Hér er komin spurningaþrautin „10 af öllu tagi“ númer 25.
Aukaspurningar eru þessar:
Í hvaða borg er efri myndin tekin?
Hvað nefnist sú hvalategund sem sést á neðri myndinni?
En hér er svo spurt:
1. Inn af Húnaflóa ganga nokkrir firðir. Við einn þeirra stendur bærinn Hvammstangi. Hvað heitir sá fjörður?
2. Reikistjarnan Júpíter hefur um sig tugi tungla, en fjögur þeirra eru langstærst. Þau heita Ganymede, Callisto, Íó og … hvað heitir það fjórða?
3. Nína Dögg Filippusdóttir, Gísli Örn Garðarson og fleiri komu fyrst fram á sjónarsviðið í íslensku listalífi með litlu leikhúsi eða leikhópi sem kallaðist …?
4. Lilja Alfreðsdóttir er menntamálaráðherra. Hvað er millinafn hennar?
5. Jósef Stalín leiðtogi Sovétríkjanna átti eina dóttur. Mikla athygli vakti þegar hún stakk af frá Sovétríkjunum árið 1967. Hvað hét hún? Hér dugar fornafn hennar.
6. Fyrir fimm árum, eða 2015, gerðist það í fyrsta sinn að blaðamaður fékk Nóbelsverðlaun í bókmenntum. Margir fyrri Nóbelsverðlaunahafa höfðu vissulega fengist mikið við blaðamennsku, en þessi höfundur frá Hvíta-Rússlandi hefur eingöngu sinnt blaðamennsku með mögnuðum viðtalsbókum þar sem fólk á ýmsum sviðum segir frá. Hvað heitir þessi Nóbelsverðlaunahafi?
7. Kvikmyndastjarna nokkur fæddist árið 1905, náði ung heimsfrægð en er eftir á kunnust fyrir setninguna: „Ég vil vera ein,“ sem hún sagði í fleiri en einni bíómynd. Hún lést ein árið 1990. Hvað hét hún?
8. Hvað er fullt nafn ungu sænsku stúlkunnar sem orðið hefur kunn fyrir umhverfisbaráttu sína síðustu misseri?
9. Nú er að sjá hvort einhver man eftir Hróa hetti. Í sögunum um baráttu hans við að stela frá hinum ríku og gefa þeim fátæku er jafnan við hlið hans dyggur vinur og traustur baráttufélagi, heljarmenni að burðum. Hvað nefnist sá?
10. Sigríður Tómasdóttir hét kona og er oft sögð hafa „bjargað Gullfossi“ þegar erlendir auðmenn ætluðu að kaupa fossinn í byrjun 20. aldar. Sigríður er jafnan kennd við bæinn þar sem hún bjó alla ævi. Hvað hét hann?
Hér eru svörin:
1. Miðfjörður.
2. Evrópa.
3. Vesturport.
4. Dögg.
5. Svetlana Allilújéva. En Svetlana dugar.
6. Svetlana Alexeév.
7. Greta Garbo.
8. Greta Thunberg.
9. Litli Jón.
10. Brattholt.
Efri myndin er tekin í Jerúsalem, eins og þekkja má af Al Aqsa moskunni sem aðeins sést í lengst til hægri.
Og hvalur sá hinn bægslamikli er hnúfubakur.
Hér er þrautin frá í gær. Tékkið endilega á henni líka.
Næsta þraut er hins vegar hér. Þar er líka spurt um allt mögulegt merkilegt.
Spurningaþrautin
Fyrri grein
Spurningaþraut 25: Drekaflug, Frankar og Jónar
Næsta grein
Athugasemdir