Vill að Alþingi komi saman og afnemi kröfu um meðmælendalista

Núna í aðdrag­anda kosn­inga var sett upp nýtt raf­rænt kerfi á Ísland.is, þar sem kjós­endur geta mælt með fram­boðum stjórn­mála­flokka, svo þeir fái að bjóða fram til þings í lok sept­em­ber. Í gær voru hnökrar í kerf­inu og var það ekki í fyrsta sinn, en ávallt hefur verið leyst úr málum, sam­kvæmt svörum dóms­mála­ráðu­neyt­is­ins til Kjarnans.

Björn Leví Gunn­ars­son þing­maður Pírata telur vand­kvæðin á raf­ræna kerf­inu þó hafa verið svo alvar­leg að Alþingi ætti að koma saman sem fyrst og afnema kröfur sem gerðar eru um með­mæl­endur fram­boða fyrir kom­andi kosn­ingar. Þetta viðr­aði þing­mað­ur­inn á sam­fé­lags­miðlum í gær og seg­ist í sam­tali við Kjarnann enn vera sömu skoð­unar.

Hann nefndi sömu­leiðis við blaða­mann að hann væri búinn að láta Guðna Th. Jóhann­es­son, for­seta Íslands, vita af mál­inu.

Það seg­ist Björn Leví hafa gert þar sem þing var form­lega rofið í upp­hafi ágúst­mán­aðar á rík­is­ráðs­fundi á Bessa­stöðum. Ef það ætti að kalla þingið saman að nýju til þess að stroka út kröfur um með­mæl­enda­lista þyrfti for­set­inn að koma að því ferli.

Stafrænn leiðtogi kallaður til

Þing­mað­ur­inn er ekki eini Píratinn sem hefur lýst yfir óánægju með ein­hverjar villur í kerf­inu. Gísli Ólafsson, fram­bjóð­andi Pírata í Suð­vest­ur­kjör­dæmi, sagði á Facebook í gær að hann og aðrir sem væru að safna und­ir­skriftum fyrir flokk­inn væru að lenda í því að und­ir­skrift­irnar væru ekki að skila sér eins og búast mætti við, þar sem kerfið væri sífellt að detta niður og bila.

„Við og aðrir stjórn­mála­flokkar höfum ítrekað kvartað til þeirra en ekk­ert ger­ist og nú þegar aðeins eru rúmar tvær vikur þar til und­ir­skriftir þurfa að vera komnar, þá lítur allt út fyrir að við þurfum að fara gegn COVID ráð­legg­ingum og safna þessu í per­sónu,“ sagði Gísli í færslu sinni.

Hann benti Áslaugu Örnu Sig­ur­björns­dóttur dóms­mála­ráð­herra og Andra Heiðari Krist­ins­syni, sem er staf­rænn leið­togi í fjár­mála- og efna­hags­ráðu­neyt­inu, á villu sem gerði þeim sem vilj­ugir voru til þess að ljá ein­hverju stjórn­mála­afli með­mæli sín raf­rænt ókleift að gera það.

Andri Heiðar sagð­ist í svari til Gísla ætla að skoða málið og sagði svo að brugð­ist hefði verið við þess­ari villu í kerf­inu, sem hefði stafað af gömlu SSL-skíl­ríki hjá Þjóðskrá sem runnið hefði út.

Kjarninn spurð­ist fyrir um málið hjá dóms­mála­ráðu­neyt­inu í gær og fékk þau svör síð­degis að gagna­teng­ing söfn­un­ar­kerfis með­mæl­enda­list­ans við Þjóðskrá hefði rofnað og væri nýkomin aftur á.

Segjast hafa leyst úr öllum vandræðum

„Notendur á þeim tíma hafa að lík­indum lent í vand­ræðum með að skrá sig,“ sagði Fjalar Sig­urð­ar­son upp­lýs­inga­full­trúi dóms­mála­ráðu­neyt­is­ins í svari til Kjarnans. Í kjöl­farið spurði blaða­maður hvort þetta væru einu vand­kvæðin sem til­kynnt hefði verið um í sam­bandi við með­mæla­kerfið. Svo er ekki.

[adspot]

„Frá því kerfið var sett í gang hefur ráðu­neytið annað slagið fengið ábend­ingar um hnökra og hefur ráðu­neytið ávallt brugð­ist strax við því svo úr mætti bæta,“ segir í svari dóms­mála­ráðu­neyt­is­ins. Þar segir að ein­hverjir ann­markar hafi verið tækni­legs eðlis, „en einnig var eitt­hvað um mis­tök þeirra sem stofna listana á vefnum.“ Ávallt hefði verið leyst úr málum.

Vert er að taka fram að blaða­maður er búinn að prófa að nota kerfið til þess að veita fram­boði með­mæli. Það gekk smurt fyrir sig.

„Ráðu­neytið hefur frá upp­hafi verið í þéttum og góðum sam­skiptum við full­trúa stjórn­mála­flokk­anna, kynnt fyrir þeim kerfið og fundað með þeim og tækni­fólki til að fara yfir þau vanda­mál sem upp hafa komið við notkun á kerf­inu. Okkar tengiliðir hjá flokk­unum hafa unnið þetta verk­efni af yfir­vegun með ráðu­neyt­inu,“ segir einnig í svari ráðu­neyt­is­ins.

Hvert einasta framboð þarf 1.890 undirskriftir

Allir flokkar sem ætla að bjóða fram til Alþingis í haust þurfa að safna að minnsta kosti 1.890 und­ir­skriftum frá almenn­ingi, en þeim er gert skylt að skila inn á milli 30 og 40 und­ir­skriftum fyrir hvert þing­sæti sem er í boði.

Framboð í Norð­vest­ur­kjör­dæmi þarf því að skila 240 und­ir­skriftum hið minnsta, enda 8 þing­menn í kjör­dæm­inu, á meðan fram­boð í Suð­vest­ur­kjör­dæmi þarf að skila inn 390 gildum und­ir­skriftum frá kjós­endum þar sem þing­menn kjör­dæm­is­ins eru 13 tals­ins.

Hver og einn ein­stak­lingur getur ein­ungis mælt með einu fram­boði í sínu kjör­dæmi. Ellefu flokkar hafa boðað að þeir ætli sér að bjóða fram til Alþingis eftir mánuð og ef það á allt saman að ganga upp þurfa að minnsta kosti 20.790 kjós­endur að ljá ein­hverjum lista sín með­mæli.

Þetta er því nokkur vinna fyrir flokk­ana í aðdrag­anda kosn­inga, eins og Stefán Pálsson sagn­fræð­ingur, sem þekkir vel til í her­búðum Vinstri grænna, nefndi á Twitter á dög­unum.

Björn Leví segir við Kjarnann að það sé alltaf mikil vinna fyrir fram­boðin að safna und­ir­skrift­unum í aðdrag­anda kosn­inga. Rafræna kerfið hafi alveg hjálpað til og virst vera mjög aðgengi­legt, þar til upp hafi komið villur sem geri það að verkum að kerfið sé ekki aðgengi­legt.

Hann seg­ist hugsi yfir því að þurfa mögu­lega að fara að stökkva af stað núna, á mun skemmri tíma en verið hefur, til að safna und­ir­skriftum með gamla lag­inu. „Þetta er bara stress,“ segir Björn Leví.