Landsbankinn færði niður lán upp á rúma fimm milljarða og tapaði 3,6 milljörðum

Yfir tíu millj­arða króna við­snún­ingur var milli ára á afkomu Lands­bank­ans á fyrsta árs­fjórð­ungi. Bankinn, sem er að nær öllu leyti í eigu íslenska rík­is­ins, tap­aði 3,6 millj­örðum króna á fyrstu þremur mán­uðum árs­ins 2020 en skil­aði 6,8 millj­arða króna hagn­aði á sama tíma­bili í fyrra.

Arðsemi eigi fjár hans var nei­kvæð upp á 5,9 pró­sent en var jákvæð um 11,2 pró­sent á fyrsta árs­fjórð­ungi í fyrra. Þetta kemur fram í árs­fjórð­ungs­upp­gjöri Lands­bank­ans sem birt var í dag.

Virð­is­rýrnun útlána bank­ans nam 5,2 millj­örðum króna á fyrstu þremur mán­uðum árs­ins, sem jafn­gildir um 0,4 pró­sent af lána­safni bank­ans.

Alls eru útlán bank­ans til ferða­þjón­ustu, sem hefur orðið verst allra geira úti vegna áhrifa af COVID-19 far­aldr­inum, 95,7 millj­arðar króna sem nemur um 8,1 pró­sent af heild­ar­út­lánum bank­ans. Þau hafa lækkað um rúman hálfan millj­arð króna frá árs­lokum 2019.

[adspot]Rekstr­ar­tekjur bank­ans á fyrstu þremur mán­uðum árs­ins 2020 námu 3,4 millj­örðum króna, sam­an­borið við 15,0 millj­arða króna á sama tíma­bili árið áður. Aðrar rekstr­ar­tekjur voru nei­kvæðar um 8 millj­arða króna sam­an­borið við tekjur upp á 2,7 millj­arða króna á sama tíma­bili árið áður. Kostn­að­ar­hlut­fall fyrstu þrjá mán­uði árs­ins var 72,6 pró­sent, sam­an­borið við 38,7 pró­sent á sama tíma­bili árið 2019.

Útlán til ein­stak­linga og fyr­ir­tækja juk­ust um 4,4 pró­sent frá ára­mótum, eða um rúma 50 millj­arða króna en þar af voru um 33 millj­arðar króna vegna geng­is­breyt­inga. Innlán hjá Lands­bank­anum juk­ust um 47 millj­arða króna frá ára­mótum, sem er 6,7 pró­sent aukn­ing.

Eigið fé Lands­bank­ans var 244,1 millj­arður króna þann 31. mars síð­ast­lið­inn og eig­in­fjár­hlut­fallið var 24,8 pró­sent.

Lilja Björk Ein­ars­dóttir, banka­stjóri Lands­bank­ans, segir að upp­gjör bank­ans end­ur­spegli greini­lega þau áhrif sem COVID-19 hafi haft á efna­hags­líf lands­ins. „Virð­is­rýrnun útlána nam 5,2 millj­örðum króna sem má rekja til þeirra aðstæðna sem hafa skap­ast í kjöl­far COVID-19 heims­far­ald­urs­ins. Mat á virðirýrnun er í sam­ræmi við alþjóð­legan reikn­ings­skila­staðal og til­mæli frá Evrópsku banka­eft­ir­lits­stofn­un­inni og Seðla­banka Íslands. Þessi var­úð­ar­færsla, ásamt áhrifum af óróa á hluta­bréfa­mörk­uðum, á stærstan þátt í því að bank­inn bók­færir tap á fyrsta árs­fjórð­ungi 2020 upp á um 3,6 millj­arða króna, sam­an­borið við hagnað upp á 6,8 millj­arða króna vegna fyrsta árs­fjórð­ungs 2019.“

Lilja segir að ekki sé útséð um end­an­leg áhrif far­ald­urs­ins. Þó megi telja lík­legt að minni tekjur við­skipta­vina og aukin skuld­setn­ing muni hafa nei­kvæð áhrif á láns­hæfi þeirra sem leiðir til enn meiri virð­is­rýrn­unar útlána.