Joe Biden Bandaríkjaforseti mun á næstu dögum kynna áætlanir um miklar skattahækkanir á ríkustu hópana í bandarísku samfélagi til þess að standa straum af kostnaði við félagslegar aðgerðir af ýmsu tagi.
Tillögur Bidens, sem New York Times sagði fyrst frá á fimmtudag, fela í sér að fjármagnstekjuskattur þeirra sem þéna yfir 1 milljón dala, jafnvirði 126 milljóna króna, hækki upp í 39,6 prósent.
Í dag tekur alríkið 20 prósent skatt af fjármagnstekjum þessa hóps og því væri um hartnær tvöföldun að ræða, ef tillögur Bidens færu í þessari mynd í gegnum Bandaríkjaþing.
Til viðbótar bætist svo líka 3,8 prósenta sérstakur skattur á hagnað af fjárfestingum og því gæti fjármagnstekjuskattur alríkisstjórnarinnar í ákveðnum tilfellum farið upp í 43,4 prósent.
Sum ríki Bandaríkjanna leggja að auki á sína eigin fjármagnstekjuskatta, misháa. Að þeim meðtöldum gæti fjármagnstekjuskattur þeirra tekjuhæstu í Kaliforníuríki farið upp í 56,7 prósent, samkvæmt frétt Bloomberg.
Biden er sömuleiðis sagður ætla að leggja til að tekjuskattsprósentan í efsta þrepi fari úr 37 prósentum og aftur upp í 39,6 prósent. Það er sama prósenta og var á efsta þrepinu (af alls sjö þrepum) í bandaríska tekjuskattskerfinu þegar Donald Trump tók við sem forseti Bandaríkjanna í upphafi árs 2017.
Búist er við að Biden kynni þessar skattahækkunartillögur, sem eru hluti af fjármögnun fjölskylduáætlunar hans, American Families Plan, í ræðu á Bandaríkjaþingi á miðvikudaginn í næstu viku, 28. apríl.
Fjármálaheimurinn hefur ekki trú á því að 39,6 prósent standi
Titrings varð vart á hlutabréfamörkuðum í Bandaríkjunum eftir að fréttir fóru að birtast um áætlanir Bidens á fimmtudag.
Í frétt Financial Times eru tekin saman neikvæð viðbrögð hinna ýmsu fjárfesta við tíðindunum, en þar segir að nú sé búist við því að margir fjárfestar selji hlutabréf sem þeir haldi á til að tryggja að söluandvirði þeirra falli ekki undir hina boðuðu hærri skattprósentu.
[adspot]
Ekki hefur hins vegar neitt komið fram um það hvenær ráðgert er að láta boðaðar breytingar taka gildi, hvort það verði frá og með maímánuði eða síðar.
[links]
Í frétt FT er einnig vitnað til manns að nafni Brad Dillon, sem starfar sem auðráðgjafi hjá fyrirtækinu UBS Global Wealth Management. Hann segist ekki hafa trú á því að þessi mikla hækkun á fjármagnstekjuskatti fari óbreytt í gegnum þingið.
Í samantekt Reuters á viðbrögðum úr fjármálaheiminum sjást svipuð viðhorf, ýmsir virðast telja að með því að setja fram tillögur að svona miklum skattahækkunum sé Biden að búa sér til samningsstöðu inn í þingið.
Fjárfestingarbankinn Goldman Sachs birti sömuleiðis í gær greiningu sína á málinu. Ólíklegt væri að tillögur Bidens í þeirri mynd sem fjallað hefði verið um færu óbreyttar í gegn um þingið, þar sem demókratar hafa tæpan meirihluta í öldungadeildinni. Líklegra væri að fjármagnstekjuskatturinn á tekjuhæstu hópana yrði hækkaður upp í 28 prósent.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
skattamál
Rafmyntin er sýnd veiði en ekki gefin
Skattfrjálsar úttektir lífeyris í Portúgal leiddu til skoðunar ráðuneytis
Samgöngur á landi – í hinu stóra samhengi orku- og auðlindadrifins skattkerfis
Vilja færa 13 milljarða í kjarabætur til almennings með sértækum skattahækkunum
Tekjutap ríkisins vegna niðurgreiðslu enn fleiri rafbíla gæti orðið 3,8 milljarðar
Athugasemdir