Eignarhaldsfélag sem hefur séð um umsýslu fyrir Heimavelli leigufélag slhf. fékk samtals rúmlega 480 milljónir króna á árunum 2015 til 2017 í umsýslutekjur vegna ráðgjafastarfa fyrir leigufélagið.
Eignarhaldsfélagið, sem heitir Heimavellir GP, er að mestu í eigu félaga í í eigu Magnúsar Pálma Örnólfssonar, fjárfestis og fyrrverandi starfsmanns Glitnis, Magnúsar Magnússonar, fjárfestis og stjórnarformanns Heimavalla, Halldórs Kristjánssonar, stjórnarmanns í Borgun, og Sturlu Sighvatssonar, athafnamanns og fyrrverandi framkvæmdastjóra Heimavalla. Auk þess áttu Ari Edwald, forstjóri Mjólkursamsölunnar, og Arnar Gauti Reynisson, fjármálastjóri Heimavalla, báðir 2,5 prósenta hlut í félaginu.
Frá þessu er greint í Fréttablaðinu í dag. Þar segir að Heimavellir GP hafi unnið að greiningu og framkvæmd fjárfestinga. Samkvæmt samningi fékk félagið hlutfallslega þóknun sem nam einu prósenti af fasteignamati fjárfestingareigna í rekstri Heimavalla leigufélags á ári.
Eiga rúmlega tvö þúsund íbúðir
Heimavellir er stærsta einkarekna leigufélag landsins. Til stendur að skrá það á markað á allra næstu vikum. Í lok árs í fyrra voru eignir þess metnar á 53,6 milljarða króna og jókst virði þeirra um 12,9 milljarða króna á milli ára.
Rekstrarhagnaður nam 2,7 milljörðum en var 2,2 milljarðar árið 2016.
Leigutekjur á árinu 2017 voru rúmlega þrír milljarðar, sem er tvöföldun frá árinu 2016. Matsbreyting á virði eigna, meðal annars vegna hækkandi fasteignamats, nam 3,8 milljörðum króna, samkvæmt tilkynningu frá félaginu.
Í árslok í fyrra átti félagið rúmlega tvö þúsund íbúðir, en það hefur tryggt sér kaup á 340 nýjum íbúðum á þessu ári.
Vaxtaberandi skuldir félagsins eru tæplega 35 milljarðar króna og eigið fé þess 17,6 milljarðar. Eiginfjárhlutfallið er 31,4 prósent.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.












































Athugasemdir