Fréttir kosningar2016

Síðustu leiðtogaumræðurnar

27. október 2016 · 18:51

Birtist upphaflega á Kjarnanum fyrir rúmum 10 árum.

Kjarninn verður með beina útsendingu á vefnum fram yfir kosningar
Sjálfstæðisflokkurinn mælist stærsti flokkur landsins rétt fyrir kosningar
Síðustu leiðtogaumræðurnar eru að hefjast á RÚV

Lýsingu lokið Nýjasta færsla kl. 21:41

21:41 28. október

Hér kveðjum við í bili...

Við komum aftur á morgun og fylgjumst með þróun mála. Þeir sem vilja fylgjast með umræðum þeirra framboða sem mælast með fylgi undir fimm prósent geta gert það í beinni á vef RÚV.

Í fyrramálið mun Kjarninn birta ítarlega umfjöllum um nýjustu kosningspá sína og aðra um lokaþingsæta spánna síðdegis. Kjördæmatöflur hafa þegar verið uppfærðar inn á heimasíðu Kosningaspárinnar. Þar er hægt að sjá líkur hvers frambjóðanda í efstu sætum að ná kjöri á morgun.

21:25 28. október

Kemur til greina að Sigmundur Davíð verði ráðherra?

Þetta er ekki já eða nei spurning, segir Sigurður Ingi. Hann segir að kjósa verði fyrst. Þingflokkur hans verði að ræða þetta mál fyrst þegar niðurstaða kosninganna liggur fyrir. Hann svarar ekki spurningunni en fer að tala um kröfuhafa og blaðaauglýsingar.

Þetta er búið. Næst eru fulltrúar þeirra flokka sem eru með undir fimm prósent samkvæmt könnunum.

21:23 28. október

Og þau eru farin að tala um Leiðréttinguna

Katrín Jakobsdóttir segir að það sé misskipting í samfélaginu. Og að hún sé kerfisleg. Hún nefnir Leiðréttinguna sem dæmi, sem hafi fært mest til þeirra sem áttu mest.

21:20 28. október

Sjávarútvegsmál

Eitt heitasta deilumál Íslendinga í áratugi er skipting auðs vegna nýtingu fiskveiða. Þar er nú til umræðu.

Katrín segir að hún vilji að arðurinn skiptist jafnar en að flokkur hennar vilji ákveðna byggðarfestu í sjávarútvegsstefnunni. Það sé að sjálfsögðu mikilvægt að sjálfbærni haldist í greininni. Vinstri grænir vilja hækka hlut almennings í arðinum af auðlindinni.

Oddný og Samfylkingin vilja bjóða út aflaheimildir. Hún segir að það megi setja byggðarskorður en það þurfi að fá fullt verð fyrir auðlindina. Stjórnmálamenn mega ekki setja puttann upp í loftið og ákveða hvert virði auðlindarinnar sé.

Viðreisn vill markaðstengt auðlindagjald. Benedikt segir að það sé eðlilegt að t.d. þrjú prósent af kvóta fari á markað. Það geri það að verkum að markaðurinn ræður þá gjaldinu. Þessa peninga á að setja í sérstaka innviðasjóði til að stuðla að uppbyggingu innviða, meðal annars í hinum dreifðu byggðum.

Sigurður Ingi segir að veiðigjöldin hafi ekki lækkað í tíð ríkisstjórnarinnar. Þau hafi þvert á móti verið hærri en nokkru sinni áður. Það er ákveðin hálfsannleikur. Veiðigjöld hafa farið úr 12,8 milljörðum króna í 4,8 milljarða króna á kjörtímabilinu, vegna lagasetningar sem sett var sumarið 2013 af sitjandi ríkisstjórn. Hann segir að leita verði allra leiða til að finna réttu leiðina til að hirða auðlindarentu.

Bjarni Benediktsson segir að McKinsey skýrslan hafi sagt að sjávarútvegskerfið íslenska væri afburðakerfi. Það væri að skila meiri verðmætum en nokkurt annað sjávarútvegskerfi í heiminum. Það sé glapræði að gera kerfisbreytingar sem ógni þessu, og uppboð muni setja kerfið í mjög mikla óvissu.

Spyrill segir að Björt framtíð segi ekki mikið um sjávarútveg í sinni stefnu. Björt Ólafsdóttir hafi hins vegar sagt að álverin mættu fara. Hvað ætti að koma í staðinn? Óttarr segir að horfa verði til þess að þetta séu takmarkaðar auðlindir. Það verði að horfa til þess að það séu ekki bara sumir sem fái að nýta auðlindir, hvort sem þær séu í sjó eða hvort það sé t.d. orka. Ákveðnir aðilar séu að fá aðgang að forréttindum í sjávarútvegi og Björt framtíð vilji færa sig yfir í uppboðsleið til að tryggja jafnrétti í greininni.

Birgitta vill taka sérstaka veiðigjaldið aftur upp, gjaldið sem það sem hún kallar „óreiðustjórnin“, ákvað að afnema.

21:04 28. október

Verður ekki vikið frá stjórnarskrárbreytingum

Ekki verður vikið frá breytingum á stjórnarskrá, segir Birgitta. Benedikt segir Viðreisn ekki á móti breytingum, en að þær séu ekki það sem mest brenni á fólki.

Tökum upp þráðinn frá vinnu stjórnlagaráðs, segir Oddný. Stjórnmálamenn geta ekki hunsað niðurstöður þjóðaratkvæðagreiðslna, segir Katrín. Telur eðlilegt að samtalið sé átt við fræðimenn og fólkið í landinu.

Sigurður Ingi vitnar í Guðna Th. Jóhannesson og segir að áfangasigrar séu líka sigrar. Hann fer að tala um flugvöllinn í Vatnsmýri, og segir að flokkarnir sem stjórna í borginni séu ekki að virða þjóðarvilja þar.

Við þurfum ekki nýja stjórnarskrá, segir Bjarni, og segist segja eins og Benedikt að málið brenni ekki á kjósendum. Hann segist telja að þeir Benedikt gætu náð vel saman um þetta mál. Og þá segir Benedikt, „þá er komið eitt mál.“

20:59 28. október

Birgitta talar um stjórnarskránna...

...og þetta eru viðbrögð Bjarna Benediktssonar.

20:56 28. október

„Ekkert eins hættulegt og stjórnmálamaður í kosningaham“

Þetta segir Benedikt Jóhannesson. Flokkarnir séu margir að lofa öllu fögru gegn atkvæðum. Þannig vilji Viðreisn ekki vinna. Flokkurinn hugsi um það hvernig hægt sé að treysta varanlegar lausnir, og þar séu vaxtamál eitt stærsta málið. Það sé kannski lág verðbólga, en sannarlega sé ekki stöðugleiki. „Við viljum vera með varanlega stöðugleika og viljum lága vexti eins og í nágrannalöndunum,“ segir hann og á þar við myntráðið sem flokkurinn hefur talað mikið fyrir.

Óttarr Proppé segir að það þurfi meiri stöðugleika, minna prjál. Flokkurinn vill líka losna við óstöðugleikann í krónunni. Kostnaðurinn sem fylgir þessari örmynt er svo mikill.

20:55 28. október

Innviðir, sérhagsmunir og kaupmáttur

20:50 28. október

Hvernig ætla þau að halda jafnvæginu?

Sumir flokkar vilja lækka skatta og allir flokkar virðast á því að setja þurfi mikla peninga í innviðauppbyggingu. Það er búið að segja „innviðir“ mjög oft hér í kvöld.

Katrín segir ekki rétta tímann til að fara í skattalækkanir þegar fara þurfi í innviðauppbygginu. Oddný segist vilja leggja á skatta sem séu góðir í hagfræðilegum skilningi, eins og hátekjuskattar, skattar af auðlindum og fleira.

Birgitta segir Pírata tala fyrir langtímaáætlunum, ekki því að laga allt strax. Við ætlum að byrja á því að fara í langtímaáætlun og taka á þeim atriðum heilbrigðiskerfisins sem mest er kallað eftir segir hún, eins og í heilsugæslunni.

Bjarni segist fagna því að fólk sé spurt að því hvernig það ætli sér að standa við öll loforðin. Hann segir ríkissjóði hafa verið skilað með afgangi og lögð hafi verið áhersla á stöðugleika. Eitt prósent verðbólga sé niðurstaðan af því.

20:46 28. október

Næsti forsætisráðherra til umræðu á Twitter

20:43 28. október

Svona líta þau út

Fyrir þá sem sjá ekki RÚV og lesa um framvindu mála hér þá er hér smá dæmi um hvernig þau líta út. Frá vinstri eru þetta Óttarr Proppé, Sigurður Ingi Jóhannsson, Benedikt Jóhannesson, Bjarni Benediktsson, Birgitta Jónsdóttir, Oddný Harðardóttir og svo sést smá í Katrínu Jakobsdóttur.

20:41 28. október

Vilja þau ganga í ESB?

Já ég vil það, og spurningin á að vera hvort við eigum að halda áfram að semja, segir Oddný. „Sama svar“ segir Birgitta.

Bjarni vill að ef spurt verður þá þurfi að spyrja „hinnar eðlilegu spurningar“ hvort fólk vilji ganga inn í ESB eða ekki. Hann sagði að ef það yrði spurningin, þá væri ekki hægt að vera á móti slíkri þjóðaratkvæðagreiðslu.

Benedikt segir Viðreisn vilja taka upp gamalt stefnumál Bjarna Benediktssonar. „Við segjum já, það á að hafa svona þjóðaratkvæðagreiðslu.“ Og hún á að snúast um hvort fólk vilji halda áfram viðræðum eða ekki.

„Við höfum nú þegar slitið þessum viðræðum, ef á að spyrja spurningar á hún að vera viltu ganga í Evrópusambandið, já eða nei?“ segir Sigurður Ingi.

Hann spyr líka Katrínu Jakobsdóttir, sem hafði hafið leikinn áður en spurt var og sagðist vera til í að hlusta á þjóðina og „við erum ekki hrædd.“ Hún segir Alþingi eiga að koma sér saman um hvað verður spurt, en er opin fyrir því að spurningarnar verði fleiri en ein.

Óttarr Proppé og Björt framtíð vilja að þjóðin verði spurð hvort hún vilji halda áfram aðildarviðræðunum eða ekki.

20:36 28. október

Kaldastríðsheimurinn

Birgitta segir að, sama hvað Bjarni Benediktsson segir, þá séu Píratar ekki vinstri né hægri flokkur.

Bjarni grípur inn í og segir að Píratar séu hvorki hægri né vinstri, „enda sitja þeir venjulega hjá.“

„Þú ert farinn að tala eins og Davíð Oddsson Bjarni,“ segir Birgitta.

20:36 28. október

Þingmannaspá uppfærð innan skamms

Kjarnanum hafa nú borist fullnægjandi gögn til þess að geta uppfært þingmannaspána. Ný þingmannaspá mun byggja á könnun Gallup sem RÚV sagði frá í kvöld. Nú er verið að framkvæma 100.000 sýndarkosningar í reiknilíkaninu til þess að meta líkurnar á því hvaða frambjóðendur nái kjöri.

Lesendur Kjarnans verða upplýstir hér þegar gögnin liggja fyrir á kosningasíðu Kjarnans.

20:34 28. október

Með hverjum ætlar Viðreisn að vinna?

Benedikt vill ekki svara því. Engin flokkur er útilokaður fyrirfram. Hann segir að val á Alþingi sé eins og val í íslenska landsliðið. Allir verði að vinna saman sem ein heild. Vinstri kantmaðurinn verði að vinna með hægri kantmanninum osfr.

Viðreisn verði hvatinn sem laði fram það besta í öllum flokkum.

20:32 28. október

Birgitta veifar #Panama spjaldi

Á meðan Bjarni Benediktsson talar um að það sé ólíklegt að flokkurinn geti starfað með Pírötum eftir kosningar, og að Píratar séu ekki stjórntækur flokkur, þá veifar Birgitta Jónsdóttir fjólubláum miða þar sem búið er að skrifa #Panama.

20:32 28. október

Hvað getur Sjálfstæðisflokkurinn boðið?

Sjálfstæðisflokkurinn mælist stærsti flokkur landsins. Bjarni segir að þeir flokkar sem eru að mælast minnstir, og er augljóslega að taka um Samfylkinguna og Bjarta framtíð, eigi að horfa á sína stöðu. Hann vill ekki segja skýrt hvers konar stjórn hann sjái fyrir sér að Sjálfstæðisflokkurinn gæti komið að en gagnrýnir Pírata og segir ólíklegt að flokkur hans geti unnið með þeim. Það sé ekki einu sinni stjórmálaflokkur, heldur hreyfing.

Bjarna finnst gott að vinstri stjórnin myndi blokk og þá liggi fyrir skýrir valkostir.

20:30 28. október

Sigurður Ingi heldur áfram með ESB

Sigurður Ingi Jóhannsson forsætisráðherra heldur áfram þar sem frá var horfið í gærkvöldi, þegar hann hélt því fram að fimm flokkar vildu sækja um aðild að Evrópusambandinu á nýjan leik. Það er ekki rétt hjá honum, eins og Staðreyndavakt Kjarnans greindi frá í dag.

20:26 28. október

Ótrúlegur óstöðugleiki og hneykslismál

Óttarr Proppé segir að allt árið hafi farið í Panamaskjölin og önnur vandræði. Það hafi ríkt hér ótrúlegur óstöðugleiki og hneykslismál hafi verið áberandi.

Oddný segir alltaf hafa legið ljóst fyrir að Samfylkingin vildi að flokkarnir fjórir sem nú eru í stjórnarandstöðu ynnu saman. Mestu máli skipti að stefna Samfylkingarinnar nái fram að ganga. Þessir flokkar séu alvöru valkostur við ríkisstjórnina sem var „og er vonandi að fara frá“.

20:24 28. október

Ríkisstjórn án Sjálfstæðisflokks og Framsóknar

Birgitta er spurð um af hverju það hafi ekki verið send út tilkynning frá flokkunum sem fundað hafa á Lækjarbrekku á undanförnum vikum. Hún segir að flokkurinn hafi sent frá sér tilkynningu með þeirra áherslum.

Það sem sé stórkostlegt við þetta ferli sem Píratar hafi sett af stað er að nú viti kjósendur hvað þeir geti fengið með samstarfi þessara flokka sem fundað hafa, og það sé ríkisstjórn án Sjálfstæðisflokks og Framsóknarflokks.

Katrín segir að flokkarnir fjórir vilji leggja áherslu á uppbyggingu innviða. Það þurfi að horfa á Framsókn og Sjálfstæðisflokk á þessu kjörtímabili og hvaða slóð liggi eftir þá varðandi uppbyggingu innviða, þar sé munur á afstöðu.

20:22 28. október

Samfylkingin með hjartað á réttum stað

Oddný Harðardóttir leggur áherslu á að Samfylkingin sé flokkur sem sé með hjartað á réttum stað. Flokkurinn vill hjálpa ungu fólki, að allir geti búið í sínu húsnæði, og hann vill leggja áherslu á menntakerfið.

20:20 28. október

Komin á traustan grunn

Bjarni Benediktsson segir ekki rétta tímann til að taka beygju, nú sé kominn traustur grunnur. Hann minntist sérstaklega á meiri peninga í löggæslumál, en hann hefur verið talsvert gagnrýndur fyrir ummæli sín um lögreglumenn í þættinum á Stöð 2 í gærkvöldi.

20:19 28. október

Fimm stórmál segir Birgitta

Birgitta Jónsdóttir segir að Píratar ætli að styrkja heilbrigðiskerfið og finna pening til þess með því að setja fiskinn á markað. Flokkurinn ætlar að klára stjórnarskránna, tækla spillingu og leggja áherslu á aðkomu almennings að ákvörðunum og þess vegna á að kjósa um áframhald viðræðna um ESB.

20:18 28. október

Framsókn leggur áherslu á tekjuskatt og spítala

Árangur hefur náðst á kjörtímabilinu, ekki síst með leiðréttingu og losun hafta, segir Sigurður Ingi. Nú leggur Framsókn áherslu á að hafa tekjuskatt 25% og að það þurfi að skoða hvar þurfi að byggja upp nýjan spítala. „Við viljum endurskoða peningastefnuna í landinu með það að markmiði að lækka vexti.“

20:16 28. október

Benedikt: Vinstri eða Wintis-stjórn

Benedikt Jóhannesson fer yfir helstu stefnumál Viðreisnar. Hann talar áberandi mest allra stjórnmálaforingja með höndunum. Benedikt segir að Viðreisn sé valkostur til að koma í veg fyrir „Vinstri stjórn eða Wintris stjórn.“

20:16 28. október

Bæta vinnubrögð og takast á við vantraust

Það er mikilvægast að byggja upp meiri sátt og takast á við vantraust í samfélaginu, segir Óttarr Proppé. Það þarf að bæta vinnubrögð og gera hlutina í meiri sátt og breidd og hugsa hlutina til lengri tíma, ekki alltaf skamms tíma. Hann vill innviðauppbyggingu sem forgangsmál á næsta kjörtímabili.

20:13 28. október

Ekki gott sjónvarpsefni að fá viðbrögð við skoðanakönnum

...sagði Þóra Arnórsdóttir, annar spyrill kvöldsins. Stöð 2 tekur þetta liklega til sín þar sem drjúgur hluti lokaumræðuþáttar þeirra snérist um viðbrögð við skoðanakönnun fréttastofunnar.

20:03 28. október

Þetta er að bresta á

Fréttamenn RÚV eru að búa sig undir leiðtogaumræðurnar, eins og sjá má í myndbandi sem Lára Ómarsdóttir fréttamaður birtir á Twitter.

19:38 28. október

Sjálfstæðisflokkurinn vex og Píratar minnka

Seinni kosningaspáin sem var gerð síðdegis í dag mælir fylgi við Sjálfstæðisflokkinn aðeins meira en í morgun, og Píratar eru að minnka örlítið. Annars er heildarmyndin nokkurnveginn sú sama og hún var í morgun. Hér getur þú lesið nánar um niðurstöðu nýjustu kosningaspárinnar.

Þórður Snær Júlíusson greindi niðurstöður kosningaspárinnar ítarlega í morgun. Það er ekki verra að renna yfir það áður en leiðtogaumræðurnar hefjast á RÚV.

19:16 28. október

RÚV ætlar að skipta umræðunum í efri og neðri deild

RÚV hefur greint frá því að leiðtogaumræðunum í kvöld verði skipt í tvennt, líkt og reyndar hefur alltaf verið. Skiptingin verður hins vegar öðruvísi en hingað til, þar sem nú verður skipt þannig að leiðtogar þeirra flokka sem útlit er fyrir að fái þingmenn kjörna verða saman, og að því loknu koma leiðtogar flokka sem mælast með minna fylgi og munu líklega ekki ná inn á Alþingi.

18:37 28. október

Tæplega 30 þúsund búin að kjósa utan kjörfundar

Tæplega 30 þúsund manns höfðu síðdegis kosið utan kjörfundar í alþingiskosningunum. Þetta kom fram í kvöldfréttum Stöðvar 2. Þetta er minni kjörsókn en fyrir síðustu kosningar, þegar 35 þúsund höfðu kosið á sama tíma.

18:07 28. október

Leiðtogaumræður verða hér

Við erum rétt í smá pásu hér, en komum sterk inn fyrir klukkan 20, en þá munu leiðtogaumræðurnar hefjast á RÚV. Við fylgjumst auðvitað með þeim hér.

Í millitíðinni er hægt að skoða nánari upplýsingar um síðustu Gallup-könnunina á vef RÚV. Þar kemur margt áhugavert fram, til dæmis að ef þetta yrðu niðurstöður kosninganna myndi margt áhrifafólk í Framsókn og Samfylkingu ekki komast að á þingi. Það myndi Benedikt Jóhannesson, formaður Viðreisnar, ekki heldur gera.

16:11 28. október

Sjálfstæðisflokkurinn langstærstur hjá Gallup

Sjálfstæðisflokkurinn mælist stærsti flokkurinn í nýrri könnun Gallup, sem er síðasta könnun Gallup fyrir kosningar. Telja má fullvíst að þar með hafi síðasta könnunin fyrir kosningar birst, en við stefnum hins vegar á að birta kosningaspá með öllum nýju tölunum og þingsætaspá sömuleiðis.

Samkvæmt Gallup er Sjálfstæðisflokkurinn búinn að taka forskot með 27 prósenta fylgi, en Píratar eru með 17,9 prósent og Vinstri græn 16,5 prósent. Framsóknarflokkurinn er fjórði stærsti flokkurinn með 9,3%, þá kemur Viðreisn með 8,8 prósent, Samfylkingin er með 7,4 prósent og Björt framtíð 6,8 prósent. Allt um könnunina á RÚV.

15:18 28. október

Staðreyndavaktin kannar Sigurð Inga

Sigurður Ingi Jóhannsson forsætisráðherra og formaður Framsóknarflokksins hélt því fram á Facebook-síðu sinni að fulltrúar fimm af sjö flokkum sem voru í leiðtogaþættinum á Stöð 2 í gær vildu sækja um aðild að Evrópusambandinu. Staðreyndavakt Kjarnans fór í málið, og komst að því að þetta væri haugalygi hjá Sigurði Inga. Lestu meira um málið í nýjustu Staðreyndavaktinni.

15:01 28. október

Landhelgisgæslan flýgur atkvæðum til íbúa Grímseyjar

Þyrla Landhelgisgæslunnar hefur verið fengin til þess að fljúga atkvæðaseðlum til íbúa Grímseyjar, en ófært hefur verið í eyna undanfarna daga vegna veðurs, en RÚV greinir frá þessu. Með þessu verður kosningunum bjargað, en samkvæmt lögum er ekki hægt að birta úrslit kosninga fyrr en öllum kjördeildum hefur verið lokað og ef kjósendur fá ekki kjörgögn er kjördeild ekki starfhæf. Ef íbúar í Grímsey hefðu ekki fengið að kjósa hefði í versta falli þurft að fresta kosningum.

14:21 28. október

Forystumenn flokkanna ekki á RÚV fyrr en eftir miðnætti

Forystumenn stjórnmálaflokkanna verða ekki í sjónvarpssal á RÚV þegar fyrstu tölur berast annað kvöld. Frá þessu er greint á mbl.is. Þetta er gert að ósk forystumanna flokkanna, að sögn Heiðars Arnar Sigurfinnssonar, umsjónarmanns kosningasjónvarpsins. Leiðtogarnir hafi óskað eftir því að vera minna í sjónvarpssal, en í stað þess verða þeir í sjónvarpinu klukkan eitt eftir miðnætti. Bjarni Benediktsson segir að þetta snúist um að vera ekki föst í Ríkisúvarpinu meira eða minna allt kvöldið. Þau geti nú verið með fólkinu sínu þegar fyrstu tölur berast.

14:03 28. október

Framsókn sökuð um fordóma

Framsóknarflokkurinn hefur birt mörg myndbönd á Facebook-síðu sinni í aðdraganda kosninganna, eins og margir aðrir flokkar. Hér að neðan er nýjasta útspilið, með íþróttafréttamanninum Herði Magnússyni, þar sem kosningunum er líkt við fótboltaleik.

Vísir segir frá því að Framsóknarmenn hafi verið gagnrýndir fyrir myndbandið, sem þykir vera fordómafullt gagnvart fólki með mismunandi skerðingar.

13:33 28. október

Sögulegt afhroð hjá Framsókn og Samfylkingu?

Nýjasta kosningaspá Kjarnans og Baldurs Héðinssonar er komin í hús! Þar mælist Sjálfstæðisflokkurinn stærsti flokkur landsins, og hefur bætt við sig fylgi á lokasprettinum. Píratar hafa fundið stöðugleika og Vinstri græn og Viðreisn geta vel við unað. En Samfylkingin og Framsóknarflokkurinn stefna báðir í sögulegt afhroð, og myndu báðir hljóta verstu kosningu nokkru sinni ef þetta verður niðurstaðan á morgun.

Fjórflokkurinn svokallaði er með 57,1 prósent fylgi samkvæmt nýju kosningaspánni, en þrír flokkar sem hafa verið stofnaðir frá árinu 2012 mælast með 37,3 prósent samanlagt.

Lesið allt um nýjustu kosningaspána í fréttaskýringu Þórðar Snæs Júlíussonar.

12:15 28. október

Kosningaspá á leiðinni

Við erum að vinna að því að uppfæra kosningaspána þar sem tillit er tekið til kannana MMR, Fréttablaðsins og Morgunblaðsins sem birtar voru í morgun.

Við hér á ritstjórn Kjarnans búumst einnig við að geta uppfært þingsætaspána í dag eða í kvöld ef að ítarlegar kannanir verða birtar um fylgi framboða í einstaka kjördæmum. Morgunblaðið birti hluta af þjóðmálakönnun Félagsvísindastofnunar í morgun en gaf ekki nægilegar upplýsingar til þess að þingsætaspáin geti metið þá könnun.

12:07 28. október

Samfylkingin með nánast ekkert fylgi hjá yngsta hópnum

Ný könnun frá MMR sýnir áhugaverðar bakgrunnsupplýsingar á fylgi flokkanna. Þar sést að Samfylkingin er með eins prósents fylgi meðal 18 til 29 ára kjósenda, en fylgið eykst með hærri aldri. Sama þróun á sér stað hjá Sjálfstæðisflokknum, sem er með meira fylgi eftir því sem kjósendur eru eldri.

Hér má lesa nánar um könnun MMR.

10:42 28. október

Innan við sólarhringur í opnun kjörstaða

Góðan dag!

Þá hefjum við leikinn á ný í beinni textalýsingu hér á Kjarnanum, en hér munu birtast allar helstu upplýsingar og umfjallanir í aðdraganda kosninga. Að neðan er hægt að lesa um leiðtogaumræðurnar sem áttu sér stað á Stöð 2 og á RÚV í gærkvöldi, en við lýstum því helsta sem þar gerðist fyrir lesendum.

Í dag verður væntanlega nóg um að vera, enda síðasti dagur kosningabaráttunnar og innan við sólarhringur í að kjörstaðir opni. Almennt eru kjörstaðir opnir frá 9 í fyrramálið til 10 annað kvöld. Fyrir fólk sem er óvíst um það hvar það á að kjósa bendum við á kosningavef innanríkisráðuneytisins, þar sem hægt að fletta upp kjörstað eftir kennitölu.

21:08 27. október

Fátækasti maður á Íslandi

„Árið 2013 greiddu íslensk fyrirtæki í sjávarútvegi 12,8 milljarða í veiðigjöld til ríkisins. Svo völdu Íslendingar sér nýja ríkisstjórn, hana mynduðu lunkinn bakari úr Garðabænum og ofsóttur huldumaður frá Hrafnabjörgum. Þessir ungu milljarðamæringar lækkuðu veiðigjaldið niður í 4,8 milljarða. Þeir lækkuðu það um átta þúsund milljónir.“ Þetta skrifar Dagur Hjartarson rithöfundur í nýjum pistli á Kjarnanum.

Og með þessu kveðjum við lesendur í kvöld, en við byrjum þessa beinu textalýsingu á nýjan leik í fyrramálið. Takk fyrir í kvöld.

21:04 27. október

Lág verðbólga, dómar og erlendir ferðamenn í lykilhlutverki

Liðið kjörtímabil hefur verið mikið endurnýjunar og uppgangstímabil fyrir íslenskt viðskiptalíf. Magnús Halldórsson fór yfir stór og mikilvæg mál sem skiptu miklu máli fyrir íslenskt viðskiptalíf á kjörtímabilinu í fréttaskýringu í kvöld.

20:44 27. október

Kosningaspáin mælir Samfylkingu í sögulegu lágmarki

Kjarninn hefur haldið úti kosningaspá í samstarfi við dr. Baldur Héðinsson í aðdraganda þingkosninganna, líkt og gert var fyrir forsetakosningar og síðustu sveitarstjórnarkosningar. Hér má finna alla umfjöllun okkar sem unnin er upp úr kosningaspánni.

Nýjasta umfjöllun okkar upp úr kosningaspánni er fréttaskýring eftir Birgi Þór Harðarson, sem birtist fyrr í dag. Þar kemur fram að fylgi við Samfylkinguna hefur aldrei mælst minna, frá því að kosningaspáin fyrir alþingiskosningarnar hófst í byrjun þessa árs. Samfylkingin mælist nú með 6,8% fylgi, sama fylgi og Björt framtíð mælist með. Þessir tveir flokkar eru meðal þeirra fjögurra flokka sem hafa fundað um mögulegt samstarf eftir kosningar undanfarna daga. Annars hafa litlar sveiflur mælst á fylginu undanfarna daga. Sjálfstæðisflokkurinn mælist stærsti flokkur landsins með 22,7 prósent fylgi á landsvísu, og Píratar eru með 20,6 prósent fylgi. Þar á eftir koma svo Vinstri græn með 16,9%, Framsóknarflokkurinn með 10,1% og Viðreisn með 9,7%.

20:41 27. október

Allir sammála um hækkun fæðingarorlofs

Síðasta spurningin á RÚV var hraðaspurning og fjallaði um fæðingarorlofsmál. Allir frambjóðendurnir voru sammála um að hækka þurfi hámarksgreiðslurnar. Þau vilja líka mörg lengja fæðingarorlofið, en Gylfi í Viðreisn sagðist vilja hærri greiðslur og að bilið yrði brúað í dagvistunarmálum. Undir það tók líka Logi í Samfylkingunni, hann sagði þessi mál vera mikilvægt jafnréttismál.

20:31 27. október

Styðja jafnlaunavottunarhugmynd Viðreisnar

Nú eru frambjóðendurnir á RÚV að ræða um launamun kynjanna. Öll eru á því að slíkur munur sé óþolandi. Gylfi Ólafsson hjá Viðreisn segir flokkinn mjög stoltan af því að fyrsta frumvarp flokksins, þrátt fyrir að hann sé ekki kominn inn á þing, sé að lögbinda jafnlaunavottun í öllum fyrirtækjum með 25 starfsmenn eða fleiri. Aðrir tóku vel í þá hugmynd, meðal annars Logi hjá Samfylkingunni og Benedikt hjá Dögun.

20:27 27. október

Er verðtryggingin lausn á húsnæðismálum?

Allar tillögur sem fram hafa komið leiða bara til þess að verðið hækkar, segir Benedikt hjá Dögun, um húsnæðismálin. Það verður að auka framboðið. Hann segir hugmyndir eins og Samfylkingarinnar, um að greiða fólki vaxtabætur fyrirfram, geri ekkert gott.

Logi segir mikilvægast að taka á vaxta- og fjármagnskostnaði. Langtímamarkmiðið sé að koma á réttlátum leigumarkaði, en það sé langtímaverkefni. Það þurfi að taka á vandamálinu sem sé ferðamannaleigubransinn. Hann segir að Fyrsta fasteign, úrræði stjórnarflokkanna, aðeins hagnast þeim sem eigi peninga.

Inga segist algjörlega sammála Benedikt með verðtrygginguna, þannig muni fólk sjá okurvexti fara niður. Henni þykja stjórnvöld hafa sýnt furðulega takta í húsnæðismálum, vegna þess að verið sé að selja út úr Íbúðalánasjóði „einhverja pakka af íbúðum.“ Það væri hægt að stíga inn og koma til móts við ungt fólk og þá sem minna megi sín með þessum íbúðum. Hún vill endurvekja kaupleigukerfi.

Gylfi hjá Viðreisn talar um vaxtamuninn, þannig sé hægt að koma til móts við heimilin með töluverðu leyti. Þá fáum við stöðugleika og þá sé ekki þörf á afnámi verðtryggingar og hægt að útrýma umræðunni um verðtrygginguna, enda sé líklega ekki hægt að afnema verðtryggingu með einu pennastriki.

20:19 27. október

Málefnið: Hvernig eigum við að taka peninga úr ferðaþjónustu og í innviði?

Oddný vill hækka virðisaukaskatt á ferðaþjónustuna. Þorsteinn segir (í kaldhæðni) að ferðaþjónustan sé að upplifa þennan efnahagslega stöðugleika sem alltaf sé verið að mæra. Mikla gengisstyrkingu og því sem fylgir sveiflum í íslensku efnahagslifi. Hér þurfi að taka upp nýja peningamálastefnu.

Katrín vill hækka gistináttagjald og láta það renna til sveitafélaga og vill leggja á komugjöld. Núverandi ríkisfjármálaáætlun sem ríkisstjórnin lagði fram fyrir nokkru, og á að gilda til fimm ára, geri ekki ráð fyrir mikilli fjárfestingu í innviðum. „Það er líka ýmislegt hægt að gera án þess að hækka gjöld,“ segir Katrín. Einhvern tímann hefðu þetta þótt óvenjuleg orð hjá leiðtoga vinstrimanna á Íslandi. Hún, og reyndar Sigurður Ingi og Óttarr, eru sammála Þorsteini um að það þurfi að endurskoða peningastefnuna.

20:19 27. október

„Íslenska krónan eyðileggur allt“

Nú eru húsnæðismálin komin á dagskrá á RÚV. Páll Valur segir að búið sé að vinna fimm mjög stór frumvörp um húsnæðismál. Það hafi verið ánægjuleg og erfið vinna en það hafi tekist að afgreiða málin úr velferðarnefnd í einingu. Hann segir það pólitískt afrek að það hafi tekist. „Ég held að við ættum að halda áfram með þessa vinnu, og byggja á henni,“ segir hann. Íslenska krónan eyðileggur allt saman, það verður aldrei hægt að koma á almennilegu húsnæðiskerfi fyrr en við skiptum um gjaldmiðil, segir Páll Valur og segist hafa lesið það eftir hagfræðingum. Benedikt frá Dögun segir fyrsta skrefið í að gera krónuna almennilega sé að afnema verðtryggingu, og það verði að gera. Hann vill virkan leigu- og búseturéttarmarkað á danska vísu.

20:12 27. október

Stöðumat þegar síðasta auglýsingahléið hefst á Stöð 2

Það hefur fátt af viti komið úr leiðtogaumræðunum, ef að viti þýðir málefni. Langur tími fór í fréttaskýringu um bankakerfið og svo í umræður um viðbrögð við skoðanakönnun. Síðan er það fyrst og síðast stemmning leiðtogana sem hefur vakið athygli.

Flestir eru rólegir og yfirvegaðir en enginn eins yfirvegaður og Sigurður Ingi Jóhannsson sem virðist vera að finna sig vel í friðarstillingarhlutverkinu. Bjarni Benediktsson er rosalega pirraður, talar mikið með höndunum og grípur frammí fyrir öðrum. Sá eini sem kemst nálægt honum í látum er Jón Þór Ólafsson, sem virðist fara manna mest í taugarnar á Bjarna.

20:12 27. október

Twitter hakkar Bjarna í sig

Virkir notendur Twitter eru margir óánægðir með Bjarna Benediktsson í þættinum á Stöð 2. Myllumerkið á Twitter er #kosningar fyrir áhugasama.

20:03 27. október

Heimir talar um löggur

Heimir Már Pétursson, stjórnandi þáttarins, spyr um framlög til lögreglumála. Sigurður Ingi segir að bætt hafi verið í en að allir séu meðvitaðir um að það þurfi að styrkja þessa stoð, m.a. vegna fjölgun ferðamanna.

Maðurinn með heftið, Bjarni Benediktsson, segir: „Við erum fullorðið fólk. Við getum ekki nálgað umræðuna eins og við erum að gera hér.,“ og á það við umræður um eyðslu. „Hlustaðu á það sem ég er að segja,“ segir Bjarni. Hann er aftur orðinn reiður og óábyrgt tal um eyðslu í ýmsa málaflokka, sem hefur verið áberandi í kosningabaráttunni, fer greinilega mjög í taugarnar á honum.

19:58 27. október

Hver getur skaffað stöðuga mynt?

Þorsteinn Víglundsson segir að fyrirtækin og heimilin í landinu séu að spyrja að því, að fá stöðuga mynt. „Til að geta fengið þessa stöðugu mynt, færðu stöðugt atvinnuleysi,“ segir Bjarni Benediktsson í andsvari.

Óttarr segir að með þessari örmynt sem við höldum úti séum við í algjörum rússíbana og að putti hafi verið settur á að það kosti 80-100 milljarða króna á ári að halda krónunni úti. „Almenningur er ekki tilbúinn til þess að kaupa sama sullið aftur.“

19:57 27. október

Unga fólkið til umræðu á RÚV

Á RÚV ræða þau Páll Valur Björnsson frá Bjartri framtíð, Gylfi Ólafsson frá Viðreisn, Inga Sæland frá Flokki fólksins, Logi Már Einarsson frá Samfylkingu og Benedikt Sigurðarson frá Dögun um málefni ungs fólks í kvöld. Nú eru þau að ræða um það að iðnnámið eigi undir högg að sækja. „Hugvitið er óþrjótandi auðlind,“ segir Logi Már Einarsson. Það megi ekki einblína á bóknám.

19:55 27. október

Deilt um Evrópusambandsaðild

Forsætisráðherrann segir það merkilegt að Evrópusambandsaðild sé komin aftur á dagskrá á Íslandi. Þar sem sambandið sé „rjúkandi rúst“.

Katrín reynir að tjá sig um málið, og segir að fulltrúar stjórnarflokkanna hafi báðir talað um atkvæðagreiðslur um ESB á fundum í aðraganda kosninga. Það fýkur aftur í Bjarna og fer strax að spyrja hvort að Katrín ætli að leiða Ísland í gegnum slíkar viðræður ef hún verði forsætisráðherra. „Ætlar þú einhvern tímann að leyfa mér að klára,“ segir Katrín við Bjarna.

19:52 27. október

Myndirnar úr könnun Stöðvar 2

Hér má sjá niðurstöðurnar úr könnun Stöðvar 2 og Vísis. Þær eru áhugaverðar.

19:51 27. október

Bjarni segir VG hvernig flokkur hann sé

Það er fokið í Bjarna Benediktsson. Hann gagnrýnir hugmyndir um nýja stjórnarskrá og VG fyrir að vilja ganga í Evrópusambandið. Smá hiti kominn í þetta. En Sigurður Ingi róar málin með stóískri innkomu.

19:49 27. október

Twitter í stuði

Nú eins og svo oft í kringum sjónvarpsviðburði er Twitter-samfélagið í stuði. Hér er brot af því sem fólk er að segja á Twitter.

19:49 27. október

Bæ Samfylking?

Oddný sagði að það væru ekki stefnumálin sem væru að valda því að Samfylkingin væri að berjast fyrir lífi sínu. Gat samt ekki alveg svarað því hvað það var. Samt mælist fylgi flokksins 5,4 prósent og þingmennirnir einungis þrír.

Ungliðar flokksins vöktu mikla athygli fyrir framgöngu sína á landsfundi 2009. Þar heilsuðu þeir flokknum með flautu og „hæ-i“. Er kominn tími til að segja „bæ Samfylking“?

19:41 27. október

Ný könnun Stöðvar 2: Ríkisstjórnin fallin en RVK-stjórnin ekki með meirihluta

Síðasta könnun fréttastofu 365 fyrir kosningarnar á laugardaginn byggir á stærra úrtaki en venjulega, yfir tvö þúsund manns. Hún sýnir Sjálfstæðisflokkinn stærstan með 27,3 prósent fylgi og 18 þingmenn, Pírata með 18,4 prósent og tólf þingmenn, Vinstri græn með 16,4 prósent og ellefu þingmenn og Viðreisn með 10,5 prósent og sjö þingmenn.

Framsóknarflokkurinn tapar miklu fylgi og mælist með 9,9 prósent og átta þingmenn, Björt framtíð með 6,3 prósent og fjóra þingmenn og Samfylkingin rétt lafir inni með 5,4 prósent fylgi og myndi fá þrjá þingmenn. Í könnuninni kemur líka fram að einungis 27,8 prósent þeirra sem kusu Samfylkinguna árið 2013 ætla að gera það aftur, og í þeim kosningum beið flokkurinn afhroð. Til samanburðar er kjarnafylgið hjá Sjálfstæðisflokknum rótsterkt. yfir 80 prósent þeirra sem kusu flokkinn siðast ætla að kjósa hann aftur.

En samandregið þá er ríkisstjórnin kolfallinn og næði saman 26 þingmönnum. Reykjavíkurstjórnin, sem stjórnarandstöðuflokkarnir hafa verið að föndra við á Lækjabrekku undanfarin misseri nær heldur ekki meirihluta.

Vert er að taka fram að kannanir fréttastofu 365 eru oft á skjön við aðrar skoðanakannanir. Í kosningaspá Kjarnans, sem vigtar allar gerðar kannanir, mælist Sjálfstæðisflokkurinn stærstur með um 22 prósent fylgi.

19:29 27. október

Hvað á að gera við bankana?

Stöð 2 setur Íslands- og Evrópumet í dramatík með skilmerkilegri skýringu um bankakerfið. Þar er meðal annars bent á að ríkið eigið tvo banka að öllu leyti og slatta í þeim þriðja. Virði þeirra er 400-500 milljarðar króna.

Bjarni Benediktsson vill að ríkið, í fyllingu tímans, að selja Íslandsbanka að öllu leyti en Landsbankann að hluta. Báða ætti að skrá á markað.

Benedikt Jóhannsson vill að bankar séu fyrst og síðast þjónustufyrirtæki. Þeir eigi fyrst og fremst að lána fé. Fjárfestingaþátturinn, lánveitingar til að kaupa í öðrum fyrirtækjum, eigi ekki heima í bönkunum.

Katrín Jakobsdóttir vill nota það tækifæri sem fellst í því að ríkið eigi svona stóran hlut í íslenska bankakerfinu til að aðskilja viðskiptabanka- og fjárfestingabankastarfsemi. Og selji síðan fjárfestingabankastarfsemi. Sigurður Ingi er á svipuðum nótum.

Oddný er óljósari en vill ekki hafa bankakerfið í óbreyttri mynd og Óttar vill að ríkið standi í fyrirtækjarekstri en er ekki viss um hvernig hann vilji gera það.

Smári McCarthy segir ekkert liggja á að breyta þeirri stöðu sem er uppi núna, bankarnir séu að greiða góðan arð til ríkisins.

19:21 27. október

Heimamundur, fullt af ferðamönnum og makríl

Oddný Harðardóttir, formaður Samfylkingarinnar, sem berst fyrir pólitisku lífi sínu og síns samkvæmt könnunum, setur fókusinn á að batinn í efnahagslífinu hafi átt sér stað vegna utanaðkomandi þátta og vegna frammistöðu síðustu ríkisstjórnar.

Þorsteinn fókusar á þau mál sem Viðreisn hefur sett á oddinn og aðskilja Viðreisn frá sumum öðrum flokkum, t.d. breytingar á landbúnaðarkerfinu.

Katrín Jakobsdóttir, formaður Vinstri grænna, leggur áherslu á aukna fjárfestingu í velferð, sérstaklega í heilbrigðiskerfinu. Óttarr Proppé, formaður Bjartrar framtíðar, segist sammála sumum kollegum sínum við borðið að það vanti tilfinnanlega meiri fjárfestingu í innviðum. Helstu mál sem hann hefði viljað fara í er endurreisn heilbrigðiskerfisins og að það sé ófyrirgefanlegt að við skyldum leyfa öldruðum og öryrkjum að verða eftir á í kjörum í endurreisninni.

19:15 27. október

Leiðtogaumræður á Stöð 2 hafnar

Leiðtogar allra flokka eru mættir í myndver Stöðvar 2. Þetta eru fyrstu leiðtogaumræðurnar sem fara fram í þessum kosningaslag þar sem Sigmundur Davíð Gunnlaugsson er ekki viðstaddur, en hann var enn formaður Framsóknarflokksins þegar leiðtogaumræður fóru fram á RÚV í upphafi baráttunnar. Og stal senunni.

Fulltrúar flokkanna sem hafa verið að mælast inni á þingi í þættinum eru formenn þeirra flokka sem eru með formenn utan þess að Þorsteinn Víglundsson er mættur fyrir Viðreisn í stað Benedikts Jóhannessonar. Og svo er Jón Þór Ólafsson fyrir Pírata, sem eru ekki með formann.

Bjarni Benediktsson og Sigurður Ingi Jóhannsson eru ánægðir með sín störf á kjörtímabilinu, sem kemur ekki á óvart. Það kemur hins vegar meira á óvart að Jón Þór hrósar þeim fyrir góða frammistöðu í efnahagsmálum, en fylgir því eftir með því að benda á að traust til stjórnmála sé flogið út um gluggann í tíð þessarar ríkisstjórnar.

19:09 27. október

Gefa lítið fyrir kosningabandalagið

„Þetta er bara flopp,“ sagði Bjarni Benediktsson fjármálaráðherra og formaður Sjálfstæðisflokksins í kvöldfréttum RÚV, og var að tala um fundi stjórnarandstöðuflokkanna undanfarna daga. Bjarni og Sigurður Ingi Jóhannsson forsætisráðherra og formaður Framsóknarflokksins, gáfu báðir lítið fyrir þreifingar stjórnarandstöðunnar, sem gáfu það út í dag að ef flokkarnir fá umboð til þess munu þeir reyna að mynda ríkisstjórn.

18:51 27. október

Velkomin til leiks

Gott kvöld, og velkomin á kosningavaktina á vef Kjarnans. Við verðum með útsendingu hér fram yfir alþingiskosningar, sem fara fram á laugardaginn. Í kvöld fylgjumst við með leiðtogaumræðum á Stöð 2 annars vegar og síðasta málefnaþætti RÚV hins vegar.

Leiðtogaumræðurnar á Stöð 2 munu hefjast klukkan 19.10, og munu Bjarni Benediktsson, Sigurður Ingi Jóhannsson, Oddný G. Harðardóttir, Óttarr Proppé, Katrín Jakobsdóttir, Jón Þór Ólafsson og Benedikt Jóhannesson mæta þar til leiks. Þátturinn á RÚV hefst klukkan 19.35 og þar verða fulltrúar framboðanna að ræða um málefni yngri kynslóða.

Kjósa

Hvernig finnst þér þessi grein? Skráðu þig inn til að kjósa.

Veistu meira? Láttu okkur vita

Deila

Höfundar

Fréttamál

kosningar2016

Efnisorð

Innlent

Athugasemdir

Skráðu þig inn til að skrifa athugasemd eða kjósa.

Allar athugasemdir eru ábyrgð á þeirra sem þær skrifa. Heimildin áskilur sér rétt til að fjarlægja ærumeiðandi og óviðeigandi athugasemdir. Hægt er að láta vita af athugasemdum með því að smella á Tilkynna.

Tengdar greinar