Þórhildur Sunna Ævarsdóttir, þingmaður Pírata, hefur óska eftir því að nefndarmenn allsherjar- og menntamálanefndar ræði við fulltrúa lögreglunnar um rasisma innan lögreglunnar og aðferðir til að sporna við honum. Þetta kom fram í ræðu hennar undir liðnum störf þingsins á Alþingi í dag.
Tilefnið er mynd af merkjum á búningi lögreglukonu en málið hefur vakið miklar umræður á samfélagsmiðlum í dag.
„Ljósmynd Morgunblaðsins af lögreglukonu sem bar merki hvítra þjóðernissinna og táknmynd teiknimyndaandhetjunnar „The Punisher“ eða Refsarans, með leyfi forseta, við skyldustörf sín hefur vakið verkskuldaða athygli í dag.
Punisher-merkið er ekki sakleysisleg tilvísun í teiknimyndapersónu úr Marvel-heiminum heldur táknmynd lögreglunnar vestan hafs sem refsandi afls þeirra sem taka lögin og refsingar í eigin hendur og sneiða fram hjá réttarkerfinu,“ sagði þingmaðurinn.
[adspot]
Viðhorf sem geta ekki talist æskileg
Þá benti Þórhildur Sunna á að skilaboðin með merkinu væru þau að lögreglan hefði það hlutverk að refsa borgurunum fyrir ætluð lögbrot þeirra, rétt eins og Refsarinn gerði – en slík viðhorf gætu ekki talist æskileg í samfélagi sem segðist að minnsta kosti styðja betrunarstefnu og réttarríki.
Lögreglan á höfuðborgarsvæðinu hefur lýst yfir á Twitter að hún hafi ítrekað við allt sitt starfsfólk að lögreglumenn eigi ekki að bera nein merki sem ekki eru viðurkennd á lögreglubúningi og því verði fylgt eftir.
Hún segir það vissulega vera jákvæðar fréttir en „betur má en duga skal“. Sérstaklega í ljósi ummæla lögreglukonunnar sem um ræðir sem sagði í samtali við Vísi í dag að merki sem þessi væru notuð af mörgum lögreglumönnum og að hún teldi ekki að þau þýddu neitt neikvætt. Hún hefði sjálf borið merkin í áraraðir.
„Ummæli lögreglukonunnar benda til þess að annað hvort skorti mikilvæga fræðslu innan lögreglunnar um rasísk og ofbeldisfull merki eins og Vínlandsfánann og punisher- eða refsaramerkið – nú eða það sem verra væri: Að rasismi og ofbeldisfull menning fái að grassera innan lögreglunnar. En hvoru tveggja er óásættanleg staða.“
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
Athugasemdir