Rétt fyrir klukkan hálf fimm síðdegis fimmtudaginn 22. þessa mánaðar voru vel á þriðja tug heimamanna að versla inn í Nettó-versluninni við Hafnarstræti á Ísafirði. Sumir eflaust að sæta lagi og gera helgarinnkaupin snemma, en aðrir að ná sér í efnivið í kvöldmat áður en bærinn sjálfur yrði illfær vegna yfirstandandi vetrarlægðar. Skyndilega varð allt svart, fyrir utan litla birtu af rafhlöðudrifnum öryggisljósum.

Og þótt tónlistin sem venjulega hljómar í bakgrunni slíkra verslana væri þögnuð vegna útsláttarins, var ekki fyllt upp í þá þögn með andköfum eða geðshræringu. Ljóstírur frá vasaljósum farsíma kviknuðu um alla verslunina og viðskiptavinir sem voru að koma tóku sér innkaupakerrur og gerðu sig líklega til að byrja að tína ofan í þær eftir að hafa seilst eftir símum sínum.

Næstu tíu mínúturnar héldu menn og konur svo áfram að sinna erindum sínum, teygja sig eftir mjólk, brauði og kjötmeti með annarri hendi með upplýstan …