaspurningar eru þessar:

Efri myndin sýnir brot af frægri ljósmynd. Hvað sýnir myndin í heild?

En hver er á neðri myndinni?

1.   Við hvaða fjörð stendur þorpið Suðureyri?

2.   Árið 1940 varð Winston forsætisráðherra Bretlands. Hvað hét forveri hans í embætti?

3.   Hvað heitir fyrirtækið sem á álverið í Straumsvík?

4.   Kona ein að nafni Melanie Janine Brown eignaðist árið 2007 dóttur með bandaríska grínleikaranum Eddie Murphy, þótt reyndar þyrfti hún að hóta málssókn og láta gera DNA-próf til að hann viðurkenndi faðerni dótturinnar. Brown á reyndar alls þrjár dætur á aldrinum 9 til 21s árs. En undir hvaða nafni er Brown þekktust?

5.   Alexei Sanchez heitir fótboltakarl einn og er meðal þeirra hæstlaunuðu í heimi, þótt hann hafi raunar ekki getað rassgat síðustu misseri. Undir fána hvaða þjóðar spilar Sanchez?

6.   John Tyler hét stjórnmálamaður frá Virginíu í Bandaríkjum Norður-Ameríku. Í apríl 1841 tók hann við embætti forseta þar í landi og flutti inn í Hvíta húsið. Hvað þykir sérstaklega merkilegt við þessa valdatöku Tylers?

7.   Þóra Guðmundsdóttir er lögfræðingur. Hvar er hana helst að finna?

8.   Ein allra stysta smásaga í heimi er eftir Augusto Monterroso frá Hondúras. Hún er svona: „Þegar hann vaknaði var [xxx] enn á staðnum.“ En hver var það, sem var enn á staðnum í þessari sögu?

9.   Hver varð fyrstur eða fyrst til að vera bæði leikhússtjóri Leikfélags Reykjavíkur og síðan Þjóðleikhússtjóri?

10.   Hver samdi tónlistin við ballettinn Svanavatnið?

Og þá eru hér svörin:

1.   Súgandafjörð.

2.   Chamberlain.

3.   Rio Tinto.

4.   Mel B., söngkona í Spice Girls.

5.   Tjíle.

6.   Fyrsti varaforsetinn sem tók við þegar forseti dó í embætti.

7.   Í bókum Yrsu Sigurðardóttur.

8.   Risaeðlan.

9.   Sveinn Einarsson.

10.   Tjækovskí.

Aukaspurningar:

Efri myndin er hluti af víðfrægri ljósmynd sem tekin var í tengslum við mótmæli á Torgi hins himneska friðar árið 1989, þegar hugrakkur vegfarandi stöðvaði röð skriðdreka sem var á leið að ógna mótmælendum.

Hann var seinna handtekinn og hefur ekki sést síðan.

Myndin er hér til hægri.

Á neðri myndinni er aftur á móti æskumynd af Kamölu Harris, bandarískum stórnmálamanni, sem hugsanlega verður varaforsetaefni Joe Bidens forsetaframbjóðenda Demókrata fyrir vestan sjó.

Hér til hægri má sjá nýlegri mynd af Harris, sem undanfarið hefur verið öldungadeildarþingmaður í Kaliforníu.