Sigríður gerir enga kröfu um sæti á lista og Brynjar kveður stjórnmálin

Sigríður Á. Andersen, þing­maður Sjálf­stæð­is­flokks og fyrr­ver­andi dóms­mála­ráð­herra, mun ekki gera kröfu um að vera á lista flokks­ins í Reykja­vík í kom­andi þing­kosn­ingum. Frá þessu greinir hún í stöðu­upp­færslu á Facebook.

[links]Á sama vett­vangi greinir Brynjar Níelsson, þing­maður Sjálf­stæð­is­flokks, frá því að hann kveðji stjórn­málin sáttur.

Sigríður sótt­ist eftir öðru sæt­inu í próf­kjöri flokks­ins í Reykja­vík sem lauk í gær. Þegar taln­ingu atkvæða var lauk lá hins vegar fyrir að hún varð ekki á meðal átta efstu. Í ljósi þess að Sjálf­stæð­is­flokk­ur­inn hefur sem stendur fimm þing­menn i Reykja­vík og er að mæl­ast með fjóra til fimm í könn­unum þá liggur fyrir að Sigríður átti nær enga mögu­leika að halda sér á þingi miðað við nið­ur­stöðu próf­kjörs­ins.

[adspot]Sigríður segir í stöðu­upp­færsl­unni að hún þakki fyrir það þegar nokkur þús­und merki við hana á kjör­seðli þótt það hafi ekki dugað til að ná þeim árangri sem að hafi verið stefnt að þessu sinni. „Ég mun láta kjör­nefnd flokks­ins, sem vinnur úr nið­ur­stöð­unni, vita að ég geri enga kröfu um sæti á fram­boðs­lista flokks­ins. Sem fyrr verð ég til­búin til að leggja sjálf­stæð­is­stefn­unni lið hvar og hvenær sem er. Hún sam­einar íhalds­semi og frjáls­lyndi á svo fal­legan hátt. Ég óska Guðlaugi Þór og Áslaugu Örnu til ham­ingju með skýrt umboð til að leiða fram­boðs­lista flokks­ins í borg­inni. Diljá Mist og Hildur mega sömu­leiðis vera stoltar af árangrinum.”

Brynjar sótt­ist líka eftir öðru sæt­inu en end­aði í fimmta. Í stöðu­upp­færslu á Facebook segir hann að úrslitin séu „tals­verð von­brigði fyrir mig en skila­boðin eru skýr. Ég trúi því að Sjálftæð­is­flokknum muni vegna vel í kom­andi kosn­ingum. Ég kveð því stjórn­málin sáttur.”