Meintir nauðgarar báðir farnir úr landi?

Nöfn mann­anna tveggja sem grun­aðir eru um að hafa nauðgað tveimur konum í íbúð í Hlíðum ganga nú manna á milli á sam­fé­lags­miðlum. Bent hefur verið á að annar þeirra hafi verið staddur á Kefla­vík­ur­flug­velli í morgun, sam­kvæmt eigin skrán­ingu á Twitter. Samkvæmt nýj­ustu skrán­ingu virð­ist hann vera kom­inn til Noregs.

Stundin greindi frá því í morgun að ekki var talin þörf á að krefj­ast gæslu­varð­halds yfir tveimur mönnum sem taldir eru hafa nauðgað tveimur konum með hrotta­fengnum hætti í íbúð í Hlíðum í síð­asta mán­uði. Samkvæmt frétt Frétta­blaðs­ins var íbúðin búin tækjum sem menn­irnir eru sak­aðir um að hafa notað við nauðg­an­irnar, svo sem svipum, reipi og keðjum. 

„Það var ekki talin þörf á rann­sókn­ar­gæslu“

„Þeir voru í haldi í tæpan sól­ar­hring og það lágu fyrir öll gögn. Það var ekki talin þörf á rann­sókn­ar­gæslu,“ sagði Árni Þór Sig­munds­son, yfir­maður á kyn­ferð­is­brota­deild Lög­regl­unnar á höf­uð­borg­ar­svæð­inu, í sam­tali við Stundina. Þá sagði hann það ekki þjóna almanna­hags­munum að úrskurða menn­ina í gæslu­varð­hald.

Ekki mínir almanna­hags­munir Ákvörðun lög­regl­unnar hefur verið mót­mælt harð­lega á sam­fé­lags­miðlum í dag, meðal ann­ars með þess­ari mynd frá Þórdísi Elvu Þor­valds­dóttur, þar sem segir að á meðan meintir nauð­garar gangi lausir sé verið að dæma konur í gæslu­varð­hald heima hjá sér.

Mynd: Þórdís Elva Þor­valds­dóttir

Mikil reiði hefur gripið um sig á meðal fólks í kjöl­far þeirrar ákvörð­unar að krefj­ast ekki gæslu­varð­halds yfir mönn­unum, eins og má meðal ann­ars sjá á Facebook-síðu lög­regl­unnar þar sem fjöl­margir hafa tekið þátt í umræðum og látið skoð­anir sínar í ljós. Þá hefur myllu­merkið #almanna­hags­munir verið notað í umræðum um málið á Twitter. 

Þar segir meðal ann­ars: „Þetta er algjör­lega hræði­legt. Ég er ekki þol­andi en mér er samt flök­urt eftir þennan lestur. Svimar af reiði og við­bjóð.“

Ekki náð­ist í Sigríði Björk Guð­jóns­dóttur, lög­reglu­stjóra á höf­uð­borg­ar­svæð­inu, né Árna Þór Sig­munds­son, yfir­lög­reglu­þjón hjá kyn­ferð­is­brota­deild lög­regl­unnar, við vinnslu frétt­ar­innar. 

Uppfært kl. 14.05. 

Talið er að hinn aðil­inn hafi einnig farið úr landi í morgun. Á sam­fé­lags­miðlum gengur mynd sem var tekin á Kefla­vík­ur­flug­velli í morgun. Samkvæmt því eru báðir hinna grun­uðu farnir úr landi, en það hefur ekki feng­ist stað­fest. 

Rétt fyrir hádegi gaf lög­reglan á höf­uð­borg­ar­svæð­inu það út að þeir sem að rann­sókn­inni stæðu myndu fara aftur yfir málið í hádeg­inu og skoða hvort mis­tök hafi verið gerð. RÚV greindi frá þessu, en sam­kvæmt heim­ildum þeirra taldi lög­reglan ólík­legt að dóm­stólar sam­þykktu gæslu­varð­halds­kröfu yfir mönn­unum.

Enn hefur ekki náðst í lög­regl­una.