Fjöldi íbúða á sölu á höfuðborgarsvæðinu er nú minni en hann hefur verið á síðustu árum, auk þess sem hlutfall íbúða sem seldar eru á yfirverði hefur nær tvöfaldast. Á sama tíma hefur meðalsölutími dregist hratt saman á höfuðborgarsvæðinu og verðvísitalan hefur hækkað um tæp sex prósent. Þetta kemur fram í nýjustu mánaðarskýrslu Húsnæðis- og mannvirkjastofnunar (HMS), sem kom út í morgun.
Íbúðum á sölu fækkar verulega
Samkvæmt skýrslunni er mikil eftirspurn eftir húsnæði undanfarna mánuði farin að hafa mikil áhrif á framboð af eignum. Meðalfjöldi eigna til sölu á höfuðborgarsvæðinu, sem verið á bilinu 1.600 til 2.200 eignir, hefur einnig minnkað hratt. Eftir fyrra samkomubannið í vor var þessi fjöldi í hámarki eða um 2.200 eignir og hefur síðan þá lækkað niður fyrir 1.200 eignir, sem er mun minna framboð en hefur verið á síðustu árum.
Verð hækkar í höfuðborginni en lækkar á landsbyggðinni
Með aukinni eftirspurn og minna framboði af eignum á sölu hefur verð hækkað töluvert á árinu og virðist vera mikil samkeppni um eignir. Hækkunin er sérstaklega mikil á höfuðborgarsvæðinu, en á milli októbermánaða 2019 og 2020 hefur vísitala söluverðs íbúða þar hækkað um 5,8 prósent. Í nágrenni höfuðborgarsvæðisins hefur vísitalan svo hækkað um 4,2 prósent. Annars staðar á landinu hefur vísitalan hins vegar lækkað um 1,8 prósent á tímabilinu.
Minni sölutími og fleiri íbúðir á yfirverði
Eftir því sem virknin á fasteignamarkaðnum á höfuðborgarsvæðinu hefur aukist hefur hlutfall íbúða sem seljast yfir ásettu verði einnig aukist til muna. Í júní seldust 11 prósent íbúða á yfirverði, en í október seldist rúmur fimmtungur íbúðanna á yfirverði, ef miðað er við þriggja mánaða hlaupandi meðaltal.
Á sama tíma hefur meðalsölutími dregist hratt saman á höfuðborgarsvæðinu síðan í vor, en samkvæmt HMS er það í samræmi við að framboðið sé að dragast saman, verðið sé að hækka og fleiri eignir að fara á yfirverði. Samkeppnin um eignir virðist vera mikil og því styttist sölutíminn.
Sölutími nýrra eigna á höfuðborgarsvæðinu fór hæst upp í 79 daga að meðaltali í samkomubanninu, en hefur nú styst niður í 61 dag. Fyrir aðrar eignir hefur tíminn styst úr 49 dögum niður í 43 og hefur ekki mælst jafnstuttur síðustu sjö árin.
Búist við meiri verðhækkunum
Samkvæmt skoðanakönnun sem Zenter gerði fyrir HMS í nóvember þá telja 70 prósent svarenda að fasteignaverð muni koma til með að hækka á næstu 12 mánuðum. Einungis 6 prósent sveranda telja að fasteignaverð muni lækka á tímabilinu. Samhliða væntingum um áframhaldandi verðhækkunum bendir könnunin til þess að áhugi fólks á að kaupa sér íbúð í náinni framtíð hafi dvínað, miðað við sambærilegar kannanir í apríl og júlí á þessu ári. Þó er hlutfall væntanlegra kaupenda hátt, ef litið er aftur til síðustu þriggja ára.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.













































Athugasemdir