Meirihluti þingmanna vill gefa kost á sér áfram

Mynd: Birgir Þór Harð­ar­son

Mikill meiri­hluti núver­andi þing­manna ætla að freista gæf­unnar og gefa kost á sér til áfram­hald­andi þing­setu í kom­andi Alþing­is­kosn­ingum. Kjarninn leit­aði svara hjá öllum sitj­andi þing­mönnum og fékk svör frá flestum. Nokkrir reynd­ust óákveðnir, en eins og áður segir, eru lang­flestir sem ætla sér að halda áfram. Svör þing­manna má sjá hér fyrir neðan.

„Eins og staðan er í dag, að óbreyttu…”

Rétt er að taka fram að margir þing­menn voru örlítið tví­stíg­andi í afstöðu sinni. Sögðu margir hverjir að í hinu póli­tíska umróti síð­ustu vikna hafi ekki gef­ist mik­ill tími til að velta fyrir sér fram­tíð­inni - menn hafi ein­ungis verið að skipu­leggja dag frá degi. Enda gerð­ust hlut­irnir hratt. Margir bentu á að enn væri þó ein­hver tími til kosn­inga, sem óvíst er hvenær verða, og margt geti gerst í milli­tíð­inni.

„Eins og staðan er í dag, að óbreyttu, þá ætla ég að gefa kost á mér áfram,” og „ef flokk­ur­inn veitir mér braut­ar­gengi og eft­ir­spurn verður eftir mér, þá já,” voru nokkuð algeng svör. Fjöl­margir voru þó gall­harðir í afstöðu sinni til áfram­halds. Þess ber þá að geta að svör þing­manna til Kjarnans eru ekki bind­andi og fólki er frjálst að skipta um skoðun, eins og sann­ast hefur í vik­unni. 

Veit ekki annað en Sigmundur ætli að halda áfram

Sig­mundur Davíð Gunn­laugs­son, fyrr­ver­andi for­sæt­is­ráð­herra, fór í frí í byrjun síð­ustu viku. Hjálmar Bogi Haf­liða­son, fyrsti vara­þing­maður Fram­sókn­ar­flokks­ins í Norð­aust­ur­kjör­dæmi, tók sæti hans. Hjálmar segir í sam­tali við Kjarnann að hann hafi átt að koma inn í þrjár vikur, þá frá mánu­deg­inum 11. apríl til mánu­dags­ins 2. maí. Jóhannes Þór Skúlason, aðstoð­ar­maður Sig­mundar, seg­ist ekki hafa heyrt neitt um að Sig­mundur ætli að hætta. Hann hafi þó ekki náð í Sigmund, sem sé í ferða­lagi erlendis með fjöl­skyldu sinni.

Utanríkisráðherra óákveðinn

Sumir þing­menn voru ekki búnir að ákveða hvort þeir hygð­ust halda áfram í póli­tík á næsta kjör­tíma­bili. Má þar nefna Ragn­heiði Rík­harðs­dóttur og Brynjar Níelsson, þing­menn Sjálf­stæð­is­flokks­ins, og helm­ing þing­manna Bjartrar fram­tíðar; Guðmund Stein­gríms­son, Róbert Marshall og Bryn­hildi Pét­urs­dóttur. Lilja Alfreðs­dóttir, nýi utan­þingsutan­rík­is­ráð­herra Fram­sókn­ar­flokks­ins, hefur heldur ekki tekið ákvörðun um hvort hún muni bjóða sig fram til þing­mennsku í haust.

Þingmenn og báðir utan­þings­ráð­herr­arnir voru spurðir hvort þeir hygð­ust bjóða sig fram í kom­andi kosn­ingum og má sjá svör þeirra hér fyrir neðan.

Tæplega 70 prósent vilja vera áfram

Svör feng­ust frá 57 þing­mönnum og báðum utan­þings­ráð­herr­unum, Lilju Alfreðs­dóttur og Ólöfu Nordal. Rúmlega 65 pró­sent svar­enda, eða 39 manns, 38 þing­menn og inn­an­rík­is­ráð­herra sem situr utan þings, segj­ast ætla að gefa áfram kost á sér á næsta kjör­tíma­bili. Fjórir þing­menn ætla að hætta og níu eru óákveðnir.

Forseti, ráðherra og varaformaður að hætta

Sigrún Magn­ús­dóttir, umhverf­is­ráð­herra og fyrr­ver­andi þing­flokks­for­maður Fram­sókn­ar­flokks­ins, Einar K. Guð­finns­son, for­seti Alþingis og þing­maður Sjálf­stæð­is­flokks­ins, Katrín Júl­í­us­dóttir, vara­for­maður Sam­fylk­ing­ar­innar, og Páll Jóhann Pálsson, þing­maður Fram­sókn­ar­flokks­ins, ætla öll að yfir­gefa þingið eftir kjör­tíma­bilið.

Sigrún segir að vissu­lega sé sterk löngun hjá henni að fram­fylgja sjálf málum Fram­sókn­ar­flokks­ins. „En ég held að aldur og fyrri störf segi mér að nú sé komið gott."

Einar segir að hann hafi ákveðið að bjóða sig ekki fram til þing­mennsku áfram í sam­ráði við fjöl­skyldu sína, en hann hefur setið í 25 ár á Alþingi fyrir Sjálf­stæð­is­flokk­inn. „Nú er komið að tíma­mótum í lífi mínu. Beinni þátt­töku minni í stjórn­málum lýkur senn. Við tekur nýtt tíma­bil sem ég veit ekki hvað muni bera í skauti sínu. Það leiðir tím­inn einn ljós,“ sagði Einar á Facebook síðu sinni. Einar er odd­viti Sjálf­stæð­is­manna í Norð­vest­ur­kjör­dæmi og í vik­unni gaf þing­mað­ur­inn Haraldur Bene­dikts­son það út við Skessu­horn að hann ætl­aði að sækj­ast eftir sæt­inu.

Páll Jóhann segir að mótæla­aldan og óánægjan í sam­fé­lag­inu hafi haft þau áhrif að hann ætli að hætta á þingi eftir kjör­tíma­bilið. „Ég ætla ekki að láta grýta mér oftar út úr þing­hús­inu,” segir hann í sam­tali við Kjarnann. „Það var meira að segja mót­mælt við þing­setn­ing­una.”

Katrín Júl­í­us­dóttir, vara­for­maður Sam­fylk­ing­ar­innar, til­kynnti fyrr í vetur að hún ætl­aði að hætta á þingi eftir þetta kjör­tíma­bil. Ákvörð­unin hafi verið per­sónu­leg og tími sé kom­inn til að snúa sér að öðru.

Ekki feng­ust við­brögð frá Hönnu Birnu Krist­jáns­dóttur, Illuga Gunn­ars­syni, Jóhönnu Maríu Sig­munds­dóttur, Ragn­heiði Elínu Árna­dóttur, Sigmundi Davíð Gunn­laugs­syni og Sigríði Ingi­björgu Inga­dóttur. Vigdís Hauks­dóttir vildi ekki velja einn af fjórum mögu­leikum og óskaði eftir því að það kæmi fram að hún „væri ekk­ert byrjuð að pæla í fram­boði."