Illugi Gunnarsson menntamálaráðherra undirritaði opinberan samstarfssamning við kínverska ríkið um jarðvarmaverkefni þar í landi þar sem Orka Energy Ltd, fyrirtæki sem hann áður starfaði hjá, var fulltrúi Íslands ásamt íslenska ríkisfyrirtækinu Orkustofnun.

Þetta kemur fram í samningnum um þessa samvinnu á sviði jarðvarmarannsókna sem menntamálaráðuneytið hefur sent Stundinni ásamt öðrum gögnum um skipulagningu á opinberri heimsókn Illuga Gunnarssonar menntamálaráðherra til Kína í mars síðastliðnum. Um er að ræða umtalsvert magn gagna sem Stundin mun vinna úr og segja frá á næstunni. Í gögnunum kemur fram hvernig opinber heimsókn Illuga Gunnarssonar var ákveðin og skipulögð og samanstanda gögnin af dagskrárdrögum, tölvupóstum, bréfum og öðru.