Síminn hringir nokkrum sinnum og karlmaður tekur upp tólið. „Halló?“ spyr rám rödd með dálitlum hreim.

Góðan daginn. Er ég að tala við Jesú?

„Góðan daginn. Þú ert að tala við Jesú,“ svarar Jesús. 

Jesús, Jesús og María

Maðurinn í símanum er ekki fæddur í Betlehem né heldur er hann helsti trúarleiðtogi og mikilvægasta manneskjan í kristinni trú. Hann er þó, líkt og nafni hans Kristur, kennari.

Sá sem heldur á símtólinu er Jesús Sigfús H. Potenciano – framhaldsskóla- og háskólakennari á áttræðisaldri. Hann er fæddur á Spáni en fluttist til Íslands eftir að hann kynntist Maríu Önnu Kristjánsdóttur, íslenskri eiginkonu sinni. Saman eiga hjónin, sem hafa verið saman í rúm fimmtíu ár, 31 árs gamlan son. Hann heitir Kristján Jesús, en hann er alla jafna kallaður Jesús.

Þrátt fyrir að fyrsti stafurinn í nafni feðganna sé yfirleitt borinn fram með h-hljóði upp á spænsku, bera þeir báðir nafn sitt fram upp á íslenska mátann – með j.

Fólk vildi berja „gripinn“ augum

„Á Spáni er Jesús bara eins og Gunnar eða Daníel. Ekki alveg eins og Jón eða Sigurður, en það er mjög almennt. Ekki bara á Spáni, heldur öllum þessum kaþólsku ríkjum,“ útskýrir Jesús Sigfús.

Það voru því talsverð viðbrigði fyrir hann að koma til Íslands, þar sem hann var lengi vel sá eini sem bar nafnið. „Þegar ég kom hér þá var það ekki til. Ég vann þá í verslun sem tengdafaðir minn átti, Herjólfi í Skipholti 70, og þá kom fólk til að sjá gripinn,“ segir hann og skellir upp úr. Hann segir að fólk hafi verið mjög vinalegt, en forvitið um það af hverju hann væri kominn til að starfa á Íslandi. „Ég sagði bara að ég væri ástfanginn af konu og þyrfti að gera eitthvað,“ segir hann.

Sé flett upp í þjóðskrá má þar sjá að átta manns bera nafnið Jesús að eiginnafni, þar af fjórir að fyrsta nafni. Nafnið hefur þó enn ekki ratað á mannanafnaskrá. „Ég er ekki lengur stjarnan, ég er bara venjulegur maður. Sem er líka gott,“ segir Jesús Sigfús um þessa fjölgun á nöfnum sínum hérlendis og hlær. 

Hjálpar við að brjóta ísinn

Sonurinn Kristján Jesús er, líkt og faðir hans og nafni þeirra frá Nasaret, kennari. Hann kennir þó aðeins yngri aldurshópum. „Ég heiti Jesús, kalla mig Jesú, og allir í kringum mig. Ég er umsjónarkennari í grunnskóla. Ég leyfi nemendum mínum ekki að kalla mig Jesú – en allir vinir mínir kalla mig Jesú.“