Í 27. sinn birtist hér spurningaþraut. Tíu spurningar og tvær í kaupbæti:

Hér fyrir ofan er ein frægasta ljósmynd síðari heimsstyrjaldar og sýnir bandaríska hermenn reisa fána sinn á eyju sem þeir höfðu náð af Japönum eftir harða bardaga. Myndin er glæsileg og segir sína sögu, þótt hún hafi reyndar verið tekin að beiðni ljósmyndarans. En á hvaða eyju er hún tekin?

Og hin aukaspurningin:

Hvað heitir karlinn á myndinni hér að neðan?

En hinar „10 af öllu tagi“ eru svona: 

1.   Hvað heitir höfuðborg Írlands?

2.   Árið 2003 fundust á eyjunni Flores leifar beinagrind konu einnar, er reyndist vera af áður óþekktri manntegund. Og sú tegund kom mönnum alveg í opna skjöldu. Hvers vegna?

3.   En meðal annarra orða, hvaða ríki tilheyrir eyjan Flores? 

4.   Ragnar í Smára var mikill menningarfrömuður á Íslandi um miðbik 20. aldar og gaf sig ekki síst að bókaútgáfu. „Smári“ sá sem Ragnar var kenndur við var hins vegar allt öðruvísi fyrirtæki, er hann rak og færði honum salt í grautinn. Hvað varningur tengdist Smára umfram allt í vitund fólks?

5.   Hvað hét söngkonan sem söng með Hljómum og Trúbrot hér fyrrmeir?

6.   Hvað heitir breskur fótboltakappi, kornungur, sem spilar nú með liði Borussia Dortmund í Þýskalandi en er nú gjarnan orðaður við flestöll stærstu liðin á Englandi og jafnvel víðar?

7.   Hversu hár var hæsti gíraffi sem vitað er um? Hér má skeika 30 sentímetrum til eða frá.

8.   Sam Slater heitir maður nokkur, tónskáld og alhliða upptöku- og tónlistarmaður. Hann er enskur en býr reyndar ekki í heimalandi sínu. Hver skyldi nú vera konan hans?

9.   Hvað heitir sitjandi formaður Flugfreyjufélagsins sem nú stendur í ströngu í kjarabaráttu?  Óhætt er að láta uppi að um konu er að ræða, og hún gegnir starfinu þangað til hinn kjörni formaður snýr til baka úr fæðingarorlofi í haust. Óþarfi er að muna föðurnafn hins sitjandi formanns.

10.   Árið 2011 vann íslensk stúlka í fyrsta sinn gullverðlaun á virtasta CrossFit móti heimsins. Hún endurtók svo leikinn ári síðar. Hvað heitir hún, og hér má líka sleppa föðurnafni?

Þá eru hér svörin:

1.   Dublin.

2.   Hún var svo smávaxin, aðeins um einn metri á hæð.

3.   Indónesíu.

4.   Smjörlíki.

5.   Shady Owens.

6.   Jadon Sancho.

7.   5,80 metrar. Rétt telst því vera allt frá 5,50 til 6,10.

8.   Hildur Guðnadóttir.

9.   Guðlaug Líney heitir hún og er Jóhannsdóttir, en það dugar að þekkja fornöfnin tvö.

10.   Annie Mist - og hún er reyndar Þórisdóttir.

Svörin við aukaspurningunum eru Ívo Jíma og tónlistarmaðurinn Kanye West.

Hér er svo þrautin frá í gær.

En næsta þraut, hún er aptur á móti hvergi nema hérna.