Vöru- og verslunarhús sem telur 17 þúsund fermetra hefur nú risið undir Úlfarsfelli við Vesturlandsveg í Mosfellsbæ. Byggingin er hluti af nýrri uppbyggingu verslunar- og atvinnusvæðis í Mosfellsbæ sem fasteignafélagið Reitir fer fyrir. Hverfið, sem heitir Korputún, á að verða á stærð við Skeifuna og verður staðsett sunnan við Mosfellsbæ. 

„Fyrir fyrirtæki sem þurfa mikinn sýnileika“

Byggingin sem nú hefur risið mun hýsa þriggja hæða verslun, vöruhús og höfuðstöðvar JYSK, og verður sú hæsta í hverfinu. Lóðin telur um 20 prósent af svæðinu en þar er áætlað að rísi samtals 90 þúsund fermetrar af atvinnuhúsnæði í um 30 byggingum. 

Bygging JYSK stendur næst Vesturlandsvegi en þar er gert ráð fyrir stærri byggingum „fyrir fyrirtæki sem þurfa mikinn sýnileika og eru með blandaða starfsemi,“ að því er segir á vefsíðu Korputúns.

Þá segir að Korputún verði „fyrsta atvinnuhverfið á Íslandi til að hljóta BREEAM-vottun en hún tryggir að sjálfbærar áherslur séu …