Trump: Kemur til greina að aflétta ferðabanni á ákveðin ríki

Donald Trump, for­seti Banda­ríkj­anna, sagði á blaða­manna­fundi í dag að til greina kæmi að bæta Bret­landi á lista yfir þau Evr­ópu­lönd sem ferða­bannið til Banda­ríkj­anna sem hann lýsti í vik­unni yfir að sett yrði á. 

Þá kæmi einnig til greina að end­ur­skoða veru ann­arra ríkja sem eru sem stendur á list­anum. Á meðal þeirra ríkja sem ferða­bannið, sem tekur gildi á mið­nætti, nær yfir er Ísland.

Trump greindi frá því að ferða­bannið yrði sett á aðfara­nótt fimmtu­dags. Ferða­bannið, sem á að standa yfir í 30 daga, mun að óbreyttu virka þannig að öllum íbúum landa sem til­heyra Schengen-svæð­inu, þar á meðal Ísland og þorri Evrópu, verður meinað að koma til Banda­ríkj­anna á tíma­bil­inu. Banda­rískir rík­is­borg­arar og aðrir sem eru með fasta búsetu í Banda­ríkj­unum munu fá að ferð­ast ef þeir vilja en sam­kvæmt frétta­til­kynn­ingu sem birt var í kjöl­far yfir­lýs­ingar Trump um ferða­bannið á vef heima­varn­ar­ráðu­neyt­is­ins mun þeim banda­rísku far­þegum sem dvalið hafa á Schengen-svæð­inu hleypt inn í landið í gegnum valda flug­velli þar sem sér­stakar ráð­staf­anir verða gerðar til að skima fyrir smiti.

[adspot]Sú stað­reynd, að Banda­ríkja­menn eru allra þjóða lík­leg­astir til að heim­sækja Ísland heim, gera Banda­ríkin að stærsta ein­staka við­skipta­land Íslands í þjón­ustu­út­flutn­ingi, sem í felst aðal­lega sala á ferða­þjón­ustu. Á árinu 2018, þegar sá þjón­ustu­út­flutn­ingur náði hámarki, var hann 32 pró­sent af öllum heild­ar­út­flutn­ingi Íslands á þjón­ustu. Samkvæmt bráða­birgð­ar­tölum Hagstofu Íslands fyrir síð­asta ár var hann 29,2 pró­sent það árið. Alls var um að ræða 202 millj­arða króna í þjón­ustu­tekjum sem koma frá þessu eina landi. 

Þjón­ustu­jöfn­uður Íslands, mun­ur­inn á útfluttri og inn­fluttri þjón­ustu, var jákvæður um 239 millj­arða króna í fyrra sam­kvæmt bráða­birgða­tölum. Heild­ar­tekjur íslenska þjóð­ar­bús­ins af þjón­ustu­út­flutn­ingi, sem aftur er að lang­mestu leyti ferða­þjón­ustu­tengdur, voru 692 millj­arðar króna í fyrra. Þessar tekjur eru nú ekki að koma inn í landið að stóru leyti ekki að koma inn í landið og algjör óvissa ríkir um hvernig háanna­tím­inn í ferða­þjón­ustu, sem er sum­ar­tím­inn, muni koma út þótt að við­búið sé að sam­dráttur upp á tugi pró­senta muni eiga sér stað.

Íslensk stjórn­völd komu á fram­færi í gær­morgun hörðum mót­mælum við aðgerð­unum. Guð­laugur Þór Þórð­ar­son utan­rík­is­ráð­herra átti þá sam­tal við sendi­herra Banda­ríkj­anna, og í kjöl­farið fund með stað­gengli hans, til þess að koma mót­mælum á fram­færi. Guð­laugur Þór á að eiga fund með Mike Pompeo, utan­rík­is­ráð­herra Banda­ríkj­anna, í næstu viku vegna máls­ins. Þar verður farið fram á að Ísland verði und­an­skilið frá ferða­bann­inu, meðal ann­ars vegna land­fræði­legrar legu lands­ins.