Stundin hlaut í dag tvenn blaðamannaverðlaun á verðlaunaafhendingu Blaðamannafélags Íslands. Annars vegar var Stundin verðlaunuð í flokknum umfjöllun ársins vegna greina um hamfarahlýnun og hins vegar í flokknum rannsóknarblaðamennska ársins ásamt Kveik á RÚV fyrir umfjöllun um Samherjaskjölin.
Fern blaðamannaverðlaun voru veitt í húsakynnum Blaðamannafélags Íslands í dag. Auk Stundarinnar voru verðlaun veitt Arnari Páli Haukssyni á Speglinum á Rás 1, í flokknum blaðamannaverðlaun Íslands, vegna umfjöllunar um kjaramál og vinnumarkað. Þá voru blaðamennirnir Erla Björg Gunnarsdóttir, Nadine Guðrún Yaghi, og Jóhann K. Jóhannsson, Kompási, Fréttastofu Stöðvar 2, Vísis og Bylgjunnar, verðlaunuð fyrir viðtal ársins, við sautján ára stúlku sem lokuð var inni á heimili með móður sem glímdi við geðraskanir.
Umfjöllun um Samherjamálið verðlaunuð
Í rökstuðningi dómnefndar Blaðmannafélags Íslands vegna verðlauna í flokki rannsóknarblaðamennsku segir að umfjöllun um Samherjaskjölin hafi „haft mikil áhrif“.
„Fá mál vöktu meiri athygli í íslensku samfélagi en umfjöllun Kveiks og Stundarinnar í samvinnu við Al Jazeera og Wikileaks um ásakanir á hendur Samherja“
Verðlaunin voru veitt Aðalsteini Kjartanssyni, Helga Seljan og Stefáni Drengssyni hjá Kveik, og svo Inga Frey Vilhjálmssyni hjá Stundinni. „Fá mál vöktu meiri athygli í íslensku samfélagi en umfjöllun Kveiks og Stundarinnar í samvinnu við Al Jazeera og Wikileaks um ásakanir á hendur Samherja um mútugreiðslur í tengslum við starfsemi fyrirtækisins í Namibíu. Umfjöllunin byggði staðhæfingum fyrrum starfsmanns Samherja í Namibíu og miklu magni gagna sem einnig voru gerð aðgengileg almenningi á netinu samhliða birtingu frétta af málinu. Umfjöllunin hefur haft mikil áhrif, bæði hér heima og erlendis.“
Umfjöllun ársins um hamfarahlýnun
Þá voru Alma Mjöll Ólafsdóttir, Jóhann Páll Jóhannsson, Margrét Marteinsdóttir, og Steindór Grétar Jónsson verðlaunuð fyrir „yfirgripsmikla og vandaða umfjöllun um fyrirséðar afleiðingar og birtingarmyndir loftslagsvár hér á landi og víðar, aðgerðir stjórnvalda og viðleitni einstaklinga til þess að vega upp á móti skaðlegum umhverfisáhrifum sem stafað geta af daglegu lífi fólks.“
Í umfjölluninni var meðal annars fjallað um afleiðingar loftslagsvandans fyrir Ísland og Íslendinga, rætt við fólk sem breytt hefur lífi sínu í þágu baráttunnar gegn hamfarahlýnun og rýnt í aðgerðir stjórnvalda.
Alls hlutu sex blaðamenn tilnefningu til verðlauna vegna umfjallana í Stundinni í fyrra. Hólmfríður Helga Sigurðardóttir, blaðamaður Stundarinnar, var einnig tilnefnd í flokknum blaðamannaverðlaun Íslands, „fyrir vönduð viðtöl og umfjallanir“.
Tilkynning um blaðamannverðlaun
Rökstuðningur og val dómnefndar Blaðamannafélags Íslands
Besta umfjöllun
Verðlaunin hlutu þau Alma Mjöll Ólafsdóttir, Jóhann Páll Jóhannsson, Margrét Marteinsdóttir, og Steindór Grétar Jónsson, Stundinni, fyrir umfjöllun um hamfarahlýnun. Rök dómnefndar voru eftirfarandi: „Í yfirgripsmikilli og vandaðri umfjöllun fjalla blaðamenn Stundarinnar um fyrirséðar afleiðingar og birtingarmyndir loftslagsvár hér á landi og víðar, aðgerðir stjórnvalda og viðleitni einstaklinga til þess að vega upp á móti skaðlegum umhverfisáhrifum sem stafað geta af daglegu lífi fólks.“
Aðrir tilnefnir í þessum flokki voru Arnhildur Hálfdánardóttir, RÚV, fyrir þáttaröðina Loftslagsþerapían og þeir Magnús Halldórsson og Þórður Snær Júlíusson, Kjarnanum, fyrir umfjöllun um efnahagsmál
Viðtal ársins
Verðlaunin hljóta þau Erla Björg Gunnarsdóttir, Nadine Guðrún Yaghi, og Jóhann K. Jóhannsson, Kompási, Fréttastofu Stöðvar 2, Vísis og Bylgjunnar, fyrir viðtal og umfjöllun um barn sem var lokað inni á heimili með geðveikri móður. Rök dómnefndar voru eftirfarandi: „Vandað viðtal við 17 ára stúlku, Margréti Lillý Einarsdóttur, sem lýsir því hvernig samfélagið brást henni þegar hún á grunnskólaaldri ólst upp ein hjá móður sem átti við bæði geðrænan vanda og fíknivanda að stríða. Viðtalið vakti verðskuldaða athygli og var fylgt eftir með fjölda frétta um stöðu barna í viðkvæmri stöðu, starfsemi barnaverndarnefnda og fleiri þætti og leiddi meðal annars til þess að bæjarstjóri Seltjarnarness baðst formlega afsökunar á því hvernig staðið var að málum í tilviki Margrétar Lillýar.“
Aðrir tilnefndir í þessum flokki voru Orri Páll Ormarsson, Morgunblaðinu, fyrir viðtal við Sævar Þór Jónsson lögmann og Ari Brynjólfsson, Fréttablaðinu, fyrir viðtal við fjóra erlenda vagnstjóra.
Rannsóknarblaðamennska
Verðlaunin hljóta þeir Aðalsteinn Kjartansson, Helgi Seljan, Ingi Freyr Vilhjálmsson og Stefán Drengsson, Kveik og Stundinni, fyrir umfjöllun um Samherjamálið. Rök dómnefndar eru eftirfarandi: „Fá mál vöktu meiri athygli í íslensku samfélagi en umfjöllun Kveiks og Stundarinnar í samvinnu við Al Jazeera og Wikileaks um ásakanir á hendur Samherja um mútugreiðslur í tengslum við starfsemi fyrirtækisins í Namibíu. Umfjöllunin byggði staðhæfingum fyrrum starfsmanns Samherja í Namibíu og miklu magni gagna sem einnig voru gerð aðgengileg almenningi á netinu samhliða birtingu frétta af málinu. Umfjöllunin hefur haft mikil áhrif, bæði hér heima og erlendis.“
Aðrir tilnefndir í þessum flokki voru þeir Aðalsteinn Kjartansson og Stefán Drengsson, Kveik, fyrir umfjöllun um Procar-málið og Stefán Einar Stefánsson, Morgunblaðinu, fyrir bókina „Wow, ris og fall flugfélags“ ásamt fréttum og fréttaskýringum um sama mál.
Blaðamannaverðlaun ársins
Verðlaunin hlýtur Arnar Páll Hauksson, Speglinum, RÚV, fyrir umfjöllun um kjaramál.Rök dómnefndar voru eftirfarandi: „Arnar Páll hefur af djúpri þekkingu og áralangri yfirsýn fjallað um kjaramál með afar vönduðum hætti í ótal fréttum og fréttaskýringum á tímum mikils umróts á vinnumarkaði. Hann hefur fjallað ítarlega um hugmyndir og tillögur sem lagðar hafa verið fram í kjaraviðræðum og flytur iðulega fyrstu fréttir af þróun mála.“
Aðrir tilnefndir í þessum flokki voru Guðrún Hálfdánardóttir, mbl.is, fyrir greinaflokkinn Skóli fyrir alla og Hólmfríður Helga Sigurðardóttir, Stundinni, fyrir vönduð viðtöl og umfjallanir.
Athugasemdir