Heimilislausa leikhúsið Ethos var starfrækt í sumar með það að markmiði að virkja fólk af jaðrinum til listsköpunar. Leikhópurinn setti upp sýninguna Verð að heiman í dag á Menningarnótt og komust færri að en vildu. Herbert Marínósson varð ein af stjörnum sýningarinnar með flutningi sínum á ljóðum eftir Sigfús Daðason. Eyþór Árnason ljósmyndari fékk að fylgjast með og öðlast innsýn inn í líf utangarðsmanns í Reykjavík.
Ilmur Kristjánsdóttir og Rúnar Guðbrandsson stýrðu leikhópnum sem var samansettur af ólíkum einstaklingum í ólíkum aðstæðum. Tilgangurinn var að búa hugmyndum þessa fólks listræna umgjörð og skapa sviðslistaverk sem byggði á reynslu þeirra og sérstöðu.
Leikararnir komu flestir úr leikhópi sem starfræktur hefur verið í Hlutverkasetrinu, endurhæfingarúrræði fyrir fólk sem hefur verið að glíma við geðraskanir, félagsfælni og kvíða. Auk þess tóku tveir hælisleitendur þátt í sýningunni, frá Egyptalandi og Kúrdistan, sem báðir koma úr sama heimshlutanum og tala arabísku en annar er trúaður múslimi og hinn á flótta undan ofstæki múslima.
Tveir þátttakendur er heimilislausir, Herbert og kona á sjötugsaldri sem söng eins og engill. Urðu þau strax kóngurinn og drottningin í hópnum og fóru með lykilhlutverk í sýningunni.
Athugasemdir